১০. দসমনযো ৱিপ্পযুত্তেনৱিপ্পযুত্তপদৱণ্ণনা

৩৫৩. যে ৱিপ্পযুত্তেন ৱিপ্পযুত্তভাৱেন পাড়িযং অগ্গহিতা, তেসু কেচি ৱিপ্পযুত্তস্স ধম্মন্তৰস্স অভাৱতো কেচি খন্ধাদীহি ৱিপ্পযোগস্সেৱ অসম্ভৱতোতি ইমমত্থং দস্সেন্তো ‘‘ধম্মাযতনাদিধম্মা’’তিআদিমাহ. তত্থ সব্বচিত্তুপ্পাদগতধম্মভাৱতোতি ইমিনা ভিন্নকালতাদিৱিসেসৱতো অৰূপক্খন্ধস্স ৱিপ্পযুত্তস্স ধম্মন্তৰস্স অভাৱমাহ, অনাৰম্মণমিস্সকভাৱতোতি ইমিনা পন সব্বস্সপি. কামভৱো উপপত্তিভৱো সঞ্ঞীভৱো পঞ্চৱোকাৰভৱোতি ইমে চত্তাৰো মহাভৱা. ৱিপ্পযোগাভাৱতোতি ৱিপ্পযোগাসম্ভৱতো. ন হি যে দুক্খসচ্চাদীহি ৱিপ্পযুত্তা, তেহি ৱিপ্পযুত্তানং তেসংযেৱ দুক্খসচ্চাদীনং খন্ধাদীসু কেনচি ৱিপ্পযোগো সম্ভৱতি.

দসমনযৱিপ্পযুত্তেনৱিপ্পযুত্তপদৱণ্ণনা নিট্ঠিতা.