৩. সমুচ্চযক্খন্ধকং

সুক্কৱিস্সট্ঠিকথাৱণ্ণনা

৯৭. সমুচ্চযক্খন্ধকে ৱুত্তনযেন ৱত্তং সমাদাতব্বন্তি পাৰিৱাসিকক্খন্ধকৱণ্ণনাযং ৱুত্তনযেন দ্ৱীহি পদেহি একেন ৱা সমাদাতব্বং. ৱেদিযামীতি চিত্তেন সম্পটিচ্ছিত্ৱা সুখং অনুভৱামি, ন তপ্পচ্চযা অহং দুক্খিতোতি অধিপ্পাযো. ৱুত্তনযেনেৱ সঙ্ঘমজ্ঝে নিক্খিপিতব্বন্তি পাৰিৱাসিকক্খন্ধকে ৱুত্তনযেন ‘‘মানত্তং নিক্খিপামি, ৱত্তং নিক্খিপামী’’তি ইমেহি দ্ৱীহি একেন ৱা নিক্খিপিতব্বং. তস্স আৰোচেত্ৱা নিক্খিপিতব্বন্তি অনাৰোচনেন ৱত্তভেদদুক্কটপৰিমোচনত্থং ৱুত্তং. দ্ৱে লেড্ডুপাতে অতিক্কমিত্ৱাতি ভিক্খূনং সজ্ঝাযনসদ্দসৱনূপচাৰৱিজহনত্থং ৱুত্তং, মহামগ্গতো ওক্কম্মাতি মগ্গপ্পটিপন্নভিক্খূনং উপচাৰৱিজহনত্থং, গুম্বেন ৱা ৱতিযা ৱা পটিচ্ছন্নট্ঠানেতি দস্সনূপচাৰৱিজহনত্থং. অনিক্খিত্তৱত্তেন অন্তোউপচাৰগতানং সব্বেসম্পি আৰোচেতব্বত্তা ‘‘অযং নিক্খিত্তৱত্তস্স পৰিহাৰো’’তি ৱুত্তং. তত্থ নিক্খিত্তৱত্তস্সাতি ৱত্তং নিক্খিপিত্ৱা পৰিৱসন্তস্সাতি অত্থো. অযং পনেত্থ থেৰস্স অধিপ্পাযো – ৱত্তং নিক্খিপিত্ৱা পৰিৱসন্তস্স উপচাৰগতানং সব্বেসং আৰোচনকিচ্চং নত্থি, দিট্ঠৰূপানং সুতসদ্দানং আৰোচেতব্বং, অদিট্ঠঅসুতানম্পি অন্তোদ্ৱাদসহত্থগতানং আৰোচেতব্বং. ইদং ৱত্তং নিক্খিপিত্ৱা পৰিৱসন্তস্স লক্খণন্তি.

পৰিৱাসকথাৱণ্ণনা

১০২. ‘‘সতিযেৱ অন্তৰাযে অন্তৰাযিকসঞ্ঞী ছাদেতি, অচ্ছন্না হোতি. অন্তৰাযিকস্স পন অনন্তৰাযিকসঞ্ঞায ছাদযতো অচ্ছন্নাৱা’’তিপি পাঠো. অৱেৰীতি হিতকামো. উদ্ধস্তে অৰুণেতি উট্ঠিতে অৰুণে. সুদ্ধস্স সন্তিকেতি সভাগসঙ্ঘাদিসেসং অনাপন্নস্স সন্তিকে. ৱত্থুন্তি অসুচিমোচনাদিৱীতিক্কমং.

সুক্কৱিস্সট্ঠীতি ৱত্থু চেৱ গোত্তঞ্চাতি সুক্কৱিস্সট্ঠীতি ইদং অসুচিমোচনলক্খণস্স ৱীতিক্কমস্স পকাসনতো ৱত্থু চেৱ হোতি, সজাতিযসাধাৰণৱিজাতিযৱিনিৱত্তসভাৱায সুক্কৱিস্সট্ঠিযা এৱ পকাসনতো গোত্তঞ্চ হোতীতি অত্থো. গং তাযতীতি হি গোত্তং. সঙ্ঘাদিসেসোতি নামঞ্চেৱ আপত্তি চাতি সঙ্ঘাদিসেসোতি তেন তেন ৱীতিক্কমেন আপন্নস্স আপত্তিনিকাযস্স নামপ্পকাসনতো নামঞ্চেৱ হোতি আপত্তিসভাগত্তা আপত্তি চ.

তদনুৰূপং কম্মৱাচং কত্ৱা মানত্তং দাতব্বন্তি –

‘‘সুণাতু মে, ভন্তে, সঙ্ঘো, অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৱিস্সট্ঠিং একাহপটিচ্ছন্নং, সো সঙ্ঘং একিস্সা আপত্তিযা সঞ্চেতনিকায সুক্কৱিস্সট্ঠিযা একাহপটিচ্ছন্নায একাহপৰিৱাসং যাচি. সঙ্ঘো ইত্থন্নামস্স ভিক্খুনো একিস্সা আপত্তিযা সঞ্চেতনিকায সুক্কৱিস্সট্ঠিযা একাহপটিচ্ছন্নায একাহপৰিৱাসং অদাসি. সো পৰিৱুত্থপৰিৱাসো. অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৱিস্সট্ঠিং অপ্পটিচ্ছন্নং, সো সঙ্ঘং তাসং আপত্তীনং সঞ্চেতনিকানং সুক্কৱিস্সট্ঠীনং পটিচ্ছন্নায চ অপ্পটিচ্ছন্নায চ ছাৰত্তং মানত্তং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো দ্ৱিন্নং আপত্তীনং সঞ্চেতনিকানং সুক্কৱিস্সট্ঠীনং পটিচ্ছন্নায চ অপ্পটিচ্ছন্নায চ ছাৰত্তং মানত্তং দদেয্য, এসা ঞত্তি.

সুণাতু মে, ভন্তে…পে… সো পৰিৱুত্থপৰিৱাসো. অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৱিস্সট্ঠিং অপ্পটিচ্ছন্নং, সো সঙ্ঘং তাসং…পে… যাচতি. সঙ্ঘো ইত্থন্নামস্স ভিক্খুনো দ্ৱিন্নং আপত্তীনং সঞ্চেতনিকানং সুক্কৱিস্সট্ঠীনং পটিচ্ছন্নায চ অপ্পটিচ্ছন্নায চ ছাৰত্তং মানত্তং দেতি. যস্সাযস্মতো খমতি ইত্থন্নামস্স ভিক্খুনো দ্ৱিন্নং আপত্তীনং সঞ্চেতনিকানং সুক্কৱিস্সট্ঠীনং পটিচ্ছন্নায চ অপ্পটিচ্ছন্নায চ ছাৰত্তং মানত্তস্স দানং, সো তুণ্হস্স. যস্স নক্খমতি, সো ভাসেয্য.

দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে…

দিন্নং সঙ্ঘেন ইত্থন্নামস্স ভিক্খুনো দ্ৱিন্নং আপত্তীনং সঞ্চেতনিকানং সুক্কৱিস্সট্ঠীনং পটিচ্ছন্নায চ অপ্পটিচ্ছন্নায চ ছাৰত্তং মানত্তং, খমতি সঙ্ঘস্স, তস্মা তুণ্হী. এৱমেতং ধাৰযামীতি –

এৱং কম্মৱাচং কত্ৱা মানত্তং দাতব্বং. চিণ্ণমানত্তস্স চ ইমিনাৱ নযেন কম্মৱাচং যোজেত্ৱা অব্ভানং কাতব্বং.

অঞ্ঞস্মিন্তি সুদ্ধন্তপৰিৱাসৱসেন আপত্তিৱুট্ঠানতো অঞ্ঞস্মিং. দসসতং আপত্তিযো ৰত্তিসতং ছাদযিত্ৱাতি যোজেতব্বং.

পৰিৱাসকথাৱণ্ণনা নিট্ঠিতা.

অত্তনো সীমং সোধেত্ৱা ৱিহাৰসীমাযাতি ৱিহাৰে বদ্ধসীমমেৱ সন্ধায ৱুত্তং. ৱিহাৰূপচাৰতোপি দ্ৱে লেড্ডুপাতা অতিক্কমিতব্বাতি ভিক্খুৱিহাৰং সন্ধায ৱদতি গামূপচাৰাতিক্কমেনেৱ ভিক্খুনীৱিহাৰূপচাৰাতিক্কমস্স সিদ্ধত্তা. ৱিহাৰস্স চাতি ভিক্খুৱিহাৰস্স. গামস্সাতি ন ৱুত্তন্তি গামস্স উপচাৰং মুঞ্চিতুং ৱট্টতীতি ন ৱুত্তং, তস্মা গামূপচাৰেপি ৱট্টতীতি অধিপ্পাযো.

তত্থেৱ ঠানং পচ্চাসীসন্তীতি ভিক্খূনং ঠানং পচ্চাসীসন্তি. পৰিৱাসৱত্তাদীনন্তি পৰিৱাসনিস্সযপটিপ্পস্সদ্ধিআদীনং. যুত্ততৰং দিস্সতীতি ইমিনা অনিক্খিত্তৱত্তভিক্খুনা ৱিয ভিক্খুনিযাপি অন্তোউপচাৰসীমগতানংযেৱ আৰোচেতব্বং, ন গামে ঠিতানম্পি গন্ত্ৱা আৰোচেতব্বন্তি দীপেতি. তস্মিং গামেতি যস্মিং গামে ভিক্খুনুপস্সযো হোতি, তস্মিং গামে. বহি উপচাৰসীমায ঠত্ৱাতি উপচাৰসীমতো বহি ঠত্ৱা. সম্মন্নিত্ৱা দাতব্বাতি এত্থ সম্মন্নিত্ৱা দিন্নায সহৱাসেপি ৰত্তিচ্ছেদো ন হোতি.

পটিচ্ছন্নপৰিৱাসকথাৱণ্ণনা

১০৮. ৱিসুং মানত্তং চৰিতব্বন্তি মূলাযপটিকস্সনং অকত্ৱা ৱিসুং কম্মৱাচায মানত্তং গহেত্ৱা চৰিতব্বং.

সুক্কৱিস্সট্ঠিকথাৱণ্ণনা নিট্ঠিতা.

অগ্ঘসমোধানপৰিৱাসকথাৱণ্ণনা

১৩৪. একাপত্তিমূলকন্তি ‘‘একা আপত্তি একাহপ্পটিচ্ছন্না, একা আপত্তি দ্ৱীহপ্পটিচ্ছন্না’’তিআদিনা ৱুত্তনযং সন্ধায ৱদতি. আপত্তিৱড্ঢনকন্তি ‘‘একা আপত্তি একাহপ্পটিচ্ছন্না, দ্ৱে আপত্তিযো দ্ৱীহপ্পটিচ্ছন্না’’তিআদিনা ৱুত্তং আপত্তিৱড্ঢনকনযং সন্ধায.

দ্ৱেভিক্খুৱাৰএকাদসকাদিকথাৱণ্ণনা

১৮১. থুল্লচ্চযাদীহি মিস্সকন্তি একৱত্থুম্হি পুব্বভাগে আপন্নথুল্লচ্চযদুক্কটেহি মিস্সকং. মক্খধম্মো নাম ছাদেতুকামতা.

১৮২. সম্বহুলা সঙ্ঘাদিসেসা আপত্তিযো আপজ্জতি পৰিমাণম্পীতিআদি জাতিৱসেনেকৱচনং, ভাৱনপুংসকনিদ্দেসো ৱা. সেসমেত্থ পাড়িতো অট্ঠকথাতো চ সুৱিঞ্ঞেয্যমেৱ.

সমুচ্চযক্খন্ধকৱণ্ণনা নিট্ঠিতা.