১৬. নন্দিক্খযৱগ্গো

১-৪. অজ্ঝত্তনন্দিক্খযসুত্তাদিৱণ্ণনা

১৫৬-১৫৯. অত্থতোতি সভাৱতো. ঞাণেন অৰিযতো ঞাতব্বতো অত্থো, সভাৱোতি. এৱঞ্হি অভিজ্জনসভাৱো নন্দনট্ঠেন নন্দী, ৰঞ্জনট্ঠেন ৰাগো. ৱিমুত্তিৱসেনাতি ৱিমুত্তিযা অধিগমৱসেন. এত্থাতি ইমস্মিং পঠমসুত্তে. দুতিযাদীসূতি দুতিযততিযচতুত্থেসু. উত্তানমেৱ হেট্ঠা ৱুত্তনযত্তা.

অজ্ঝত্তনন্দিক্খযসুত্তাদিৱণ্ণনা নিট্ঠিতা.

৫-৬. জীৱকম্বৱনসমাধিসুত্তাদিৱণ্ণনা

১৬০-১৬১. সমাধিৱিকলানং চিত্তেকগ্গতং লভন্তানং, পটিসল্লানৱিকলানং কাযৱিৱেকঞ্চ চিত্তেকগ্গতঞ্চ লভন্তানন্তি যোজনা. পাকটং হোতীতি ৱিভূতং হুত্ৱা উপট্ঠাতি. ওক্খাযতি পচ্চক্খাযতীতি চতুসচ্চধম্মানং ৱিভূতভাৱেন উপট্ঠানস্স কথিতত্তা ৱুত্তং – ‘‘দ্ৱীসুপি…পে… কথিতা’’তি.

জীৱকম্বৱনসমাধিসুত্তাদিৱণ্ণনা নিট্ঠিতা.

৭-৯. কোট্ঠিকঅনিচ্চসুত্তাদিৱণ্ণনা

১৬২-১৬৪. অনিচ্চানুপস্সনাদযো এৱ ৱিমুত্তিপৰিপাচনিযা ধম্মা নাম. থেৰস্স তদা সদ্ধাদীনি ইন্দ্ৰিযানি ন পৰিপাকং উপগতানি, থেৰো ইমাহি দেসনাহি ইন্দ্ৰিযপৰিপাকমগমাসি.

কোট্ঠিকঅনিচ্চসুত্তাদিৱণ্ণনা নিট্ঠিতা.

১০-১২. মিচ্ছাদিট্ঠিপহানসুত্তাদিৱণ্ণনা

১৬৫-১৬৭. পাটিযেক্কন্তি ৱিসুং ৱিসুং. ৱুত্তনযেনেৱাতি হেট্ঠা ৱুত্তনযেনেৱ অপুব্বস্স ৱত্তব্বস্স অভাৱা.

মিচ্ছাদিট্ঠিপহানসুত্তাদিৱণ্ণনা নিট্ঠিতা.

নন্দিক্খযৱগ্গৱণ্ণনা নিট্ঠিতা.