১১. নিৰোধকথাৱণ্ণনা

৩৫৩. যেসং দ্ৱিন্নন্তি যেসং দ্ৱিন্নং দুক্খসচ্চানং. দ্ৱীহি নিৰোধেহীতি অপ্পটিসঙ্খাপটিসঙ্খাসঙ্খাতেহি দ্ৱীহি নিৰোধেহি. তত্থ দুক্খাদীনং পটিসঙ্খাতি পটিসঙ্খা, পঞ্ঞাৱিসেসো. তেন ৱত্তব্বো নিৰোধো পটিসঙ্খানিৰোধো. যো সাসৱেহি ধম্মেহি ৱিসংযোগোতি ৱুচ্চতি, যো পচ্চযৱেকল্লেন ধম্মানং উপ্পাদস্স অচ্চন্তৱিবন্ধভূতো নিৰোধো, সো পটিসঙ্খায নৱত্তব্বতো অপ্পটিসঙ্খানিৰোধো নামাতি পৰৱাদিনো লদ্ধি. পটিসঙ্খায ৱিনা নিৰুদ্ধাতি পচ্চযৱেকল্লেন অনুপ্পত্তিং সন্ধায ৱুত্তং. তেনাহ ‘‘ন উপ্পজ্জিত্ৱা ভঙ্গা’’তি. অনুপ্পাদোপি হি নিৰোধোতি ৱুচ্চতি যতো ‘‘ইমস্সুপ্পাদা ইদং উপ্পজ্জতী’’তি লক্খণুদ্দেসস্স পটিলোমে ‘‘ইমস্স নিৰোধা ইদং নিৰুজ্ঝতী’’তি দস্সিতো. তেনাতি পটিসঙ্খায নিৰোধস্স খণিকনিৰোধস্স চ ইধ নাধিপ্পেতত্তা.

নিৰোধকথাৱণ্ণনা নিট্ঠিতা.

দুতিযৱগ্গৱণ্ণনা নিট্ঠিতা.