৪. দানকথাৱণ্ণনা

৪৭৯. ফলদানভাৱদীপনত্থন্তি ফলদানসব্ভাৱদীপনত্থং. ফলদানং ৱুত্তং ৱিয হোতীতি চিত্তেন ফলদানং পধানভাৱে ৱুত্তং ৱিয হোতীতি অত্থো. অঞ্ঞথা দানভাৱোতি ন সক্কা ৱত্তুং. দানভাৱোপি হি ‘‘দানং অনিট্ঠফল’’ন্তিআদিনা ৱুত্তোযেৱাতি. তন্নিৱাৰণত্থন্তি ফলদাননিৱাৰণত্থং. এতন্তি ‘‘দানং অনিট্ঠফল’’ন্তিআদিৱচনং. ভেসজ্জাদিৱসেন আবাধানিট্ঠতা দেয্যধম্মস্স অনিট্ঠফলতাপৰিযাযো দট্ঠব্বো.

কথং তথেৱ সুত্তং সকৱাদিপৰৱাদিৱাদেসু যুজ্জতীতি চোদনায ‘‘ন পন একেনত্থেনা’’তি ৱুত্তং ৱিভাৱেতুং ‘‘দেয্যধম্মোৱ দান’’ন্তিআদি ৱুত্তং. তত্থ নিৱত্তনপক্খেযেৱ এৱ-কাৰো যুত্তো, ন সাধনপক্খে দ্ৱিন্নম্পি দানভাৱস্স ইচ্ছিতত্তা. তেনাহ ‘‘চেতসিকোৱাতি অত্থো দট্ঠব্বো, দেয্যধম্মোৱা’’তি চ. তেনেৱাহ ‘‘দ্ৱিন্নঞ্হি দানানন্তিআদি. সঙ্কৰভাৱমোচনত্থন্তি সতিপি দানভাৱে সভাৱসঙ্কৰমোচনত্থং. তেনাহ ‘‘চেতসিকস্সা’’তিআদি.

দানকথাৱণ্ণনা নিট্ঠিতা.