৭. অচ্চন্তনিযামকথাৱণ্ণনা

৮৪৭. যং ‘‘একৱাৰং নিমুগ্গো তথা নিমুগ্গোৱ হোতি, এতস্স পুন ভৱতো ৱুট্ঠানং নাম নত্থী’’তি অট্ঠকথাযং আগতং, সো পন আচৰিযৱাদো, ন অট্ঠকথানযোতি দস্সেন্তো ‘‘তায জাতিযা…পে… মঞ্ঞমানো’’তি আহ. তত্থ তায জাতিযাতি যস্সং জাতিযং পুগ্গলো কম্মাৱৰণাদিআৱৰণেহি সমন্নাগতো হোতি, তায জাতিযা. সংসাৰখাণুকভাৱো ৱস্সভঞ্ঞাদীনং ৱিয মক্খলিআদীনং ৱিয চ দট্ঠব্বো. সো চ অহেতুকাদিমিচ্ছাদস্সনস্স ফলভাৱেনেৱ ৱেদিতব্বো, ন অচ্চন্তনিযামস্স নাম কস্সচি অত্থিভাৱতো. যথা হি ৱিমুচ্চন্তস্স কোচি নিযামো নাম নত্থি ঠপেত্ৱা মগ্গেন ভৱপৰিচ্ছেদং, এৱং অৱিমুচ্চন্তস্সপি কোচি সংসাৰনিযামো নাম নত্থি. তাদিসস্স পন মিচ্ছাদস্সনস্স বলৱভাৱে অপৰিমিতকপ্পপৰিচ্ছেদে চিৰতৰং সংসাৰপ্পবন্ধো হোতি, অপাযূপপত্তি চ যত্থ সংসাৰখাণুসমঞ্ঞা.

যং পনেকে ৱদন্তি ‘‘অত্থেৱ অচ্চন্তং সংসৰিতা অনন্তত্তা সত্তনিকাযস্সা’’তি, তম্পি অপুঞ্ঞবহুলং সত্তসন্তানং সন্ধায ৱুত্তং সিযা. ন হি মাতুঘাতকাদীনং তেনত্তভাৱেন সম্মত্তনিযামোক্কমনন্তৰাযভূতো মিচ্ছত্তনিযামো ৱিয সত্তানং ৱিমুত্তন্তৰাযকৰো সংসাৰনিযামো নাম নত্থি. যাৱ পন ন মগ্গফলস্স উপনিস্সযো উপলব্ভতি, তাৱ সংসাৰো অপৰিচ্ছিন্নো. যদা চ সো উপলদ্ধো, তদা সো পৰিচ্ছিন্নো এৱাতি দট্ঠব্বং.

যথা নিযতসম্মাদস্সনং, এৱং নিযতমিচ্ছাদস্সনেনপি সৱিসযে একংসগাহৱসেন উক্কংসগতেন ভৱিতব্বন্তি তেন সমন্নাগতস্স পুগ্গলস্স সতি অচ্চন্তনিযামে কথং তস্মিং অভিনিৱেসৱিসযে অনেকংসগাহো উপ্পজ্জেয্য, অভিনিৱেসন্তৰং ৱা ৱিৰুদ্ধং যদি উপ্পজ্জেয্য, অচ্চন্তনিযামো এৱ ন সিযাতি পাড়িযং ৱিচিকিচ্ছুপ্পত্তিনিযামন্তৰুপ্পত্তিচোদনা কতা. ন হি ৱিচিকিচ্ছা ৱিয সম্মত্তনিযতপুগ্গলানং যথাক্কমং মিচ্ছত্তসম্মত্তনিযতপুগ্গলানং সম্মত্তমিচ্ছত্তনিযতা ধম্মা কদাচিপি উপ্পজ্জন্তি, অৱিৰুদ্ধং পন নিযামন্তৰমেৱ হোতীতি আনন্তৰিকন্তৰং ৱিয মিচ্ছাদস্সনন্তৰং সমানজাতিকং ন নিৱত্তেতীতি ৱিৰুদ্ধংযেৱ দস্সেতুং পাড়িযং ৱিচিকিচ্ছা ৱিয সস্সতুচ্ছেদদিট্ঠিযো এৱ উদ্ধটা. এৱমেত্থ ৱিচিকিচ্ছুপ্পত্তিনিযামন্তৰুপ্পত্তীনং নিযামন্তৰুপ্পত্তিনিৱত্তকভাৱো ৱেদিতব্বো, অচ্চন্তনিযামো চ নিৱত্তিস্সতীতি চ ৱিৰুদ্ধমেতন্তি পন ‘‘ৱিচাৰেত্ৱাৱ গহেতব্বা’’তি ৱুত্তং সিযা.

অচ্চন্তনিযামকথাৱণ্ণনা নিট্ঠিতা.