১. পৰিমণ্ডলৱগ্গৱণ্ণনা

সেখিযেসু সিক্খিতসিক্খেনাতি চতূহি মগ্গেহি তিস্সো সিক্খা সিক্খিত্ৱা ঠিতেন, সব্বসো পৰিনিট্ঠিতকিচ্চেনাতি ৱুত্তং হোতি. তাদিনাতি অট্ঠহি লোকধম্মেহি অকম্পিযট্ঠেন তাদিনা.

৫৭৬. সিক্খা কৰণীযাতি ‘‘এৱং নিৱাসেস্সামী’’তি আৰামেপি অন্তৰঘৰেপি সব্বত্থ সিক্খা কত্তব্বা. এত্থ চ যস্মা ৱত্তক্খন্ধকে ৱুত্তৱত্তানিপি সিক্খিতব্বত্তা সেখিযানেৱ হোন্তি, তস্মা পাৰাজিকাদীসু ৱিয পৰিচ্ছেদো ন কতো, চাৰিত্তনযদস্সনত্থঞ্চ ‘‘যো পন ভিক্খু ওলম্বেন্তো নিৱাসেয্য, দুক্কট’’ন্তি এৱং আপত্তিনামেন অৱত্ৱা ‘‘সিক্খা কৰণীযা’’তি এৱং সব্বসিক্খাপদেসু পাড়ি আৰোপিতা. পদভাজনে পন ‘‘আপত্তি দুক্কটস্সা’’তি ৱুত্তত্তা সব্বত্থ অনাদৰিযকৰণে দুক্কটং ৱেদিতব্বং. ৱুত্তন্তি মহাঅট্ঠকথাযং ৱুত্তং. যস্মা অট্ঠঙ্গুলমত্তং ওতাৰেত্ৱা নিৱত্থমেৱ নিসিন্নস্স চতুৰঙ্গুলমত্তং হোতি, তস্মা উভোপেতে অট্ঠকথাৱাদা একপৰিচ্ছেদা. তে সব্বেতি নিৱাসনদোসা.

তং পনাতি তং অনাদৰিযং. কিঞ্চাপি কুৰুন্দিৱাদং পচ্ছা ৱদন্তেন ‘‘পৰিমণ্ডলং নিৱাসেতুং অজানন্তস্স অনাপত্তী’’তি অযমত্থো পতিট্ঠাপিতো, তথাপি নিৱাসনৱত্তং সাধুকং উগ্গহেতব্বমেৱ. সঞ্চিচ্চ অনুগ্গণ্হন্তস্স অনাদৰিযং সিযা. তেনেৱ মাতিকাট্ঠকথাযং (কঙ্খা. অট্ঠ. পৰিমণ্ডলসিক্খাপদৱণ্ণনা) ৱুত্তং ‘‘অজানন্তস্সাতি পৰিমণ্ডলং নিৱাসেতুং অজানন্তস্স অনাপত্তি, অপিচ নিৱাসনৱত্তং উগ্গহেতব্ব’’ন্তি.

সচিত্তকন্তি ৱত্থুৱিজাননচিত্তেন পণ্ণত্তিৱিজাননচিত্তেন চ সচিত্তকং ‘‘অনাদৰিযং পটিচ্চা’’তি ৱুত্তত্তা. ‘‘পাণাতিপাতাদি ৱিয নিৱাসনদোসো লোকগৰহিতো ন হোতীতি পণ্ণত্তিৱজ্জ’’ন্তি ফুস্সদেৱত্থেৰো আহ. উপতিস্সত্থেৰো পন ‘‘যস্মা অনাদৰিযৱসেনেৱ আপজ্জিতব্বত্তা কেৱলং অকুসলমেৱ, তঞ্চ পকতিযা ৱজ্জং, সঞ্চিচ্চ ৱীতিক্কমনঞ্চ দোমনস্সিতস্সেৱ হোতি, তস্মা লোকৱজ্জং অকুসলচিত্তং দুক্খৱেদন’’ন্তি আহ. অনাদৰিযং, অনাপত্তিকাৰণাভাৱো, অপৰিমণ্ডলনিৱাসনন্তি ইমানি পনেত্থ তীণি অঙ্গানি. যথা চেত্থ, এৱং সব্বত্থ পুৰিমানি দ্ৱে তত্থ তত্থ ৱুত্তপটিপক্খকৰণঞ্চাতি তীণিযেৱ হোন্তি.

৫৭৭. দুতিযাদীসু অনেকপ্পকাৰং গিহিপাৰুতন্তি সেতপটপাৰুতং পৰিব্বাজকপাৰুতং একসাটকপাৰুতন্তিআদি অনেকপ্পভেদং গিহিপাৰুতং. তস্সত্থো খন্ধকেযেৱ আৱি ভৱিস্সতি. ৱিহাৰেপীতি বুদ্ধুপট্ঠানাদিকালং সন্ধায ৱুত্তং.

৫৭৮. ‘‘সুপ্পটিচ্ছন্নো’’তি ৱুত্তত্তা ‘‘সসীসং পাৰুতো সব্বথা সুপ্পটিচ্ছন্নত্তা সুপ্পটিচ্ছন্নো নাম হোতী’’তি যস্স সিযা, তং সন্ধাযাহ ‘‘ন সসীসং পাৰুতেনা’’তিআদি.

৫৮২. একস্মিং পন ঠানে ঠত্ৱাতি এত্থ ‘‘গচ্ছন্তোপি পৰিস্সযাভাৱং ওলোকেতুং লভতিযেৱ, তথা গামে পূজ’’ন্তি তীসুপি গণ্ঠিপদেসু ৱুত্তং.

পৰিমণ্ডলৱগ্গৱণ্ণনা নিট্ঠিতা.