২. পচ্চনীকানুলোমৱণ্ণনা

১৪. অনুলোমপঞ্চকস্সাতিআদিম্হি অট্ঠকথাৱচনে. পুন তত্থাতি যথাৱুত্তে অট্ঠকথাৱচনে, তেসু ৱা অনুলোমপঞ্চকপচ্চনীকেসু. সব্বত্থ পুগ্গলো নুপলব্ভতীতিআদিকস্স পাঠপ্পদেসস্স অত্থো ‘‘সৰীৰং সন্ধাযা’’তিআদিনা অট্ঠকথাযং ৱুত্তনযেন ৱেদিতব্বো অত্থো. পটিকম্মাদিপাড়িন্তি পটিকম্মনিগ্গহউপনযননিগমনপাড়িং. তীসু মুখেসূতি ‘‘সব্বত্থা’’তিআদিনা ৱুত্তেসু তীসু ৱাদমুখেসু. পচ্চনীকস্স পাড়ি ৱুত্তাতি সম্বন্ধো. তন্তি পাড়িং. সঙ্খিপিত্ৱা আগতত্তা সৰূপেন অৱুত্তে. সুদ্ধিক…পে… ৱুত্তং হোতি তত্থ ‘‘সব্বত্থা’’তিআদিনা সৰীৰাদিনো পৰামসনং নত্থি, ইধ অত্থীতি অযমেৱ ৱিসেসো, অঞ্ঞং সমানন্তি.

সচ্চিকট্ঠৱণ্ণনা নিট্ঠিতা.