৩. কামগুণকথাৱণ্ণনা

৫১০. সব্বেপীতি কুসলাকুসলক্খন্ধাদযোপি. তেসম্পি হি আলম্বনত্থিকতালক্খণস্স কত্তুকম্যতাছন্দস্স ৱসেন সিযা কমনট্ঠতাতি অধিপ্পাযো. ধাতুকথাযং ‘‘কামভৱো পঞ্চহি খন্ধেহি একাদসহি আযতনেহি সত্তৰসহি ধাতূহি সঙ্গহিতো. কতিহি অসঙ্গহিতো? ন কেহিচি খন্ধেহি একেনাযতনেন একায ধাতুযা অসঙ্গহিতো’’তি আগতত্তা আহ ‘‘উপাদিন্নক্খন্ধানমেৱ কামভৱভাৱো ধাতুকথাযং দস্সিতো’’তি. পঞ্চাতি গণনপৰিচ্ছেদো, তদঞ্ঞগণননিৱত্তনত্থোতি ‘‘পঞ্চ কামগুণা’’তি ৱচনং ততো অঞ্ঞেসং তব্ভাৱং নিৱত্তেতীতি আহ ‘‘পঞ্চেৱ কামকোট্ঠাসা কামোতি ৱুত্তা’’তি. ততো এৱ কামধাতূতি ৱচনং ন অঞ্ঞস্স নামং, তেসংযেৱ নামন্তি অত্থো. তযিদং পৰৱাদিনো মতিমত্তন্তি ৱুত্তং ‘‘ইমিনা অধিপ্পাযেনা’’তি. এৱং ৱচনমত্তন্তি এৱং ‘‘পঞ্চিমে কামগুণা’’তি ৱচনমত্তং নিস্সায, ন পনত্থস্স অৱিপৰীতং অত্থন্তি অত্থো.

কামগুণকথাৱণ্ণনা নিট্ঠিতা.