৮. গামণিসংযুত্তং

১. চণ্ডসুত্তৱণ্ণনা

৩৫৩. ‘‘যেন মিধেকচ্চো চণ্ডো চণ্ডোত্ৱেৱ সঙ্খং গচ্ছতী’’তি এৱং পঞ্হপুচ্ছনেন ধম্মসঙ্গাহকত্থেৰেহি চণ্ডোতি গহিতনামো. পাকটং কৰোতীতি দস্সেতি অত্তনো চণ্ডভাৱং.

চণ্ডসুত্তৱণ্ণনা নিট্ঠিতা.

২. তালপুটসুত্তৱণ্ণনা

৩৫৪. ৱালোতি ৱুচ্চতি তালো, তস্স তালপুটং নাম. যথা আমলকীফলসমানকং, সো পন তালসদিসমুখৱণ্ণত্তা তালপুটোতি এৱংনামকো. তেনাহ ‘‘তস্স কিৰা’’তিআদি. অভিনীহাৰসম্পন্নো অনেকেসু কপ্পেসু সম্ভতসাৱকবোধিসম্ভাৰো. তথা হেস অসীতিযা মহাসাৱকেসু অব্ভন্তৰো জাতো. সহস্সং দেন্তি নচ্চং পস্সিতুকামা. সমজ্জৱেসন্তি নেপচ্চৱেসং. কীড়ং কত্ৱাতি নচ্চকীড়িতং কীড়িত্ৱা, নচ্চিত্ৱাতি অত্থো.

পুব্বে তথাপৱত্তৱুত্তন্তদস্সনে সচ্চেন, তব্বিপৰিযাযে অলিকেন. ৰাগপচ্চযাতি ৰাগুপ্পত্তিযা কাৰণভূতা. মুখতো…পে… দস্সনাদযোতি আদি-সদ্দেন মুখতো অগ্গিজালনিক্খমদস্সনাদিকে সঙ্গণ্হাতি. অঞ্ঞে চ…পে… অভিনযাতি কামস্সাদসংযুত্তানং সিঙ্গাৰহস্সঅব্ভুতৰসানঞ্চেৱ ‘‘অঞ্ঞে চা’’তি ৱুত্তসন্তবীভচ্ছৰসানঞ্চ দস্সনকা অভিনযা. দোসপচ্চযাতি দোসুপ্পত্তিযা কাৰণভূতা. হত্থপাদচ্ছেদাদীতি আদি-সদ্দেন সঙ্গহিতানং ৰুদ্দৱীৰভযানকৰসানং দস্সনকা অভিনযা. মোহপচ্চযাতি মোহুপ্পত্তিযা কাৰণভূতা. এৱমাদযোতি আদি-সদ্দেন সঙ্গহিতানং কৰুণাসন্তভযানকৰসানং দস্সনকা অভিনযা. তে হি ৰসে সন্ধায পাড়িযং ‘‘যে ধম্মা ৰজনীযা, যে ধম্মা দোসনীযা, যে ধম্মা মোহনীযা’’তি চ ৱুত্তং.

নটৱেসং গহেত্ৱাৱ পচ্চন্তি কম্মসৰিক্খৱিপাকৱসেন. তং সন্ধাযাতি তং যথাৱুত্তং নিৰযে পচ্চনং সন্ধায. এতং ‘‘পহাসো নাম নিৰযো, তত্থ উপপজ্জতী’’তি ৱুত্তং. যথা লোকে অত্থৱিসেসৱসেন সকম্মকানিপি পদানি অকম্মকানি ভৱন্তি ‘‘ৱিমুচ্চতি পুৰিসো’’তি, এৱং ইধ অত্থৱিসেসৱসেন অকম্মকং সকম্মকং কত্ৱা ৱুত্তং – ‘‘নাহং, ভন্তে, এতং ৰোদামী’’তি. কো পন সো অত্থৱিসেসো? অসহনং অক্খমনং, তস্মা ন ৰোদামি ন সহামি, ন অক্খমামীতি অত্থো. ৰোদনকাৰণঞ্হি অসহন্তো তেন অভিভূতো ৰোদতি. তমেৱস্স সকম্মকভাৱস্স কাৰণভূতং অত্থৱিসেসং ‘‘ন অস্সুৱিমোচনমত্তেনা’’তি ৱুত্তং. মতং ৱা, অম্ম, ৰোদন্তীতি এত্থাপি মতং ৰোদন্তি, তস্স মৰণং ন সহন্তি, নক্খমন্তীতি পাকটোযমত্থোতি.

তালপুটসুত্তৱণ্ণনা নিট্ঠিতা.

৩-৫. যোধাজীৱসুত্তাদিৱণ্ণনা

৩৫৫-৩৫৭. যুজ্ঝনং যোধো, সো আজীৱো এতস্সাতি যোধাজীৱো. তেনাহ – ‘‘যুদ্ধেন জীৱিকং কপ্পনকো’’তি, উস্সাহং ৱাযামং কৰোতীতি যুজ্ঝনৱসেন উস্সাহং ৱাযামং কৰোতি. পৰিযাপাদেন্তীতি মৰণপৰিযন্তিকং আপদং পাপেন্তি. তেনাহ ‘‘মৰণং পটিপজ্জাপেন্তী’’তি. দুট্ঠু ঠপিতন্তি দুট্ঠাকাৰেন অত্তনো পৰেসঞ্চ অত্থাৱহভাৱং ন গতং পটিপন্নং. পৰেহি সঙ্গামে জিতা হতা এত্থ জাযন্তীতি পৰজিতো নাম নিৰযো. অসিধনুগদাযসঙ্কুচক্কানি পঞ্চাৱুধানি. তং সন্ধাযাতি তং যোধাজীৱং পুগ্গলং সন্ধায. এতং ‘‘যো সো’’তিআদি ৱুত্তং. চতুত্থপঞ্চমেসূতি হত্থাৰোহঅস্সাৰোহসুত্তেসু. এসেৱ নযোতি এসো ততিযে ৱুত্তো এৱ অত্থতো ৱিসেসাভাৱতো.

যোধাজীৱসুত্তাদিৱণ্ণনা নিট্ঠিতা.

৬. অসিবন্ধকপুত্তসুত্তৱণ্ণনা

৩৫৮. পচ্ছাভূমিৱাসিনোতি অপৰদেসৱাসিনো. উদকসুদ্ধিকভাৱজাননত্থাযাতি অত্তনো উদকসুদ্ধিকভাৱং জাননত্থঞ্চেৱ লোকস্স চ উদকেন সুদ্ধি হোতীতি ইমস্স অত্থস্স জাননত্থঞ্চ. উপৰি যাপেন্তীতি উপৰি ব্ৰহ্মলোকং যাপেন্তি. সম্মা ঞাপেন্তীতি সম্মা উজুকংযেৱ সগ্গং লোকং গমেন্তি. তেনাহ – ‘‘সগ্গং নাম ওক্কামেন্তী’’তি, অৱক্কামেন্তি ওগাহাপেন্তীতি অত্থো. অনুপৰিগচ্ছেয্যাতি অনুপৰিতো গচ্ছেয্য.

অসিবন্ধকপুত্তসুত্তৱণ্ণনা নিট্ঠিতা.

৭. খেত্তূপমসুত্তৱণ্ণনা

৩৫৯. থদ্ধন্তি কথিনং লূখং. ঊসৰন্তি ঊসজাতং. চতূহিপি ওঘেহি অনভিভৱনীযতায অহং দীপো. সব্বপৰিস্সযেহি অনভিভৱনীযতায অহং লেণো. সব্বদুক্খপৰিত্তাসনতো তাযনট্ঠেন অহং তাণং. সব্বভযহিংসনতো অহং সৰণন্তি যোজেতব্বং.

উদকমণিকোতি মহন্তং উদকভাজনং. বহি ৱিস্সন্দনৱসেন উদকং ন হৰতীতি অহাৰী, পৰিতো ন পগ্ঘৰতীতি অপৰিহাৰী. সক্কচ্চমেৱ দেসেন্তি সদ্ধম্মগাৰৱস্স সব্বসত্তেসু মহাকৰুণায চ বুদ্ধানং সমানৰসত্তা. চতস্সো পন পৰিসা সত্থুগাৰৱেন অত্তনো চ সদ্ধাসম্পন্নতায সদ্দহিত্ৱা ওকপ্পেত্ৱা সুণন্তি, তস্মা তা দেসনাফলেন যুজ্জন্তি. কিচ্চসিদ্ধিযা সত্থু দেসনা তত্থ সক্কচ্চদেসনা নাম জাতা.

খেত্তূপমসুত্তৱণ্ণনা নিট্ঠিতা.

৮. সঙ্খধমসুত্তৱণ্ণনা

৩৬০. ‘‘যো কোচি পুৰিসো পাণাতিপাতী মুসাৱাদী, সব্বো সো আপাযিকো’’তি ৱত্ৱা পুন ‘‘যংবহুলং যংবহুলং কৰোতি, তেন দুগ্গতিং গচ্ছতী’’তি ৱদন্তো অত্তনাৱ অত্তনো ৱাদং ভিন্দতি. এৱং সন্তেতি যদি বহুসো কতেন পাপকম্মেন আপাযিকো, ‘‘যো কোচি পাণমতিপাতেতী’’তিআদিৱচনং মিচ্ছাতি. চত্তাৰি পদানীতি ‘‘যো কোচি পাণমতিপাতেতী’’তিআদিনা নযেন ৱুত্তা চত্তাৰো অত্থকোট্ঠাসা. দিট্ঠিযা পচ্চযা হোন্তি ‘‘অত্থি খো পন মযা’’তিআদিনা অযোনিসো উম্মুজ্জন্তস্স. বলসম্পন্নোতি সমত্থো. সঙ্খধমকোতি সঙ্খস্স ধমনকিচ্চে ছেকো. অদুক্খেনাতি সুখেন. উপচাৰোপি অপ্পনাপি ৱট্টতি উভিন্নং সামঞ্ঞৱচনভাৱতো. অপ্পমাণকতভাৱো লব্ভতেৱ. তথা হি তং কিলেসানং ৱিক্খম্ভনসমত্থতায দীঘসন্তানতায ৱিপুলফলতায চ ‘‘মহগ্গত’’ন্তি ৱুচ্চতি.

ন ওহীযতীতি যস্মিং সন্তানে কামাৱচৰকম্মং, মহগ্গতকম্মঞ্চ কতূপচিতং ৱিপাকদানে লদ্ধাৱসৰং হুত্ৱা ঠিতং, তেসু কামাৱচৰকম্মং ইতৰং নীহৰিত্ৱা সযং তত্থ ওহীযিত্ৱা অত্তনো ৱিপাকং দাতুং ন সক্কোতি, মহগ্গতকম্মমেৱ পন ইতৰং পটিবাহিত্ৱা অত্তনো ৱিপাকং দাতুং সক্কোতি গৰুভাৱতো. তেনাহ ‘‘তং কামাৱচৰকম্ম’’ন্তিআদি. কিলেসৱসেনাতি পাপকম্মস্স মূলভূতকিলেসৱসেন. পাণাতিপাতাদযো হি দোসমোহলোভাদিমূলকিলেসসমুট্ঠানা. কিলেসৱসেনাতি ৱা কম্মকিলেসৱসেন. ৱুত্তঞ্হেতং – ‘‘পাণাতিপাতো খো, গহপতিপুত্ত, কম্মকিলেসো’’তিআদি (দী. নি. ৩.২৪৫). যথানুসন্ধিনাৱ গতন্তি যথানুসন্ধিসঙ্খাতঅনুসন্ধিনা ওসানং গতং সংকিলেসসম্মুখেন উট্ঠিতায ৱোদানধম্মৱসেন নিট্ঠাপিতত্তা.

সঙ্খধমসুত্তৱণ্ণনা নিট্ঠিতা.

৯. কুলসুত্তৱণ্ণনা

৩৬১. এৱং পৱত্তঈহিতিকাতি এৱং দ্ৱিধা পৱত্তঈহিতিকা. দ্ৱীহিতিকা দুক্কৰজীৱিকপযোগা. সলাকমত্তং ৱুত্তং এত্থাতি সলাকা ৱুত্তা, পুৰিমপদে উত্তৰপদলোপো. উভতোকোটিকন্তি যদি ‘‘কুলানুদযং ন ৱণ্ণেমী’’তি ৱদতি, ‘‘ভূতা নিক্কৰুণা সমণ তুম্হে’’তি ৱাদং আৰোপেহি. অথ সব্বদাপি ‘‘কুলানুদযং ৱণ্ণেমী’’তি ৱদতি. এৱং সন্তে ‘‘কস্মা এৱং দুব্ভিক্খে কালে মহতিযা পৰিসায পৰিৱুতো জনপদচাৰিকং চৰন্তা কুলূপচ্ছেদায পটিপজ্জথা’’তি এৱং উভতোকোটিকং ৱাদং আৰোপেহীতি গামণিং উয্যোজেসি.

দ্ৱে অন্তেতি উভো কোটিযো. বহি নীহৰিতুন্তি ন ৱণ্ণেমি ৱণ্ণেমীতি দ্ৱে অন্তে মোচেন্তো তং পুচ্ছিতমত্থং বহি নীহৰতি নাম. তত্থ দোসং দত্ৱা চোদেন্তো তং অপুচ্ছং কৰোন্তো গিলিত্ৱা ৱিয অন্তো পৱেসেতি নাম.

ইতো সো গামণীতিআদি অত্তনো ভিক্খূনং অঞ্ঞেসঞ্চ অত্থকামানং ভিক্খপ্পদানেন অনিট্ঠপ্পত্তিঅভাৱদস্সনত্থং আৰদ্ধং. দানেন সম্ভূতানীতি দানমযেন পুঞ্ঞকিৰিযৱত্থুনা সম্মদেৱ ভূতিং ৱড্ঢিং পত্তানি. সচ্চেন অৰিযৱোহাৰেন সম্মদেৱ ভূতানি উপ্পন্নানি সচ্চসম্ভূতানীতি আহ ‘‘সচ্চং নাম সচ্চৱাদিতা’’তি. সেসসীলন্তি অট্ঠৱিধঅৰিযৱোহাৰতো অঞ্ঞসীলং. নিহিতন্তি তস্মিং কুলে পুব্বপুৰিসেহি নিধানভাৱেন নিহিতং. দুপ্পযুত্তাতি কসিৱাণিজ্জাদিৱসেন দুট্ঠু পযুত্তা কম্মন্তা. ৱিপজ্জন্তীতি নস্সন্তি. কুলঙ্গাৰোতি কুলস্স অঙ্গাৰসদিসো ৱিনাসকপুগ্গলো. অনিচ্চতাতি মৰণং. তস্মিং কুলে পধানপুৰিসানং ভোগানং ৱা সব্বসো ৱিনাসো. তেনাহ ‘‘হুত্ৱা অভাৱো’’তিআদি.

কুলসুত্তৱণ্ণনা নিট্ঠিতা.

১০. মণিচূড়কসুত্তৱণ্ণনা

৩৬২. তং পৰিসন্তি তং ৰাজন্তেপুৰে নিসিন্নং ৰাজপৰিসং. নযগ্গাহেতি কুতোচিপি অসুত্ৱা কেৱলং অত্তনো এৱ মতিযা নযগ্গহণে ঠত্ৱা.

কাৰেতুং ৱট্টতি সতি সম্ভৱে পটিসঙ্খাৰস্স, সেনাসনৱিনাসো ন অজ্ঝুপেক্খিতব্বোতি অধিপ্পাযো. অত্তনো এত্থ কিচ্চাৱসানে যং গিহীনংযেৱ সন্তকং তাৱকালিকং, তং গিহিৱিকতন্তি আহ ‘‘গিহিৱিকতং কত্ৱা’’তি. ন ৱদামি পব্বজ্জিতাসাৰুপ্পতো.

মণিচূড়কসুত্তৱণ্ণনা নিট্ঠিতা.

১১. ভদ্ৰকসুত্তৱণ্ণনা

৩৬৩. এৱংনামকেতি মল্লা নাম জানপদিনো ৰাজকুমাৰা, নেসং নিৱাসতায ‘‘মল্লা’’ইচ্চেৱ বহুৱচনৱসেন লদ্ধনামত্তা এৱংনামকে জনপদে. নত্থি এতস্স পত্তিযা কালন্তৰসঞ্ঞিতো কালোতি অকালো, সো এৱ অকালিকো. তেনাহ – ‘‘কালং অনতিক্কমিত্ৱা পত্তেনা’’তি. সো পন ‘‘যংকিঞ্চি দুক্খং উপ্পজ্জমানং উপ্পজ্জতি, সব্বং তং ছন্দমূলক’’ন্তি এৱং ৱুত্তো দুক্খস্স ছন্দমূলভাৱো, এৱং ছন্দমূলকস্স দুক্খস্স কথিতত্তা ‘‘ইমস্মিং সুত্তে ৱট্টদুক্খং কথিত’’ন্তি ৱুত্তং.

ভদ্ৰকসুত্তৱণ্ণনা নিট্ঠিতা.

১২. ৰাসিযসুত্তৱণ্ণনা

৩৬৪. ৰাসিং কত্ৱা মাৰপাসৱসেন, তত্ৰাপি অন্তৰভেদেন ৱিভজিত্ৱা পুচ্ছিতব্বপঞ্হে একতো ৰাসিং কত্ৱা. তপনং অত্তপৰিতাপনং তপো, সো এতস্স অত্থীতি তপস্সী, তং তপস্সিং. সো পন তং তপং নিস্সায ঠিতো নাম হোতীতি ৱুত্তং ‘‘তপনিস্সিতক’’ন্তি. সো পন অনেকাকাৰভেদেন লূখং ফৰুসং জীৱনসীলত্তা লূখজীৱী নাম. তেনাহ ‘‘লূখজীৱিক’’ন্তি. মজ্ঝিমায পটিপত্তিযা উপ্পথভাৱেন অৱনিযা গন্ধব্বাতি অন্তা, ততো এৱ লামকত্তা অন্তা. লামকম্পি ‘‘অন্তো’’তি ৱুচ্চতি ‘‘অন্তমিদং, ভিক্খৱে, জীৱিকানং (ইতিৱু. ৯১; সং. নি. ৩.৮০), একো অন্তো’’তি এৱমাদীসু (সং. নি. ২.১৫; ৩.৯০). অট্ঠকথাযং পন অঞ্ঞমঞ্ঞআধাৰভাৱং উৰীকত্ৱা ‘‘কোট্ঠাসা’’তি ৱুত্তং. হীনো গামোতি পাড়ি. গাম-সদ্দো হীনপৰিযাযোতি অধিপ্পাযেনাহ ‘‘গাম্মো’’তি. গামে ভৱোতি গাম্মো. গাম-সদ্দো চেত্থ গামৱাসিৱিসযো ‘‘গামো আগতো’’তিআদীসু ৱিয. অট্ঠকথাযং পন ‘‘গামৱাসীনং ধম্মো’’তি ৱুত্তং, তেসং চাৰিত্তন্তি অত্থো. অত্ত-সদ্দো ইধ সৰীৰপৰিযাযো ‘‘অত্তন্তপো’’তিআদীসু ৱিযাতি আহ ‘‘সৰীৰদুক্খকৰণন্তি অত্থো’’তি.

এত্থাতি এতস্মিং তপনিস্সিতগৰহিতব্বপদে কস্মা অন্তদ্ৱযমজ্ঝিমপটিপদাগহণং? অত্তকিলমথানুযোগো তাৱ গয্হতু ইদমত্থিতাযাতি অধিপ্পাযো. কামভোগীতপনিস্সিতকনিজ্জৰৱত্থূনং দস্সনে যথাধিপ্পেতস্স অত্থস্স ৱিভজিত্ৱা কথনং সম্ভৱতীতি তে দস্সেত্ৱা অধিপ্পেতত্থো কথিতো.

তমত্থন্তি যো ‘‘কামভোগীতপনিস্সিতকেসু গৰহিতব্বেযেৱ গৰহতি, পসংসিতব্বেযেৱ চ পসংসতী’’তি ৱুত্তো অত্থো, তমত্থং পকাসেন্তো. সাহসিককম্মেনাতি অযুত্তেন কম্মেন. ধম্মেন চ অধম্মেন চাতি ধম্মিকেন অধম্মিকেন চ. অযোনিসো পৱত্তং বাহিৰকং সন্ধায চোদকো ‘‘কথ’’ন্তিআদিমাহ. ইতৰো নযিদং তাদিসং অত্তপৰিতাপনং অধিপ্পেতং, অথ খো যোনিসো পৱত্তং সাসনিকমেৱাতি দস্সেন্তো ‘‘চতুৰঙ্গৱীৰিযৱসেন চা’’তি আহ. তত্থ ‘‘কামং তচো চ ন্হাৰু চ অট্ঠি চ অৱসিস্সতূ’’তিআদিনা (ম. নি. ২.১৮৪; সং. নি. ২.২২.২৩৭; অ. নি. ২.৫) নযেন ৱুত্তা সৰীৰেনিৰপেক্খৱিপস্সনায উস্সুক্কাপনৱসেন পৱত্তা ৱীৰিযভাৱনা ‘‘চতুৰঙ্গৱীৰিযৱসেনা’’তি ৱুত্তা. তথা অব্ভোকাসিকনেসজ্জিকতপাদিনিস্সিতাৱ কিলেসনিম্মথনযোগ্যা ৱীৰিযভাৱনা ‘‘ধুতঙ্গৱসেন চা’’তি ৱুত্তাতি. অৰিযমগ্গেন নিস্সেসকিলেসানং পজহনা নিজ্জৰা. সা চ অত্তপচ্চক্খতায সন্দিট্ঠিকা তিণ্ণং মূলকিলেসানং পজহনেন ‘‘তিস্সো’’তি চ ৱুত্তা. তেনাহ ‘‘একোপী’’তিআদি.

ৰাসিযসুত্তৱণ্ণনা নিট্ঠিতা.

১৩. পাটলিযসুত্তৱণ্ণনা

৩৬৫. ‘‘মাযঞ্চাহং পজানামী’’তি ৱচনং কামং তেসং মাযাৱীভাৱদস্সনপৰং, ভগৱতো পন মাযাসাঠেয্যাদিকস্স সব্বস্স পাপধম্মস্স বোধিমূলে এৱ সেতুঘাতো, তস্মা সব্বসো পহীনমাযো, সব্বঞ্ঞুতায মাযং অঞ্ঞে চ ঞেয্যে সব্বসো জানাতি. তেন ৱুত্তং ‘‘মাযঞ্চাহং, গামণি, পজানামী’’তিআদি. মাযঞ্চ পজানামীতি ন কেৱলমহং মাযং এৱ জানামি, অথ খো অঞ্ঞম্পি ইদঞ্চিদঞ্চ জানামীতি.

ইত্থিকামেহীতি ইত্থীহি চেৱ তদঞ্ঞকামেহি চ. একস্মিং ঠানেতি একস্মিং পদেসে. একেকস্সেৱ আগন্তুকস্স গহট্ঠস্স ৱা পব্বজিতস্স ৱা. সত্তিঅনুৰূপেনাতি ৱিভৱসত্তিঅনুৰূপেন. বলানুৰূপেনাতি পৰিৱাৰবলানুৰূপেন. সত্তিঅনুৰূপেনাতি ৱা সদ্ধাসত্তিঅনুৰূপেন. বলানুৰূপেনাতি ৱিভৱবলানুৰূপেন. ধম্মেসু সমাধি দসকুসলধম্মেসু সমাধানং. অগ্গহিতচিত্ততা পৰিযুট্ঠকাৰিতা. তেন লোকিযসীলৱিসুদ্ধি দিট্ঠিৱিসুদ্ধি চ ৱুত্তা. তথা চাহ – ‘‘কো চাদি কুসলানং ধম্মানং, সীলঞ্চ সুৱিসুদ্ধং দিট্ঠি চ উজুকা’’তি (সং. নি. ৫.৩৬৯). তত্থ পতিট্ঠিতস্স উপৰি কত্তব্বং দস্সেতুং ‘‘ধম্মসমাধিস্মিং ঠিতো’’তিআদি ৱুত্তং. অযং পটিপদাতি তস্স কম্মফলৱাদিনো সত্থু ৱচনং সব্বেসঞ্চ অযং ময্হং সীলসংৱৰব্ৰহ্মৱিহাৰভাৱনাসঙ্খাতাপটিপদা অনপৰাধকতায এৱ সংৱত্ততি. জযগ্গাহোতি উভযথাপি ময্হং কাচি জানি নত্থি.

পঞ্চ ধম্মা ধম্মসমাধি নাম, ৱিপস্সনামগ্গফলধম্মমত্তং ৱা. ততিযৱিকপ্পে সীলাদিৱিসুদ্ধিযা সদ্ধিং ব্ৰহ্মৱিহাৰা যথাৱুত্ততিৱিধধম্মাৱহত্তা এৱ ধম্মসমাধি নাম. পূৰেন্তস্স উপ্পন্না চিত্তেকগ্গতাতি ৱুত্তখণিকচিত্তেকগ্গতা. সাপি চিত্তস্স সমাধানতো ‘‘চিত্তসমাধী’’তি ৱুত্তা, তস্স পটিপক্খং ৱিক্খম্ভন্তী সমুচ্ছিন্দন্তী চ হুত্ৱা পৱত্তা যথাৱুত্তসমাধি এৱ ৱিসেসেন চিত্তসমাধি নাম.

পাটলিযসুত্তৱণ্ণনা নিট্ঠিতা.

গামণিসংযুত্তৱণ্ণনা নিট্ঠিতা.