৯. হেৱত্থিকথাৱণ্ণনা

৩০৪. হেৱত্থিকথাযং ‘‘সব্বো ধম্মো সকভাৱেন অত্থি পৰভাৱেন নত্থী’’তি পৱত্তো পৰৱাদীৱাদো যথা ৱিভজ্জ পটিপুচ্ছা ৱা ন ব্যাকাতব্বো, এৱং একংসতো ন ব্যাকাতব্বো ৱিসেসাভাৱতো, কেৱলং ঠপনীযপক্খে তিট্ঠতীতি অধিপ্পাযেনাহ ‘‘অৱত্তব্বুত্তৰেনা’’তি. যথা হি সব্বে ৱাদা সপ্পটিৱাদাৱাতি পটিঞ্ঞা ভূতকথনত্তা অৱত্তব্বুত্তৰা উপেক্খিতব্বা, এৱমযম্পীতি ৱেদিতব্বং. তেনাহ ‘‘উপেক্খিতব্বেনা’’তি. অথ ৱা অৱত্তব্বং উত্তৰং অৱত্তব্বুত্তৰং. যথা অনিচ্চৱাদিনং পতি অনিচ্চো সদ্দো পচ্চযাধীনৱুত্তিতোতি, উত্তৰং ন ৱত্তব্বং সিদ্ধসাধনভাৱতো, এৱং ইধাপি দট্ঠব্বং. সিদ্ধসাধনঞ্হি দড্ঢস্স ডহনসদিসত্তা নিৰত্থকমেৱ সিযা, অট্ঠকথাযং পন যস্মা পৰৱাদিনা যেন সভাৱেন যো ধম্মো অত্থি, তেনেৱ সভাৱেন সো ৱিনা কালভেদাদিপৰামসনেন নত্থীতি পতিট্ঠাপীযতি, তস্মা ‘‘অযোনিসো পতিট্ঠাপিতত্তা’’তি ৱুত্তং.

এত্থ চ ‘‘হেৱত্থি, হেৱং নত্থী’’তি পটিজানন্তেন পৰৱাদিনা যথা সপৰভাৱেহি ৰূপাদীনং অত্থিতা পটিঞ্ঞাতা, এৱং কালদেসাদিভেদেহিপি সা পটিঞ্ঞাতা এৱ. তেনেৱাহ ‘‘অতীতং অনাগতপচ্চুপ্পন্নৱসেন, অনাগতপচ্চুপ্পন্নানি ৱা অতীতাদিৱসেন নত্থী’’তি. এৱং সতি নিগণ্ঠাচেলকৱাদো পৰিদীপিতো সিযা. তে হি ‘‘সিযা অত্থি, সিযা নত্থি, সিযা অত্থি চ নত্থি চা’’তিআদিনা সব্বপদত্থেসু পত্তভাগে পটিজানন্তি. তত্থ যদি ৱত্থুনো সভাৱেনেৱ, দেসকালসন্তানৱসেন ৱা নত্থিতা অধিপ্পেতা, তং সিদ্ধসাধনং সকৱাদিনোপি ইচ্ছিতত্তা. যস্স হি ধম্মস্স যো সভাৱো, ন সো ততো অঞ্ঞথা উপলব্ভতি. যদি উপলব্ভেয্য, অঞ্ঞো এৱ সো সিযা. ন চেত্থ সামঞ্ঞলক্খণং নিদস্সেতব্বং সলক্খণস্স অধিপ্পেতত্তা তস্স নত্থিভাৱস্স অভাৱতো. যথা চ পৰভাৱেন নত্থিতায ন ৱিৱাদো, এৱং দেসকালন্তৰেসুপি ইত্তৰকালত্তা সঙ্খাৰানং. ন হি সঙ্খাৰা দেসন্তৰং, কালন্তৰং ৱা সঙ্কমন্তি খণিকভাৱতো. এতেনেৱ পৰিযাযন্তৰেন নত্থিতাপি পটিক্খিত্তা ৱেদিতব্বা. যথা চ অত্থিতা, নত্থিতা ৱিনা কালভেদেন একস্মিং ধম্মে পতিট্ঠং ন লভন্তি অঞ্ঞমঞ্ঞৱিৰুদ্ধত্তা, এৱং সব্বদাপি নিচ্চত্তা.

যং পন তে ৱদন্তি ‘‘যথা সুৱণ্ণং কটকাদিৰূপেন ঠিতং ৰুচকাদিভাৱং আপজ্জতীতি নিচ্চানিচ্চং. তঞ্হি সুৱণ্ণভাৱাৱিজহনতো নিচ্চং কটকাদিভাৱহানিতো অনিচ্চং, এৱং সব্বধম্মা’’তি. তে ইদং ৱত্তব্বা ‘‘কিং কটকভাৱো কটকস্স, উদাহু সুৱণ্ণস্সা’’তি. যদি কটকস্স, সুৱণ্ণনিৰপেক্খো সিযা তদঞ্ঞভাৱো ৱিয. অথ সুৱণ্ণস্স, নিচ্চকালং তত্থ উপলব্ভেয্য সুৱণ্ণভাৱো ৱিয. ন চ সক্কা উভিন্নং একভাৱোতি ৱত্তুং কটকৱিনাসেপি সুৱণ্ণাৱিনাসতো. অথ মতং, সুৱণ্ণকটকাদীনং পৰিযাযীপৰিযাযভাৱতো নাযং দোসোতি. যথা হি কটকপৰিযাযনিৰোধেন ৰুচকপৰিযাযুপ্পাদেপি পৰিযাযী তথেৱ তিট্ঠতি, এৱং মনুস্সপৰিযাযনিৰোধে দেৱপৰিযাযুপ্পাদেপি পৰিযাযী জীৱদ্ৰব্যং তিট্ঠতীতি নিচ্চানিচ্চং, তথা সব্বদ্ৰব্যানীতি. তযিদং অম্বং পুট্ঠস্স লবুজব্যাকৰণং. যং স্ৱেৱ নিচ্চো অনিচ্চোতি ৱা ৱদন্তো অঞ্ঞত্থ নিচ্চতং অঞ্ঞত্থ অনিচ্চতং পটিজানাতি, অথ পৰিযাযপৰিযাযীনং অনঞ্ঞতা ইচ্ছিতা, এৱং সতি পৰিযাযোপি নিচ্চো সিযা পৰিযাযিনো অনঞ্ঞত্তা পৰিযাযসৰূপং ৱিয, পৰিযাযী ৱা অনিচ্চো পৰিযাযতো অনঞ্ঞত্তা পৰিযাযসৰূপং ৱিযাতি. অথ নেসং অঞ্ঞা অনঞ্ঞতা, এৱঞ্চ সতি ৱুত্তদোসদ্ৱযানতিৱত্তি. অপিচ কোযং পৰিযাযো নাম, যদি সণ্ঠানং, সুৱণ্ণো তাৱ হোতু, কথং জীৱদ্ৰব্যে অৰূপিভাৱতো. যদি তস্সপি সণ্ঠানৱন্তং ইচ্ছিতং, তথা সতিস্স একস্মিম্পি সত্তসন্তানে বহুতা আপজ্জতি সৰূপতা চ সণ্ঠানৱন্তেসুপি পীড়কাদীসু তথাদস্সনতো. অথ পৱত্তিৱিসেসো, এৱম্পি বহুতা খণিকতা চ আপজ্জতি, তস্মা পৰিযাযসৰূপমেৱ তাৱ পতিট্ঠপেতব্বং.

যং পন ৱুত্তং ‘‘সুৱণ্ণং কটকাদিৰূপেন ঠিত’’ন্তি, তত্থ সম্পত্তিযোগতো ৱিঞ্ঞাযমানেসু ৱিসিট্ঠেসু ৰূপগন্ধৰসফোট্ঠব্বেসু কিং একং, উদাহু তেসং সমুদাযো, তব্বিনিমুত্তং ৱা ধম্মন্তৰং সুৱণ্ণন্তি? তত্থ ন তাৱ ৰূপাদীসু একেকং সুৱণ্ণং তেন সুৱণ্ণকিচ্চাসিদ্ধিতো, নাপি তব্বিনিমুত্তং ধম্মন্তৰং তাদিসস্স অভাৱতো. অথ সমুদাযো, তং পন পঞ্ঞত্তিমত্তন্তি ন তস্স নিচ্চতা, নাপি অনিচ্চতা সম্ভৱতি. যথা চ সুৱণ্ণস্স, এৱং কটকস্সপি পঞ্ঞত্তিমত্তত্তাতি. তযিদং নিদস্সনং পৰৱাদিনো জীৱদ্ৰব্যস্সপি পঞ্ঞত্তিমত্তং তস্সেৱ সাধেতীতি কুতো তস্স নিচ্চানিচ্চতাতি অলমতিপ্পপঞ্চেন.

হেৱত্থিকথাৱণ্ণনা নিট্ঠিতা.

মহাৱগ্গৱণ্ণনা নিট্ঠিতা.