২. সঙ্ঘাদিসেসকণ্ডং (ভিক্খুনীৱিভঙ্গৱণ্ণনা)

১. পঠমসঙ্ঘাদিসেসসিক্খাপদৱণ্ণনা

৬৭৯. সঙ্ঘাদিসেসকণ্ডস্স পঠমসিক্খাপদে দ্ৱীসু জনেসূতি অড্ডকাৰকেসু দ্ৱীসু জনেসু. যো কোচীতি তেসুযেৱ দ্ৱীসু যো কোচি, অঞ্ঞো ৱা তেহি আণত্তো. দুতিযস্স আৰোচেতীতি এত্থাপি দ্ৱীসু জনেসু যস্স কস্সচি দুতিযস্স কথং যো কোচি আৰোচেতীতি এৱমত্থো গহেতব্বোতি আহ ‘‘দুতিযস্স আৰোচেতীতি এত্থাপি এসেৱ নযো’’তি. গতিগতন্তি চিৰকালপৱত্তং.

আপত্তীতি আপজ্জনং. সহ ৱত্থুজ্ঝাচাৰাতি ৱত্থুৱীতিক্কমেন সহ. সহযোগে কৰণৱচনপ্পসঙ্গে ইদং নিস্সক্কৱচনং. যন্তি যং ধম্মং. নিস্সাৰেতীতি আপন্নং ভিক্খুনিসঙ্ঘম্হা নিস্সাৰেতি. হেতুম্হি চাযং কত্তুৱোহাৰো. নিস্সাৰণহেতুভূতো হি ধম্মো নিস্সাৰণীযোতি ৱুত্তো. গীৱাযেৱ হোতি, ন পাৰাজিকং অনাণত্তিযা গহিতত্তা. যথা দাসদাসীৱাপীআদীনি সম্পটিচ্ছিতুং ন ৱট্টতি, এৱং তেসং অত্থায অড্ডকৰণম্পি ন ৱট্টতীতি আহ ‘‘অযং অকপ্পিযঅড্ডো নাম, ন ৱট্টতী’’তি.

এত্থ চ সচে অধিকৰণট্ঠানং গন্ত্ৱা ‘‘অম্হাকং এসো দাসো, দাসী, ৱাপী, খেত্তং, আৰামো, আৰামৱত্থু, গাৱো, অজা, কুক্কুটা’’তিআদিনা ৱোহৰতি, অকপ্পিযং. ‘‘অযং অম্হাকং আৰামিকো, অযং ৱাপী ইত্থন্নামেন সঙ্ঘস্স ভণ্ডধোৱনত্থায দিন্না, ইতো খেত্ততো আৰামতো উপ্পজ্জনকচতুপচ্চযা ইতো গাৱিতো মহিংসিতো অজাতো উপ্পজ্জনকগোৰসা ইত্থন্নামেন সঙ্ঘস্স দিন্নাতি পুচ্ছিতে ৱা অপুচ্ছিতে ৱা ৱত্তুং ৱট্টতী’’তি ৱদন্তি. সেসমেত্থ উত্তানমেৱ. অনাকড্ঢিতায অড্ডকৰণং, অড্ডপৰিযোসানন্তি ইমানি পনেত্থ দ্ৱে অঙ্গানি.

পঠমসঙ্ঘাদিসেসসিক্খাপদৱণ্ণনা নিট্ঠিতা.

২. দুতিযসঙ্ঘাদিসেসসিক্খাপদৱণ্ণনা

৬৮৩. দুতিযে মল্লগণভটিপুত্তগণাদিকন্তিআদীসু মল্লগণো নাম নাৰাযনভত্তিকো তত্থ তত্থ পানীযট্ঠপনপোক্খৰণীখণনাদিপুঞ্ঞকম্মকাৰকো গণো, ভটিপুত্তগণো নাম কুমাৰভত্তিকগণো. ধম্মগণোতি সাসনভত্তিগণো অনেকপ্পকাৰপুঞ্ঞকম্মকাৰকগণো ৱুচ্চতি. গন্ধিকসেণীতি অনেকপ্পকাৰসুগন্ধিৱিকতিকাৰকো গণো. দুস্সিকসেণীতি পেসকাৰকগণো. কপ্পগতিকন্তি কপ্পিযভাৱং গতং.

ৱুট্ঠাপেন্তিযাতি উপসম্পাদেন্তিযা. ‘‘চোৰিং ৱুত্তনযেন অনাপুচ্ছা পব্বাজেন্তিযা দুক্কট’’ন্তি ৱদন্তি. পণ্ণত্তিং অজানন্তা অৰিযাপি ৱুট্ঠাপেন্তীতি ৱা কম্মৱাচাপৰিযোসানে আপত্তিক্খণে ৱিপাকাব্যাকতসমঙ্গিতাৱসেন ৱা ‘‘তিচিত্ত’’ন্তি ৱুত্তন্তি ৱেদিতব্বং. সেসমেত্থ উত্তানমেৱ. চোৰিতা, চোৰিসঞ্ঞা, অঞ্ঞত্ৰ অনুঞ্ঞাতকাৰণা ৱুট্ঠাপনন্তি ইমানি পনেত্থ তীণি অঙ্গানি.

দুতিযসঙ্ঘাদিসেসসিক্খাপদৱণ্ণনা নিট্ঠিতা.

৩. ততিযসঙ্ঘাদিসেসসিক্খাপদৱণ্ণনা

৬৯২. ততিযে পৰিক্খেপং অতিক্কামেন্তিযাতি সকগামতো অঞ্ঞস্স গামস্স পৰিক্খেপং অতিক্কামেন্তিযা. ‘‘গামন্তৰং গচ্ছেয্যা’’তি হি ৱচনতো অঞ্ঞস্স গামস্স পৰিক্খেপং অতিক্কামেন্তিযা এৱ আপত্তি, ন সকগামস্স. অঞ্ঞো হি গামো গামন্তৰং. অপৰিক্খিত্তস্স গামস্স উপচাৰন্তি এত্থ উপচাৰ-সদ্দেন ঘৰূপচাৰতো পঠমলেড্ডুপাতসঙ্খাতং পৰিক্খেপাৰহট্ঠানং গহিতং, ন ততো দুতিযলেড্ডুপাতসঙ্খাতো উপচাৰোতি আহ ‘‘পৰিক্খেপাৰহট্ঠান’’ন্তি. তেনেৱ পাড়িযং ‘‘উপচাৰং অতিক্কামেন্তিযা’’তি ৱুত্তং. অঞ্ঞথা যথা ৱিকালগামপ্পৱিসনসিক্খাপদে ‘‘পৰিক্খিত্তস্স গামস্স পৰিক্খেপং অতিক্কমন্তস্স, অপৰিক্খিত্তস্স গামস্স উপচাৰং ওক্কমন্তস্সা’’তি (পাচি. ৫১৩) ৱুত্তং, এৱমিধাপি ‘‘পৰিক্খিত্তস্স গামস্স পৰিক্খেপং অতিক্কামেন্তিযা অপৰিক্খিত্তস্স গামস্স উপচাৰং ওক্কমন্তিযা’’তি ৱদেয্য. সঙ্খেপতো ৱুত্তমত্থং ৱিভজিত্ৱা দস্সেন্তো ‘‘অপিচেত্থা’’তিআদিমাহ. ৱিহাৰস্স চতুগামসাধাৰণত্তাতি ইমিনা ‘‘ৱিহাৰতো একং গামং গন্তুং ৱট্টতী’’তি এত্থ কাৰণমাহ. ৱিহাৰস্স চতুগামসাধাৰণত্তাযেৱ হি চতূসু গামেসু যংকিঞ্চি একং গামং গন্তুং ৱট্টতি.

যত্থাতি যস্সং নদিযং. ‘‘পঠমং পাদং উত্তাৰেন্তিযা আপত্তি থুল্লচ্চযস্স, দুতিযং পাদং উত্তাৰেন্তিযা আপত্তি সঙ্ঘাদিসেসস্সা’’তি ৱচনতো নদিং ওতৰিত্ৱা পদসা উত্তৰন্তিযা এৱ আপত্তীতি আহ ‘‘সেতুনা গচ্ছতি, অনাপত্তী’’তিআদি. পৰতীৰমেৱ অক্কমন্তিযা অনাপত্তীতি নদিং অনোতৰিত্ৱা যাননাৱাদীসু অঞ্ঞতৰেন গন্ত্ৱা পৰতীৰমেৱ অক্কমন্তিযা অনাপত্তি. উভযতীৰেসু ৱিচৰন্তি, ৱট্টতীতি ইদং অসতিপি নদীপাৰগমনে উপৰি ৱক্খমানস্স ৱিনিচ্ছযস্স ফলমত্তদস্সনত্থং ৱুত্তন্তি ৱেদিতব্বং. ওৰিমতীৰমেৱ আগচ্ছতি, আপত্তীতি পৰতীৰং গন্তুকামতায ওতিণ্ণত্তা ৱুত্তং. তমেৱ তীৰন্তি তমেৱ ওৰিমতীৰং. অনাপত্তীতি পৰতীৰং গন্তুকামতায অভাৱতো অনাপত্তি.

তাদিসে অৰঞ্ঞেতি ‘‘বহিইন্দখীলা সব্বমেতং অৰঞ্ঞ’’ন্তি (ৱিভ. ৫২৯) এৱং ৱুত্তলক্খণে অৰঞ্ঞে. অথ তাদিসস্সেৱ অৰঞ্ঞস্স গহিতভাৱো কথং ৱিঞ্ঞাযতীতি আহ ‘‘তেনেৱা’’তিআদি. ইমিনা হি অট্ঠকথাৱচনেন ঈদিসেপি গামসমীপে দস্সনূপচাৰে ৱিজহিতে সতিপি সৱনূপচাৰে আপত্তি হোতীতি ৱিঞ্ঞাযতি. মগ্গমূড়্হা উচ্চাসদ্দং কৰোন্তীতি আহ ‘‘মগ্গমূড়্হসদ্দেন ৱিযা’’তি. সদ্দাযন্তিযাতি সদ্দং কৰোন্তিযা. পুৰিমাযোতি পুৰেতৰং গচ্ছন্তিযো. অঞ্ঞং মগ্গং গণ্হাতীতি মগ্গমূড়্হত্তা, ন ওহাতুং, তস্মা দ্ৱিন্নম্পি অনাপত্তি. সেসমেত্থ উত্তানমেৱ. অনন্তৰাযেন একভাৱো, গামন্তৰগমনাদীসু অঞ্ঞতৰতাপজ্জনং, আপদায অভাৱোতি ইমানি পনেত্থ তীণি অঙ্গানি.

ততিযসঙ্ঘাদিসেসসিক্খাপদৱণ্ণনা নিট্ঠিতা.

৪. চতুত্থসঙ্ঘাদিসেসসিক্খাপদৱণ্ণনা

৬৯৪. চতুত্থে কাৰকগণস্সাতি উক্খেপনীযকম্মকাৰকগণস্স. তেচত্তালীসপ্পভেদং ৱত্তং খন্ধকে আৱি ভৱিস্সতি. নেত্থাৰৱত্তেতি নিত্থৰণহেতুম্হি ৱত্তে. সেসং উত্তানমেৱ. ধম্মেন কম্মেন উক্খিত্ততা, অঞ্ঞত্ৰ অনুঞ্ঞাতকাৰণা ওসাৰণন্তি ইমানি পনেত্থ দ্ৱে অঙ্গানি.

চতুত্থসঙ্ঘাদিসেসসিক্খাপদৱণ্ণনা নিট্ঠিতা.

৫. পঞ্চমসঙ্ঘাদিসেসসিক্খাপদৱণ্ণনা

৭০১. পঞ্চমে এতং ন ৱুত্তন্তি ‘‘ভিক্খুনিযা অৱস্সুতভাৱো দট্ঠব্বো’’তি এতং নিযমনং ন ৱুত্তং. তন্তি তং নিযমেত্ৱা অৱচনং. পাড়িযা সমেতীতি ‘‘একতো অৱস্সুতে’’তি অৱিসেসেত্ৱা ৱুত্তপাড়িযা ‘‘অনৱস্সুতোতি জানন্তী পটিগ্গণ্হাতী’’তি ইমায চ পাড়িযা সমেতি. যদি হি পুগ্গলস্স অৱস্সুতভাৱো নপ্পমাণং, কিং ‘‘অনৱস্সুতোতি জানন্তী’’তি ইমিনা ৱচনেন, ‘‘অনাপত্তি উভতোঅনৱস্সুতা হোন্তি, অনৱস্সুতা পটিগ্গণ্হাতী’’তি এত্তকমেৱ ৱত্তব্বং সিযা. ‘‘উভতোঅনৱস্সুতা হোন্তি, অনৱস্সুতোতি জানন্তী পটিগ্গণ্হাতী’’তি ইমস্স চ অনাপত্তিৱাৰস্স অযমত্থো. উভো চে অনৱস্সুতা, সব্বথাপি অনাপত্তি. অথ ভিক্খুনী অনৱস্সুতা সমানা অৱস্সুতম্পি ‘‘অনৱস্সুতো’’তি সঞ্ঞায তস্স হত্থতো পটিগ্গণ্হাতি, এৱম্পি অনাপত্তি. অথ সযং অনৱস্সুতাপি অঞ্ঞং অনৱস্সুতং ৱা অৱস্সুতং ৱা ‘‘অৱস্সুতো’’তি জানাতি, দুক্কটমেৱ. ৱুত্তঞ্হেতং অনন্তৰসিক্খাপদে ‘‘কিস্স ত্ৱং অয্যে ন পটিগ্গণ্হাসীতি. অৱস্সুতা অয্যেতি. ত্ৱং পন অয্যে অৱস্সুতাতি. নাহং অয্যে অৱস্সুতা’’তি. সেসমেত্থ উত্তানমেৱ. উদকদন্তপোনতো অঞ্ঞং অজ্ঝোহৰণীযং, উভতোঅৱস্সুততা, সহত্থা গহণং, অজ্ঝোহৰণন্তি ইমানি পনেত্থ চত্তাৰি অঙ্গানি.

পঞ্চমসঙ্ঘাদিসেসসিক্খাপদৱণ্ণনা নিট্ঠিতা.

৬. ছট্ঠসঙ্ঘাদিসেসসিক্খাপদৱণ্ণনা

৭০৫. ছট্ঠে পৰিৱাৰগাথায অযমত্থো. ন দেতি ন পটিগ্গণ্হাতীতি (পৰি. অট্ঠ. ৪৮১) ন উয্যোজিকা দেতি, নাপি উয্যোজিতা তস্সা হত্থতো গণ্হাতি. পটিগ্গহো তেন ন ৱিজ্জতীতি তেনেৱ কাৰণেন উয্যোজিকায হত্থতো উয্যোজিতায পটিগ্গহো ন ৱিজ্জতি. আপজ্জতি গৰুকন্তি এৱং সন্তেপি অৱস্সুতস্স হত্থতো পিণ্ডগ্গহণে উয্যোজেন্তী সঙ্ঘাদিসেসাপত্তিং আপজ্জতি. তঞ্চ পৰিভোগপচ্চযাতি তঞ্চ পন আপত্তিং আপজ্জমানা তস্সা উয্যোজিতায পৰিভোগপচ্চযা আপজ্জতি. তস্সা হি ভোজনপৰিযোসানে উয্যোজিকায সঙ্ঘাদিসেসো হোতি. সেসমেত্থ উত্তানমেৱ. মনুস্সপুৰিসতা, অঞ্ঞত্ৰ অনুঞ্ঞাতকাৰণা খাদনীযং ভোজনীযং গহেত্ৱা ভুঞ্জাতি উয্যোজনা, তেন ৱচনেন গহেত্ৱা ইতৰিস্সা ভোজনপৰিযোসানন্তি ইমানি পনেত্থ তীণি অঙ্গানি.

ছট্ঠসঙ্ঘাদিসেসসিক্খাপদৱণ্ণনা নিট্ঠিতা.

৭. সত্তমসঙ্ঘাদিসেসসিক্খাপদৱণ্ণনা

৭০৯. সত্তমে কিন্নুমাৱ সমণিযোতি কিং নু ইমা এৱ সমণিযো. তাসাহন্তি তাসং অহং. সেসং উত্তানমেৱ.

সত্তমসঙ্ঘাদিসেসসিক্খাপদৱণ্ণনা নিট্ঠিতা.

৭১৫. অট্ঠমং উত্তানত্থমেৱ.

৯. নৱমসঙ্ঘাদিসেসসিক্খাপদৱণ্ণনা

৭২১. নৱমে ৱজ্জপ্পটিচ্ছাদিকাতি খুদ্দানুখুদ্দকৱজ্জস্স পটিচ্ছাদিকা. সমনুভাসনকম্মকালে চেত্থ দ্ৱে তিস্সো একতো সমনুভাসিতব্বা.

নৱমসঙ্ঘাদিসেসসিক্খাপদৱণ্ণনা নিট্ঠিতা.

৭২৭. দসমং উত্তানত্থমেৱ.

ভিক্খুনীৱিভঙ্গে সঙ্ঘাদিসেসৱণ্ণনা নিট্ঠিতা.

সঙ্ঘাদিসেসকণ্ডং নিট্ঠিতং.