মহাৱিভঙ্গসঙ্গহকথা

৪. মেথুনং পটিসেৱন্তো, কতি আপত্তিযো ফুসে;

মেথুনং পটিসেৱন্তো, তিস্সো আপত্তিযো ফুসে.

৫. ভৱে পাৰাজিকং খেত্তে, যেভুয্যক্খাযিতে পন;

থুল্লচ্চযং মুখে ৱট্ট-কতে ৱুত্তং তু দুক্কটং.

৬. অদিন্নং আদিযন্তো যো;

কতি আপত্তিযো ফুসে;

অদিন্নং আদিযন্তো সো;

তিস্সো আপত্তিযো ফুসে.

৭. পঞ্চমাসগ্ঘনে ৱাপি, অধিকে ৱা পৰাজযো;

মাসে ৱা দুক্কটং ঊনে, মজ্ঝে থুল্লচ্চযং ততো.

৮. মনুস্সজাতিং মাৰেন্তো;

কতি আপত্তিযো ফুসে;

মনুস্সজাতিং মাৰেন্তো;

তিস্সো আপত্তিযো ফুসে.

৯. মনুস্সমুদ্দিস্সোপাতং, খণনে দুক্কটং সিযা;

দুক্খে থুল্লচ্চযং জাতে, মতে পাৰাজিকং সিযা.

১০. অসন্তং উত্তৰিং ধম্মং, ৱদমত্তূপনাযিকং;

কতি আপজ্জতাপত্তী? তিস্সো আপত্তিযো ফুসে.

১১. অসন্তং উত্তৰিং ধম্মং, ভণন্তস্স পৰাজযো;

থুল্লচ্চযং পৰিযাযে, ঞাতে, নো চে তু দুক্কটং.

পাৰাজিককথা.

১২. ভণ সুক্কং ৱিমোচেন্তো;

কতি আপত্তিযো ফুসে;

সুণ সুক্কং ৱিমোচেন্তো;

তিস্সো আপত্তিযো ফুসে.

১৩. গৰুকং যদি চেতেতি, উপক্কমতি মুচ্চতি;

দ্ৱঙ্গে থুল্লচ্চযং ৱুত্তং, পযোগে দুক্কটং সিযা.

১৪. ইতো পট্ঠায মুঞ্চিত্ৱা, পঞ্হাপুচ্ছনমত্তকং;

ৱিস্সজ্জনৱসেনেৱ, হোতি অত্থৱিনিচ্ছযো.

১৫. ইত্থিযা কাযসংসগ্গে, তিস্সো আপত্তিযো ফুসে;

আমসন্তস্স কাযেন, কাযং তু গৰুকং সিযা.

১৬. কাযেন কাযবদ্ধং তু, ফুসং থুল্লচ্চযং ফুসে;

পটিবদ্ধেন কাযেন, পটিবদ্ধে তু দুক্কটং.

১৭. ইত্থিং দুট্ঠুল্লৱাচাহি, তিস্সো ওভাসতো সিযুং;

ৱণ্ণাৱণ্ণং ৱদং দ্ৱিন্নং, মগ্গানং গৰুকং ফুসে.

১৮. ৱণ্ণাদিভঞ্ঞে আদিস্স, উব্ভজাণুমধক্খকং;

হোতি থুল্লচ্চযং, কায-পটিবদ্ধে তু দুক্কটং.

১৯. অত্তকামচৰিযায, ৱদতো ৱণ্ণমিত্থিযা;

সন্তিকে গৰুকং হোতি, সচে জানাতি সা পন.

২০. সন্তিকে পণ্ডকস্সাপি, তস্স থুল্লচ্চযং সিযা;

তিৰচ্ছানগতস্সাপি, সন্তিকে দুক্কটং মতং.

২১. পটিগ্গণ্হনৱীমংসা, পচ্চাহৰণকত্তিকে;

সঞ্চৰিত্তং সমাপন্নে, গৰুকং নিদ্দিসে বুধো.

২২. তস্স দ্ৱঙ্গসমাযোগে, হোতি থুল্লচ্চযং তথা;

অঙ্গে সতি পনেকস্মিং, হোতি আপত্তি দুক্কটং.

২৩. সংযাচিকায চ কুটিং;

ৱিহাৰঞ্চ মহল্লকং;

কাৰাপেতি সচে ভিক্খু;

তিস্সো আপত্তিযো ফুসে.

২৪. পযোগে দুক্কটং ৱুত্তং, একপিণ্ডে অনাগতে;

হোতি থুল্লচ্চযং, তস্মিং, পিণ্ডে গৰুকমাগতে.

২৫. পাৰাজিকেন ধম্মেন, ভিক্খুং অমূলকেনিধ;

অনুদ্ধংসেতি যো তস্স, তিস্সো আপত্তিযো সিযুং.

২৬. ওকাসং ন চ কাৰেত্ৱা, হুত্ৱা চাৱনচেতনো;

সচে চোদেতি সঙ্ঘাদি-সেসেন সহ দুক্কটং.

২৭. ওকাসং পন কাৰেত্ৱা, হুত্ৱা অক্কোসচেতনো;

চোদেতি ওমসৱাদে, পাচিত্তিং পৰিদীপযে.

২৮. অনন্তৰসমানোৱ, নৱমে অঞ্ঞভাগিযে;

সব্বো আপত্তিভেদো হি, নত্থি কাচি ৱিসেসতা.

২৯. সঙ্ঘস্স ভেদকো ভিক্খু, যাৱততিযকং পন;

সমনুভাসনাযেৱ, গাহং ন পটিনিস্সজং.

৩০. ঞত্তিযা দুক্কটং, দ্ৱীহি, কম্মৱাচাহি থুল্লতং;

কম্মৱাচায ওসানে, আপত্তি গৰুকং সিযা.

৩১. ভেদানুৱত্তকে চেৱ, দুব্বচে কুলদূসকে;

সঙ্ঘভেদকতুল্যোৱ, হোতি আপত্তিনিচ্ছযো.

সঙ্ঘাদিসেসকথা.

৩২. অতিক্কমন্তো অতিৰেকচীৱৰং;

দসাহমাপজ্জতি একমেৱ;

নিস্সগ্গিপাচিত্তিযমেকৰত্তিং;

তিচীৱৰেনাপি ৱিনা ৱসন্তো.

৩৩. মাসং অতিক্কমন্তো হি, গহেত্ৱা কালচীৱৰং;

একং আপজ্জতাপত্তিং, নিস্সগ্গিযমুদীৰিতং.

৩৪. অঞ্ঞাতিকায যং কিঞ্চি;

পুৰাণচীৱৰং পন;

ধোৱাপেতি সচে তস্স;

হোন্তি আপত্তিযো দুৱে.

৩৫. ধোৱাপেতি পযোগস্মিং, দুক্কটং সমুদাহটং;

নিস্সগ্গিযাৱ পাচিত্তি, হোতি ধোৱাপিতে পন.

৩৬. অঞ্ঞাতিকায হত্থম্হা, চীৱৰং পটিগণ্হতো;

গহণে দুক্কটং ৱুত্তং, পাচিত্তি গহিতে সিযা.

৩৭. অঞ্ঞাতকং গহপতিং, গহপতানিমেৱ ৱা;

চীৱৰং ৱিঞ্ঞাপেন্তো দ্ৱে, ভিক্খু আপত্তিযো ফুসে.

৩৮. ৱিঞ্ঞাপেতি পযোগস্মিং, দুক্কটং পৰিকিত্তিতং;

ৱিঞ্ঞাপিতে চ নিস্সগ্গি, পাচিত্তি পৰিযাপুতা.

৩৯. ভিক্খু চীৱৰমঞ্ঞাতিং, ৱিঞ্ঞাপেন্তো তদুত্তৰিং;

পযোগে দুক্কটং, ৱিঞ্ঞা-পিতে নিস্সগ্গিযং ফুসে.

৪০. অঞ্ঞাতকং কঞ্চি উপাসকং ৱা;

উপাসিকং ৱা উপসঙ্কমিত্ৱা;

পুব্বেৱ হুত্ৱা পন অপ্পৱাৰিতো;

ৱত্থে ৱিকপ্পং পটিপজ্জমানো.

৪১. দুৱে আপজ্জতাপত্তী, পযোগে দুক্কটং সিযা;

ৱিকপ্পং পন আপন্নে, নিস্সগ্গিযমুদীৰিতং.

৪২. অঞ্ঞাতিং উপসঙ্কম্ম, পুব্বেযেৱপ্পৱাৰিতো;

ৱিকপ্পং চীৱৰে ভিক্খু, আপজ্জন্তো দুৱে ফুসে.

৪৩. তথাতিৰেকতিক্খত্তুং, চোদনায চ ভিক্খু চে;

গন্ত্ৱাতিৰেকছক্খত্তুং, ঠানেনপি চ চীৱৰং.

৪৪. নিপ্ফাদেতি সচে তস্স, হোন্তি আপত্তিযো দুৱে;

পযোগে দুক্কটং, তস্স, লাভে নিস্সগ্গিযং সিযা.

কথিনৱগ্গো পঠমো.

৪৫. দোসা কোসিযৱগ্গস্স, দ্ৱেদ্ৱেআদীসু পঞ্চসু;

পযোগে দুক্কটং ৱুত্তং, লাভে নিস্সগ্গিযং সিযা.

৪৬. গহেত্ৱেড়কলোমানি, তিযোজনমতিক্কমং;

দুক্কটং পঠমে পাদে, নিস্সগ্গিং দুতিযে ফুসে.

৪৭. ভিক্খু ভিক্খুনিযঞ্ঞায, ধোৱাপেতেড়লোমকং;

পযোগে দুক্কটং, তস্স, ধোতে নিস্সগ্গিযং সিযা.

৪৮. ৰূপিযং পটিগণ্হন্তো, দ্ৱে পনাপত্তিযো ফুসে;

পযোগে দুক্কটং ৱুত্তং, নিস্সগ্গি গহিতে সিযা.

৪৯. নানাকাৰং সমাপজ্জং, সংৱোহাৰঞ্চ ৰূপিযে;

সমাপন্নে চ নিস্সগ্গিং, পযোগে দুক্কটং ফুসে.

৫০. নানপ্পকাৰকং ভিক্খু, আপজ্জে কযৱিক্কযং;

পযোগে দুক্কটং, তস্মিং, কতে নিস্সগ্গিযং ফুসে.

কোসিযৱগ্গো দুতিযো.

৫১. পত্তং অতিক্কমেন্তস্স, দসাহমতিৰেককং;

তস্স নিস্সগ্গিযাপত্তি, হোতি একাৱ ভিক্খুনো.

৫২. অপঞ্চবন্ধনে পত্তে, ৱিজ্জমানেপি ভিক্খুনো;

অঞ্ঞং পন নৱং পত্তং, চেতাপেতি সচে পন.

৫৩. দ্ৱে পনাপত্তিযো ভিক্খু, আপজ্জতি, ন সংসযো;

পযোগে দুক্কটং, তস্স, লাভে নিস্সগ্গিযং ফুসে.

৫৪. পটিগ্গহেত্ৱা ভেসজ্জং, সত্তাহং যো অতিক্কমে;

একং নিস্সগ্গিযাপত্তিং, আপজ্জতি হি সো পন.

৫৫. অকালে পৰিযেসন্তো, ৱস্সসাটিকচীৱৰং;

পযোগে দুক্কটং, তস্স, লাভে নিস্সগ্গিযং ফুসে.

৫৬. ভিক্খুনো চীৱৰং দত্ৱা, অচ্ছিন্দন্তো দুৱে ফুসে;

পযোগে দুক্কটং ৱুত্তং, হটে নিস্সগ্গিযং সিযা.

৫৭. ৱিঞ্ঞাপেত্ৱা সযং সুত্তং, তন্তৱাযেহি চীৱৰং;

ৱাযাপেতি সচে ভিক্খু, দ্ৱে পনাপত্তিযো ফুসে.

৫৮. যো পনঞ্ঞাতকস্সেৱ, তন্তৱাযে সমেচ্চ চে;

ৱিকপ্পং চীৱৰে ভিক্খু, আপজ্জং অপ্পৱাৰিতো.

৫৯. দ্ৱে পনাপত্তিযো সো হি, আপজ্জতি, ন সংসযো;

পযোগে দুক্কটং, তস্স, লাভে নিস্সগ্গিযং সিযা.

৬০. পটিগ্গহেত্ৱা অচ্চেক-সঞ্ঞিতং পন চীৱৰং;

কালং অতিক্কমেন্তো তং, একং নিস্সগ্গিযং ফুসে.

৬১. তিণ্ণমঞ্ঞতৰং ৱত্থং, নিদহিত্ৱা ঘৰেধিকং;

ছাৰত্ততো ৱিনা তেন, ৱসং নিস্সগ্গিযং ফুসে.

৬২. জানং পৰিণতং লাভং, সঙ্ঘিকং অত্তনো পন;

পৰিণামেতি চে ভিক্খু, দ্ৱে পনাপত্তিযো ফুসে.

৬৩. পযোগে দুক্কটং হোতি, নিস্সগ্গি পৰিণামিতে;

সব্বত্থ অপ্পনাৱাৰ-পৰিহানি কতা মযা.

পত্তৱগ্গো ততিযো.

তিংসনিস্সগ্গিযকথা.

৬৪. ৱদন্তস্স মুসাৱাদং, পঞ্চ আপত্তিযো সিযুং;

মনুস্সুত্তৰিধম্মে তু, অভূতস্মিং পৰাজযো.

৬৫. চোদনায গৰুং ভিক্খুং, অমূলন্তিমৱত্থুনা;

পৰিযাযৱচনে ঞাতে, থুল্লচ্চযমুদীৰিতং.

৬৬. নো চে পটিৱিজানাতি, দুক্কটং সমুদাহটং;

সম্পজানমুসাৱাদে, পাচিত্তি পৰিদীপিতা.

৬৭. আপত্তিযো দুৱে ৱুত্তা, ভিক্খুস্সোমসতো পন;

পাচিত্তি উপসম্পন্নং, দুক্কটং ইতৰং সিযা.

৬৮. পেসুঞ্ঞহৰণে দ্ৱেপি, হোন্তি, পাচিত্তিযং পন;