৩. মাতুগামসংযুত্তং

১. পঠমপেয্যালৱগ্গো

১-২. মাতুগামসুত্তাদিৱণ্ণনা

২৮০-২৮১. অগুণঙ্গেহীতি অগুণকোট্ঠাসেহি. ৰূপযতীতি ৰূপং, সৰীৰৰূপং. সৰীৰৰূপং পাসংসং এতস্স অত্থীতি ৰূপৱা, তপ্পটিক্খেপেন ন চ ৰূপৱা, সম্পন্নৰূপো ন হোতীতি অত্থো. ঞাতিকুলতো অঞ্ঞতো ৱা আগতায ভোগসম্পদায অভাৱেন ন ভোগসম্পন্নো. দুস্সীলোতি নিস্সীলো. নিস্সীলতায এৱ চস্সা পুব্বুট্ঠাযিতাদিআচাৰাভাৱো ৱুত্তো. আলসিযোতি আলসিযতায যুত্তো. পজঞ্চস্স ন লভতীতি পজাভাৱসীসেন তস্সা পৰিৱাৰহানি ৱুত্তা. পৰিৱত্তেতব্বন্তি পুৰিসৱসেন পৰিৱত্তেতব্বং.

মাতুগামসুত্তাদিৱণ্ণনা নিট্ঠিতা.

৩. আৱেণিকদুক্খসুত্তৱণ্ণনা

২৮২. আৱেণিতব্বতো মৰিযাদায ৱিসুং অসাধাৰণতো পস্সিতব্বতো আৱেণিকানি. পটিপচ্চেকে পুগ্গলে নিযুত্তানীতি পাটিপুগ্গলিকানি. পৰিচাৰিকভাৱন্তি উপট্ঠাযিকভাৱং.

আৱেণিকদুক্খসুত্তৱণ্ণনা নিট্ঠিতা.

৪. তীহিধম্মেহিসুত্তাদিৱণ্ণনা

২৮৩-৩০৩. মচ্ছেৰমলপৰিযুট্ঠিতেনাতি মচ্ছৰিযমলেন অভিভূতেন. তেনাতি কস্সচি কিঞ্চি অদানেন চ. এতং ‘‘মচ্ছেৰমলপৰিযুট্ঠিতেনা’’তিআদি ৱুত্তং. ৱিলোকেন্তো ৱিচৰতি ইস্সাপকতচিত্ততায. পঞ্চমাদীনি যাৱ একাদসমা উত্তানত্থানেৱ.

তীহিধম্মেহিসুত্তাদিৱণ্ণনা নিট্ঠিতা.

৩. বলৱগ্গো

১. ৱিসাৰদসুত্তৱণ্ণনা

৩০৪. ৰূপসম্পত্তি ৰূপবলং তংসমঙ্গিনো উপত্থম্ভকভাৱতো. এস নযো সেসেসুপি. বলানি হি সত্তানং ৱুড্ঢিযা উপত্থম্ভকপচ্চযো হোতি, যথা তং আহাৰো. তেনাহ – ‘‘ইমানী’’তিআদি.

ৱিসাৰদসুত্তৱণ্ণনা নিট্ঠিতা.

২-১০. পসয্হসুত্তাদিৱণ্ণনা

৩০৫-৩১৩. অভিভৱিত্ৱা সব্বং অন্তোজনং সামিকঞ্চ. নাসেন্তীতি নাসনং অদস্সনং নেন্তি নীহৰন্তীতি অত্থো.

পসয্হসুত্তাদিৱণ্ণনা নিট্ঠিতা.

মাতুগামসংযুত্তৱণ্ণনা নিট্ঠিতা.