৩. নিস্সগ্গিযকণ্ডং (ভিক্খুনীৱিভঙ্গৱণ্ণনা)

৭৩৩. নিস্সগ্গিযেসু পঠমং উত্তানমেৱ.

৭৪০. দুতিযে ‘‘অয্যায দম্মীতি এৱং পটিলদ্ধন্তি নিস্সট্ঠপটিলদ্ধং. তেনেৱ মাতিকাট্ঠকথাযম্পি ‘‘নিস্সট্ঠং পটিলভিত্ৱাপি যথাদানেযেৱ উপনেতব্ব’’ন্তি ৱুত্তং. যথাদানেযেৱ উপনেতব্বন্তি যথা দাযকেন দিন্নং, তথা উপনেতব্বং, অকালচীৱৰপক্খেযেৱ ঠপেতব্বন্তি ৱুত্তং হোতি. এত্থ চ ভাজাপিতায লদ্ধচীৱৰমেৱ নিস্সগ্গিযং হোতি, তং ৱিনযকম্মং কত্ৱাপি অত্তনা ন লভতি. সেসমেত্থ উত্তানমেৱ. অকালচীৱৰতা, তথাসঞ্ঞিতা, কালচীৱৰন্তি অধিট্ঠায লেসেন ভাজাপনং, পটিলাভোতি ইমানি পনেত্থ চত্তাৰি অঙ্গানি.

৭৪৩. ততিযে মেতন্তি মে এতং. সকসঞ্ঞায গহিতত্তা পাচিত্তিযং দুক্কটঞ্চ ৱুত্তং. ইতৰথা ভণ্ডগ্ঘেন কাৰেতব্বং. উপসম্পন্নতা, পৰিৱত্তিতচীৱৰস্স ৱিকপ্পনুপগতা, সকসঞ্ঞায অচ্ছিন্দনং ৱা অচ্ছিন্দাপনং ৱাতি ইমানি পনেত্থ তীণি অঙ্গানি.

৭৪৮-৭৫২. চতুত্থে আহটসপ্পিং দত্ৱাতি অত্তনো দত্ৱা. যমকং পচিতব্বন্তি সপ্পিঞ্চ তেলঞ্চ একতো কত্ৱা পচিতব্বং. লেসেন গহেতুকামতা, অঞ্ঞস্স ৱিঞ্ঞাপনং, পটিলাভোতি ইমানি পনেত্থ তীণি অঙ্গানি.

৭৫৩. পঞ্চমে সাতি থুল্লনন্দা. অযন্তি অযং সিক্খমানা. চেতাপেত্ৱাতি জানাপেত্ৱা ইচ্চেৱ অত্থোতি ইধ ৱুত্তং, মাতিকাট্ঠকথাযং (কঙ্খা. অট্ঠ. অঞ্ঞচেতাপনসিক্খাপদৱণ্ণনা) পন ‘‘অঞ্ঞং চেতাপেত্ৱাতি অত্তনো কপ্পিযভণ্ডেন ইদং নাম আহৰাতি অঞ্ঞং পৰিৱত্তাপেত্ৱা’’তি ৱুত্তং, তস্মা ‘‘চেতাপেত্ৱা’’তি ইমস্স পৰিৱত্তাপেত্ৱাতিপি অত্থো দট্ঠব্বো. অঞ্ঞং চেতাপেয্যাতি ‘‘এৱং মে ইদং দত্ৱা অঞ্ঞম্পি আহৰিস্সতী’’তি মঞ্ঞমানা ‘‘ন মে ইমিনা অত্থো, ইদং নাম মে আহৰা’’তি ততো অঞ্ঞং চেতাপেয্য.

৭৫৮. ছট্ঠে ধম্মকিচ্চন্তি পুঞ্ঞকম্মং. পাৱাৰিকস্সাতি দুস্সৱাণিজকস্স. যায চেতাপিতং, তস্সাযেৱ নিস্সগ্গিযং নিস্সট্ঠপটিলাভো চ, তস্মা তায ভিক্খুনিযা নিস্সট্ঠং পটিলভিত্ৱা যথাদানে উপনেতব্বং, ন অত্তনা গহেতব্বং. অঞ্ঞস্সত্থাযাতি চীৱৰাদীসু অঞ্ঞতৰস্সত্থায. অঞ্ঞুদ্দিসিকেনাতি পুৰিমস্সেৱত্থদীপনং. পৰিক্খাৰেনাতি কপ্পিযভণ্ডেন.

৭৬৪. সত্তমে সযং যাচিতকেনাতি সযং যাচিতকেনাপীতি অত্থো. তেনেৱ পাড়িযং ‘‘তেন চ পৰিক্খাৰেন সযম্পি যাচিত্ৱা’’তি ৱুত্তং, ততোযেৱ মাতিকাট্ঠকথাযং ‘‘সঞ্ঞাচিকেনাতি সযং যাচিতকেনাপী’’তি অত্থো ৱুত্তো.

৭৬৮-৭৭৩. অট্ঠমনৱমদসমানি উত্তানত্থানেৱ.

৭৮৪. একাদসমে যস্মা পৱাৰিতট্ঠানে ৱিঞ্ঞত্তি নাম ন পটিসেধেতব্বা, তস্মা ভগৱা ধম্মনিমন্তনৱসেন পৱাৰিতট্ঠানে ‘‘ৱদেয্যাসি যেনত্থো’’তি ৱুত্তায ‘‘চতুক্কংসপৰমং ৱিঞ্ঞাপেতব্ব’’ন্তি পৰিচ্ছেদং দস্সেতীতি ৱেদিতব্বং. তেনেৱ মাতিকাট্ঠকথাযং (কঙ্খা. অট্ঠ. গৰুপাৱুৰণসিক্খাপদৱণ্ণনা) ‘‘চেতাপেতব্বন্তি ঠপেত্ৱা সহধম্মিকে চ ঞাতকপৱাৰিতে চ অঞ্ঞেন কিস্মিঞ্চিদেৱ গুণে পৰিতুট্ঠেন ৱদেয্যাসি যেনত্থোতি ৱুত্তায ৱিঞ্ঞাপেতব্ব’’ন্তি ৱুত্তং.

৭৮৮. দ্ৱাদসমং উত্তানত্থমেৱ.

ভিক্খুনীৱিভঙ্গে নিস্সগ্গিযপাচিত্তিযসিক্খাপদৱণ্ণনা নিট্ঠিতা.

নিস্সগ্গিযকণ্ডং নিট্ঠিতং.