৪. পৱাৰণক্খন্ধকং

অফাসুকৱিহাৰকথাৱণ্ণনা

২০৯. পৱাৰণক্খন্ধকে আদিতো লাপো আলাপো, ৱচনপটিৱচনৱসেন সমং লাপো সল্লাপো. পিণ্ডায পটিক্কমেয্যাতি গামে পিণ্ডায চৰিত্ৱা পচ্চাগচ্ছেয্য. অৱক্কাৰপাতিং ধোৱিত্ৱা উপট্ঠাপেয্যাতি অতিৰেকপিণ্ডপাতং অপনেত্ৱা ঠপনত্থায একং সমুগ্গপাতিং ধোৱিত্ৱা ঠপেয্য. সমুগ্গপাতি নাম সমুগ্গপুটসদিসা পাতি. অপ্পহৰিতেতি অপৰূড়্হহৰিতে, যস্মিং ঠানে পিণ্ডপাতজ্ঝোত্থৰণেন ৱিনস্সনধম্মানি তিণানি নত্থি, তস্মিন্তি অত্থো. তেন নিত্তিণঞ্চ মহাতিণগহনঞ্চ যত্থ সকটেনপি ছড্ডিতে পিণ্ডপাতে তিণানি ন ৱিনস্সন্তি, তঞ্চ ঠানং পৰিগ্গহিতং হোতি. ভূতগামসিক্খাপদস্স হি অৱিকোপনত্থমেতং ৱুত্তং. অপ্পাণকেতি নিপ্পাণকে, পিণ্ডপাতজ্ঝোত্থৰণেন মৰিতব্বপাণকৰহিতে ৱা মহাউদকক্খন্ধে. পৰিত্তোদকে এৱ হি ভত্তপক্খেপেন আলুড়িতে সুখুমপাণকা মৰন্তি, ন মহাতড়াকাদীসূতি. পাণকানুৰক্খণত্থঞ্হি এতং ৱুত্তং. ওপিলাপেয্যাতি নিমুজ্জাপেয্য.

ৱচ্চঘটন্তি আচমনকুম্ভী. ৰিত্তন্তি ৰিত্তকং. তুচ্ছন্তি তস্সেৱ ৱেৱচনং. অৱিসয্হন্তি উক্খিপিতুং অসক্কুণেয্যং অতিভাৰিকং. হত্থৱিকাৰেনাতি হত্থসঞ্ঞায. হত্থেহি উক্খিপনং হত্থৱিলঙ্ঘনং. তেনাহ ‘‘হত্থুক্খেপকেনা’’তি. অথ ৱা ৱিলঙ্ঘেতি দেসন্তৰং পাপেতি এতেনাতি ৱিলঙ্ঘকো, হত্থো এৱ ৱিলঙ্ঘকো হত্থৱিলঙ্ঘকো, তেন হত্থৱিলঙ্ঘকেন, অঞ্ঞমঞ্ঞং সংসিব্বিতহত্থেনাতি ৱুত্তং হোতি. দ্ৱে হি জনা হত্থেন হত্থং সংসিব্বেত্ৱা দ্ৱীসু হত্থেসু ঠপেত্ৱা উট্ঠপেন্তা হত্থৱিলঙ্ঘকেন উট্ঠপেন্তি নাম. তিত্থিযসমাদানন্তি তিত্থিযেহি সমাদাতব্বং.

অফাসুকৱিহাৰকথাৱণ্ণনা নিট্ঠিতা.

পৱাৰণাভেদকথাৱণ্ণনা

২১২. দ্ৱেমা, ভিক্খৱে, পৱাৰণা চাতুদ্দসিকা চ পন্নৰসিকা চাতি এত্থ পুৰিমৱস্সংৱুত্থানং পুব্বকত্তিকপুণ্ণমা, তেসংযেৱ সচে ভণ্ডনকাৰকেহি উপদ্দুতা পৱাৰণং পচ্চুক্কড্ঢন্তি, অথ কত্তিকমাসস্স কাড়পক্খচাতুদ্দসো ৱা পচ্ছিমকত্তিকপুণ্ণমা ৱা, পচ্ছিমৱস্সংৱুত্থানঞ্চ পচ্ছিমকত্তিকপুণ্ণমা এৱ ৱাতি ইমে তযো পৱাৰণদিৱসাতি ৱেদিতব্বা. ইদঞ্চ পকতিচাৰিত্তৱসেন ৱুত্তং, তথাৰূপপচ্চযে পন সতি দ্ৱিন্নং কত্তিকপুণ্ণমানং পুৰিমেসু চাতুদ্দসেসুপি পৱাৰণং কাতুং ৱট্টতি, তেনেৱ মহাৱিহাৰে ভিক্খূ চাতুদ্দসিযা পৱাৰেত্ৱা পন্নৰসিযা কাযসামগ্গিং দেন্তি, চেতিযগিৰিমহদস্সনত্থম্পি অট্ঠমিযা গচ্ছন্তি, তম্পি চাতুদ্দসিযং পৱাৰেতুকামানঞ্ঞেৱ হোতি.

পৱাৰণাদানানুজাননকথাৱণ্ণনা

২১৩. সচে পন ৱুড্ঢতৰো হোতীতি সচে পৱাৰণদাযকো ভিক্খু ৱুড্ঢতৰো হোতি. তেন চ ভিক্খুনাতি পৱাৰণদাযকেন ভিক্খুনা.

অনাপত্তিপন্নৰসককথাৱণ্ণনা

২২২. পন্নৰসকেসু পৱাৰিতমত্তেতি পৱাৰিতসমনন্তৰং. অৱুট্ঠিতায পৰিসাযাতি পৱাৰেত্ৱা পচ্ছা অঞ্ঞমঞ্ঞং কথেন্তিযা. একচ্চায ৱুট্ঠিতাযাতি একচ্চেসু যথানিসিন্নেসু একচ্চেসু সকসকট্ঠানং গতেসু. পুন পৱাৰিতব্বন্তি পুনপি সব্বেহি সমাগন্ত্ৱা পৱাৰেতব্বং. আগচ্ছন্তি সমসমা, তেসং সন্তিকে পৱাৰেতব্বন্তি গতে অনানেত্ৱা নিসিন্নানঞ্ঞেৱ সন্তিকে পৱাৰেতব্বং. সব্বায ৱুট্ঠিতায পৰিসায আগচ্ছন্তি সমসমা, তেসং সন্তিকে পৱাৰেতব্বন্তি যদি সব্বে ৱুট্ঠহিত্ৱা গতা সন্নিপাতেতুঞ্চ ন সক্কা, একচ্চে সন্নিপাতেত্ৱা পৱাৰেতুং ৱট্টতি, ঞত্তিং ঠপেত্ৱা কত্তব্বসঙ্ঘকম্মাভাৱা ৱগ্গং ন হোতি. উপোসথেপি এসেৱ নযো.

পৱাৰণাঠপনকথাৱণ্ণনা

২৩৭. ‘‘নত্থি দিন্ন’’ন্তিআদিনযপ্পৱত্তা দসৱত্থুকা মিচ্ছাদিট্ঠি. ‘‘হোতি তথাগতো পৰং মৰণা, ন হোতি তথাগতো পৰং মৰণা’’তিআদিনা সস্সতুচ্ছেদসঙ্খাতং অন্তং গণ্হাতীতি অন্তগ্গাহিকা.

ভণ্ডনকাৰকৱত্থুকথাৱণ্ণনা

২৪০. চতুত্থে কতে সুণন্তীতি চতুত্থে পন্নৰসিকুপোসথে কতে অম্হাকং পৱাৰণং ঠপেস্সন্তীতি সুণন্তি. এৱম্পি দ্ৱে চাতুদ্দসিকা হোন্তীতি ততিযেন সদ্ধিং দ্ৱে চাতুদ্দসিকা হোন্তি.

পৱাৰণাসঙ্গহকথাৱণ্ণনা

২৪১. অযং পৱাৰণাসঙ্গহো একস্স দিন্নোপি সব্বেসং দিন্নোৱ হোতীতি আহ ‘‘একস্সপি ৱসেন দাতব্বো’’তি. আগন্তুকা তেসং সেনাসনং গহেতুং ন লভন্তীতি সচেপি সট্ঠিৱস্সভিক্খূ আগচ্ছন্তি, তেসং সেনাসনং গহেতুং ন লভন্তি. পৱাৰেত্ৱা পন অন্তৰাপি চাৰিকং পক্কমিতুং লভন্তীতি পৱাৰণাসঙ্গহে কতে অন্তৰা পক্কমিতুকামা সঙ্ঘং সন্নিপাতাপেত্ৱা পৱাৰেতুং লভন্তি. সেসমেত্থ পাড়িতো অট্ঠকথাতো চ সুৱিঞ্ঞেয্যমেৱ.

পৱাৰণক্খন্ধকৱণ্ণনা নিট্ঠিতা.