১. নিৰোধকথাৱণ্ণনা

৫৭১-৫৭২. সকসমযে ‘‘পুৰিমচিত্তস্স নিৰোধানন্তৰং পচ্ছিমচিত্তং উপ্পজ্জতী’’তি ইচ্ছিতং, পৰৱাদী পন ‘‘যস্মিং খণে ভৱঙ্গচিত্তং, তস্মিংযেৱ খণে কিৰিযমযচিত্তং উপ্পজ্জতী’’তি ৱদতি. এৱং সতি পুৰিমপচ্ছিমচিত্তানং সহভাৱোপি অনুঞ্ঞাতো হোতি. তেনাহ ‘‘ভঙ্গক্খণেন সহেৱা’’তি. তথা চ সতি ৱিপাককিৰিযক্খন্ধানং ৱিয কিৰিযৱিপাকক্খন্ধানং ৱিপাকৱিপাকক্খন্ধানং কিৰিযকিৰিযক্খন্ধানঞ্চ ৱুত্তনযেন সহভাৱো ৱত্তব্বোতি ইমমত্থং দস্সেন্তো ‘‘ভৱঙ্গচিত্তস্সা’’তিআদিমাহ. তত্থ উপপত্তিভৱভাৱেন এসিযা ইচ্ছিতব্বাতি উপপত্তেসিযা ৱিপাকক্খন্ধা, তে চ যেভুয্যেন ভৱঙ্গপৰিযাযকাতি অট্ঠকথাযং ৱুত্তং ‘‘উপপত্তেসিযন্তি সঙ্খং গতস্স ভৱঙ্গচিত্তস্সা’’তি. আদিপৰিযোসানমত্তঞ্হি তস্স পটিসন্ধিচুতিচিত্তং, তদাৰম্মণং ভৱঙ্গন্ত্ৱেৱ ৱুচ্চতীতি. চক্খুৱিঞ্ঞাণাদীনং কিৰিযাৱেমজ্ঝে পতিতত্তা কিৰিযাচতুক্খন্ধগ্গহণেন গহণং যুত্তন্তি ৱুত্তং. চক্খুৱিঞ্ঞাণাদীনন্তি হি আদি-সদ্দেন ন সোতৱিঞ্ঞাণাদীনংযেৱ গহণং, অথ খো সম্পটিচ্ছনসন্তীৰণানম্পীতি দট্ঠব্বং.

নিৰোধকথাৱণ্ণনা নিট্ঠিতা.