সেদমোচনগাথা

অৱিপ্পৱাসাদিপঞ্হৱণ্ণনা

৪৭৯. সেদমোচনগাথাসু তহিন্তি তস্মিং পুগ্গলে. ‘‘অকপ্পিযসম্ভোগো নাম মেথুনধম্মাদী’’তি গণ্ঠিপদেসু ৱুত্তং. এসা পঞ্হা কুসলেহি চিন্তিতাতি লিঙ্গৱিপল্লাসৱসেনেতং ৱুত্তং, এসো পঞ্হো কুসলেহি চিন্তিতোতি অত্থো.

দসাতি অৱন্দিযে দস. একাদসাতি পণ্ডকাদযো একাদস. উব্ভক্খকে ন ৱদামীতি ইমিনা মুখে মেথুনধম্মাভাৱং দীপেতি. অধোনাভিং ৱিৱজ্জিযাতি ইমিনা ৱচ্চমগ্গপস্সাৱমগ্গেসু.

গামন্তৰপৰিযাপন্নং নদীপাৰং ওক্কন্তভিক্খুনিং সন্ধাযাতি এত্থ নদী ভিক্খুনিযা গামপৰিযাপন্না, পৰতীৰং গামন্তৰপৰিযাপন্নং. তত্থ পৰতীৰে পঠমলেড্ডুপাতপ্পমাণো গামূপচাৰো নদীপৰিযন্তেন পৰিচ্ছিন্নো, তস্মা পৰতীৰে ৰতনমত্তম্পি অৰঞ্ঞং নত্থি, পৰতীৰঞ্চ তিণাদীহি পটিচ্ছন্নত্তা দস্সনূপচাৰৱিৰহিতং কৰোতি. তত্থ অত্তনো গামে আপত্তি নত্থি, পৰতীৰে পন পঠমলেড্ডুপাতসঙ্খাতে গামূপচাৰেযেৱ পাদং ঠপেতি. অন্তৰে অভিধম্মে ৱুত্তনযেন অৰঞ্ঞভূতং সকগামং অতিক্কমতি নাম, তস্মা গণম্হা ওহীযনা নাম হোতীতি ৱেদিতব্বং.

ভিক্খূনং সন্তিকে একতোউপসম্পন্না নাম মহাপজাপতিপমুখা পঞ্চসতসাকিনিযো ভিক্খুনিযো. মহাপজাপতিপি হি আনন্দত্থেৰেন দিন্নওৱাদস্স পটিগ্গহিতত্তা ভিক্খূনং সন্তিকে উপসম্পন্না নাম.

পাৰাজিকাদিপঞ্হৱণ্ণনা

৪৮০. সহ দুস্সেন মেথুনৱীতিক্কমস্স সক্কুণেয্যতায ‘‘দুস্সকুটিআদীনি সন্ধাযা’’তি ৱুত্তং. লিঙ্গপৰিৱত্তং সন্ধায ৱুত্তাতি ‘‘লিঙ্গপৰিৱত্তে সতি পটিগ্গহণস্স ৱিজহনতো সামং গহেত্ৱা ভুঞ্জিতুং ন ৱট্টতী’’তি লিঙ্গপৰিৱত্তনং সন্ধায ৱুত্তা.

৪৮১. সুপ্পতিট্ঠিতনিগ্ৰোধসদিসন্তি যোজনদ্ৱিযোজনাদিপৰমং মহানিগ্ৰোধং সন্ধায ৱুত্তং.

সেদমোচনগাথাৱণ্ণনা নিট্ঠিতা.