১-৮. চক্খুসুত্তাদিৱণ্ণনা

১৮৮-১৯৫. একৱিহাৰীতি চতূসুপি ইৰিযাপথেসু একাকী হুত্ৱা ৱিহৰন্তো. ৱিৱেকট্ঠোতি ৱিৱিত্তট্ঠো, তেনাহ ‘‘নিস্সদ্দো’’তি. সতিযা অৱিপ্পৱসন্তোতি সতিযা অৱিপ্পৱাসেন ঠিতো, সব্বদা অৱিজহনৱসেন পৱত্তো. আতাপীতি ৱীৰিযসম্পন্নোতি সব্বসো কিলেসানং আতাপনপৰিতাপনৱসেন পৱত্তৱীৰিযসমঙ্গীভূতো. পহিতত্তোতি তস্মিং ৱিসেসাধিগমে পেসিতচিত্তো, তত্থ নিন্নো তপ্পব্ভাৰোতি অত্থো. হুত্ৱা অভাৱাকাৰেনাতি উপ্পত্তিতো পুব্বে অৱিজ্জমানো পচ্চযসমৱাযেন হুত্ৱা উপ্পজ্জিত্ৱা ভঙ্গুপৰমসঙ্খাতেন অভাৱাকাৰেন. অনিচ্চন্তি নিচ্চধুৱতাভাৱতো. উপ্পাদৱযৱন্ততাযাতি খণে খণে উপ্পজ্জিত্ৱা নিৰুজ্ঝনতো. তাৱকালিকতাযাতি তঙ্খণিকতায. ৱিপৰিণামকোটিযাতি ৱিপৰিণামৱন্ততায. চক্খুঞ্হি উপাদায ৱিকাৰাপজ্জনেন ৱিপৰিণমন্তং ৱিনাসং পটিপীড়ং পাপুণাতি. নিচ্চপটিক্খেপতোতি নিচ্চতায পটিক্খিপিতব্বতো লেসমত্তস্সপি অনুপলব্ভনতো. দুক্খমনট্ঠেনাতি নিৰন্তৰদুক্খতায দুক্খেন খমিতব্বতো. দুক্খৱত্থুকট্ঠেনাতি নানপ্পকাৰদুক্খাধিট্ঠানতো. সততসম্পীড়নট্ঠেনাতি অভিণ্হতাপসভাৱতো. সুখপটিক্খেপেনাতি সুখভাৱস্স পটিক্খিপিতব্বতো. তণ্হাগাহো মমংকাৰভাৱতো. মানগাহো অহংকাৰভাৱতো. দিট্ঠিগাহো ‘‘অত্তা মে’’তি ৱিপল্লাসভাৱতো. ৱিৰাগৱসেনাতি ৱিৰাগগ্গহণেন. তথা ৱিমুত্তিৱসেনাতি ৱিমুত্তিগ্গহণেন.

পসাদাৱ গহিতা দ্ৱাৰভাৱপ্পত্তস্স অধিপ্পেতত্তা. সম্মসনচাৰচিত্তং দ্ৱাৰভূতমনোতি অধিপ্পাযো.

ছট্ঠে আৰম্মণে তেভূমকধম্মা সম্মসনচাৰস্স অধিপ্পেতত্তা. যথা পঠমসুত্তে পঞ্চ পসাদা গহিতা, ন সসম্ভাৰচক্খুআদযো, এৱং ততিযসুত্তে ন পসাদৱত্থুকচিত্তমেৱ গহিতং. ন তংসম্পযুত্তা ধম্মা. এৱঞ্হি অৱধাৰণং সাত্থকং হোতি অঞ্ঞথা তেন অপনেতব্বস্স অভাৱতো. সব্বত্থাতি সব্বেসু চতুত্থসুত্তাদীসু. জৱনপ্পত্তাতি জৱনচিত্তসংযুত্তা.

চক্খুসুত্তাদিৱণ্ণনা নিট্ঠিতা.