২. পাৰিৱাসিকক্খন্ধকং

পাৰিৱাসিকৱত্তকথাৱণ্ণনা

৭৫. পাৰিৱাসিকক্খন্ধকে নৱকতৰং পাৰিৱাসিকন্তি অত্তনো নৱকতৰং পাৰিৱাসিকং. পাৰিৱাসিকস্স হি অত্তনো নৱকতৰং পাৰিৱাসিকং ঠপেত্ৱা অঞ্ঞে মূলাযপটিকস্সনাৰহমানত্তাৰহমানত্তচাৰিকঅব্ভানাৰহাপি পকতত্তট্ঠানেযেৱ তিট্ঠন্তি. তেনাহ ‘‘অন্তমসো মূলাযপঅকস্সনাৰহাদীনম্পী’’তি. পাদে ঘংসেন্তি এতেনাতি পাদঘংসনং, সক্খৰকথলাদি. ‘‘অনুজানামি, ভিক্খৱে, তিস্সো পাদঘংসনিযো সক্খৰং কথলং সমুদ্দফেণক’’ন্তি (চূড়ৱ. ২৬৯) হি ৱুত্তং. সদ্ধিৱিহাৰিকাদীনম্পি সাদিযন্তস্সাতি সদ্ধিৱিহাৰিকানম্পি অভিৱাদনাদিং সাদিযন্তস্স. ‘‘মা মং গামপ্পৱেসনং আপুচ্ছথা’’তি ৱুত্তে অনাপুচ্ছাপি গামং পৱিসিতুং ৱট্টতি. যো যো ৱুড্ঢোতি পাৰিৱাসিকেসু ভিক্খূসু যো যো ৱুড্ঢো. নৱকতৰস্স সাদিতুন্তি পাৰিৱাসিকনৱকতৰস্স অভিৱাদনাদিং সাদিতুং.

তত্থেৱাতি সঙ্ঘনৱকট্ঠানেযেৱ. অত্তনো পাড়িযা পৱাৰেতব্বন্তি অত্তনো ৱস্সগ্গেন পত্তপাড়িযা পৱাৰেতব্বং, ন পন সব্বেসু পৱাৰিতেসূতি অত্থো. যদি পন ন গণ্হাতি ন ৱিস্সজ্জেতীতি যদি পুৰিমদিৱসে অত্তনো ন গণ্হাতি গহেত্ৱা চ ন ৱিস্সজ্জেতি. চতুস্সালভত্তন্তি ভোজনসালাযং পটিপাটিযা দিয্যমানভত্তং. হত্থপাসে ঠিতেনাতি দাযকস্স হত্থপাসে ঠিতেন.

৭৬. অঞ্ঞো সামণেৰো ন গহেতব্বোতি উপজ্ঝাযেন হুত্ৱা অঞ্ঞো সামণেৰো ন গহেতব্বো. উপজ্ঝং দত্ৱা গহিতসামণেৰাপীতি পকতত্তকালে উপজ্ঝং দত্ৱা গহিতসামণেৰাপি. লদ্ধসম্মুতিকেন আণত্তোপি গৰুধম্মেহি অঞ্ঞেহি ৱা ওৱদিতুং লভতীতি আহ ‘‘পটিবলস্স ৱা ভিক্খুস্স ভাৰো কাতব্বো’’তি. আগতা ভিক্খুনিযো ৱত্তব্বাতি সম্বন্ধো. সৱচনীযন্তি সদোসং. জেট্ঠকট্ঠানং ন কাতব্বন্তি পধানট্ঠানং ন কাতব্বং. কিং তন্তি আহ ‘‘পাতিমোক্খুদ্দেসকেন ৱা’’তিআদি.

ৰজেহি হতা উপহতা ভূমি এতিস্সাতি ৰজোহতভূমি, ৰজোকিণ্ণভূমীতি অত্থো. পচ্চযন্তি ৱস্সাৱাসিকলাভং সন্ধায ৱুত্তং. একপস্সে ঠত্ৱাতি পাড়িং ৱিহায ভিক্খূনং পচ্ছতো ঠত্ৱা. সেনাসনং ন লভতীতি সেয্যাপৰিযন্তভাগিতায ৱস্সগ্গেন গণ্হিতুং ন লভতি. অস্সাতি ভৱেয্য. ‘‘আগন্তুকেন আৰোচেতব্বং, আগন্তুকস্স আৰোচেতব্ব’’ন্তি অৱিসেসেন ৱুত্তত্তা সচে দ্ৱে পাৰিৱাসিকা গতট্ঠানে অঞ্ঞমঞ্ঞং পস্সন্তি, উভোহিপি অঞ্ঞমঞ্ঞস্স আৰোচেতব্বং. যথা বহি দিস্ৱা আৰোচিতস্স ভিক্খুনো ৱিহাৰং আগতে পুন আৰোচনকিচ্চং নত্থি, এৱং অঞ্ঞং ৱিহাৰং গতেনপি তত্থ পুব্বে আৰোচিতস্স পুন আৰোচনকিচ্চং নত্থীতি ৱদন্তি.

৮১. অৱিসেসেনাতি পাৰিৱাসিকস্স উক্খিত্তকস্স চ অৱিসেসেন. ওবদ্ধন্তি পলিবুদ্ধং.

৮৩. সহৱাসোতি ৱুত্তপ্পকাৰে ছন্নে পকতত্তেন ভিক্খুনা সদ্ধিং সযনমেৱ অধিপ্পেতং, ন সেসইৰিযাপথকপ্পনং. সেসমেত্থ সুৱিঞ্ঞেয্যমেৱ.

পাৰিৱাসিকক্খন্ধকৱণ্ণনা নিট্ঠিতা.