৯. চম্পেয্যক্খন্ধকং

কস্সপগোত্তভিক্খুৱত্থুকথাৱণ্ণনা

৩৮০. চম্পেয্যক্খন্ধকে চম্পাযন্তি এৱংনামকে নগৰে. তস্স হি নগৰস্স আৰামপোক্খৰণীআদীসু তেসু তেসু ঠানেসু চম্পকৰুক্খাৱ উস্সন্না অহেসুং, তস্মা ‘‘চম্পা’’তি সঙ্খং অগমাসি. গগ্গৰায পোক্খৰণিযা তীৰেতি তস্স চম্পানগৰস্স অৱিদূৰে গগ্গৰায নাম ৰাজমহেসিযা খণিতত্তা ‘‘গগ্গৰা’’তি লদ্ধৱোহাৰা পোক্খৰণী অত্থি, তস্সা তীৰে সমন্ততো নীলাদিপঞ্চৱণ্ণকুসুমপটিমণ্ডিতং মহন্তং চম্পকৱনং, তস্মিং ভগৱা কুসুমগন্ধসুগন্ধে চম্পকৱনে ৱিহৰতি. তং সন্ধায ‘‘গগ্গৰায পোক্খৰণিযা তীৰে’’তি ৱুত্তং. তন্তিবদ্ধোতি তন্তি ৱুচ্চতি ব্যাপাৰো, তত্থ বদ্ধো পসুতো উস্সুক্কং আপন্নোতি অত্থো, তস্মিং আৱাসে অকতং সেনাসনং কৰোতি, জিণ্ণং পটিসঙ্খৰোতি, কতে ইস্সৰো হোতীতি অধিপ্পাযো. তেনাহ ‘‘তস্মিং আৱাসে কত্তব্বত্তা তন্তিপটিবদ্ধো’’তি, কত্তব্বকম্মে উস্সাহমাপন্নোতি অত্থো.

ঞত্তিৱিপন্নকম্মাদিকথাৱণ্ণনা

৩৮৫-৩৮৭. পটিক্কোসন্তেসূতি নিৱাৰেন্তেসু. হাপনং ৱা অঞ্ঞথা কৰণং ৱা নত্থীতি ঞত্তিকম্মস্স একায এৱ ঞত্তিযা কত্তব্বত্তা ততো হাপনং ন সম্ভৱতি, অনুস্সাৱনায অভাৱতো পচ্ছা ঞত্তিঠপনৱসেন দ্ৱীহি ঞত্তীহি কৰণৱসেন চ অঞ্ঞথা কৰণং নত্থি.

চতুৱগ্গকৰণাদিকথাৱণ্ণনা

৩৮৯. উক্খেপনীযকম্মকতো কম্মনানাসংৱাসকো, উক্খিত্তানুৱত্তকো লদ্ধিনানাসংৱাসকো.

দ্ৱেনিস্সাৰণাদিকথাৱণ্ণনা

৩৯৫. অপ্পত্তো নিস্সাৰণন্তি এত্থ নিস্সাৰণকম্মং নাম কুলদূসকানঞ্ঞেৱ অনুঞ্ঞাতং, অযঞ্চ ‘‘বালো হোতি অব্যত্তো’’তিআদিনা নিদ্দিট্ঠো কুলদূসকো ন হোতি, তস্মা ‘‘অপ্পত্তো’’তি ৱুত্তো. যদি এৱং কথং সুনিস্সাৰিতো হোতীতি? বালঅব্যত্ততাদিযুত্তস্সপি কম্মক্খন্ধকে ‘‘আকঙ্খমানো সঙ্ঘো পব্বাজনীযকম্মং কৰেয্যা’’তি (চূড়ৱ. ২৭) ৱুত্তত্তা. তেনেৱাহ ‘‘তঞ্চেস…পে… তস্মা সুনিস্সাৰিতো হোতী’’তি. তত্থ তন্তি পব্বাজনীযকম্মং. এসোতি ‘‘বালো’’তিআদিনা নিদ্দিট্ঠো. আৱেণিকেন লক্খণেনাতি পব্বাজনীযকম্মস্স আৱেণিকভূতেন কুলদূসকভাৱলক্খণেন.

তঞ্চে সঙ্ঘো নিস্সাৰেতি, সুনিস্সাৰিতোতি এত্থ অধিপ্পেতস্স পব্বাজনীযকম্মস্স ৱসেন অত্থং দস্সেত্ৱা ইদানি যদি ‘‘তঞ্চে সঙ্ঘো নিস্সাৰেতী’’তি তজ্জনীযাদিকম্মৱসেন নিস্সাৰণা অধিপ্পেতা, তদা নিস্সাৰণং সম্পত্তোযেৱ তজ্জনীযাদিৱসেন সুনিস্সাৰিতোতি ব্যতিৰেকমুখেন অত্থং দস্সেতুং পুন ‘‘তঞ্চে সঙ্ঘো নিস্সাৰেতী’’তি উল্লিঙ্গেত্ৱা অত্থো কথিতো. নত্থি এতস্স অপদানং অৱখণ্ডনং আপত্তিপৰিযন্তোতি অনপদানো. একেকেনপি অঙ্গেন নিস্সাৰণা অনুঞ্ঞাতাতি কম্মক্খন্ধকে অনুঞ্ঞাতা. সেসমেত্থ পাড়িতো অট্ঠকথাতো চ সুৱিঞ্ঞেয্যমেৱ.

দ্ৱেনিস্সাৰণাদিকথাৱণ্ণনা নিট্ঠিতা.

চম্পেয্যক্খন্ধকৱণ্ণনা নিট্ঠিতা.