৬. পাটিদেসনীযকণ্ডং

পাটিদেসনীযসিক্খাপদৱণ্ণনা

৫৫২. পাটিদেসনীযেসু পঠমে ‘‘গাৰয্হং আৱুসোতিআদি পটিদেসেতব্বাকাৰদস্সন’’ন্তি ৱচনতো পাড়িযং আগতনযেনেৱ আপত্তি দেসেতব্বা. অসপ্পাযন্তি সগ্গমোক্খানং অহিতং অননুকূলং. সেসমেত্থ উত্তানমেৱ. পৰিপুণ্ণূপসম্পন্নতা, অঞ্ঞাতিকতা, অন্তৰঘৰে ঠিতায হত্থতো সহত্থা পটিগ্গহণং, যাৱকালিকতা, অজ্ঝোহৰণন্তি ইমানি পনেত্থ পঞ্চ অঙ্গানি.

৫৫৭-৫৬২. দুতিযততিযচতুত্থেসু নত্থি ৱত্তব্বং, অঙ্গেসু পন দুতিযে পৰিপুণ্ণূপসম্পন্নতা, পঞ্চভোজনতা, অন্তৰঘৰে ঠিতায অনুঞ্ঞাতপ্পকাৰতো অঞ্ঞথা ৱোসাসনা, অনিৱাৰণা, অজ্ঝোহাৰোতি ইমানি পঞ্চ অঙ্গানি.

ততিযে সেক্খসম্মততা, পুব্বে অনিমন্তিততা, অগিলানতা, ঘৰূপচাৰোক্কমনং, ঠপেত্ৱা নিচ্চভত্তাদীনি অঞ্ঞং আমিসং গহেত্ৱা ভুঞ্জনন্তি ইমানি পঞ্চ অঙ্গানি.

চতুত্থে যথাৱুত্তআৰঞ্ঞকসেনাসনতা, যাৱকালিকস্স অতত্থজাতকতা, অগিলানতা, অগিলানাৱসেসকতা, অপ্পটিসংৱিদিততা, অজ্ঝাৰামে পটিগ্গহণং, অজ্ঝোহৰণন্তি ইমানি সত্ত অঙ্গানি.

পাটিদেসনীযসিক্খাপদৱণ্ণনা নিট্ঠিতা.

পাটিদেসনীযকণ্ডং নিট্ঠিতং.