২. অভিসমযসংযুত্তং

১. নখসিখাসুত্তৱণ্ণনা

৭৪. সুখুমাতি তৰুণা পৰিত্তা কেসগ্গমত্তভাৱতো. যথা কেসা দীঘসো দ্ৱঙ্গুলমত্তায সব্বস্মিং কালে এতপ্পমাণাৱ, ন তচ্ছিন্দনং, এৱং নখগ্গাপি কেসগ্গমত্তাৱ, ন তেসং ছিন্দনং অৱড্ঢনতো. পৰতোতি ‘‘সহস্সিমং সতসহস্সিম’’ন্তি ৱুত্তট্ঠানে. অভিসমেত্ৱাতি পটিৱিজ্ঝিত্ৱা, তস্মা অভিসমেতাৱিনো পটিৱিদ্ধসচ্চস্সাতি অত্থো. কামং পুৰিমপদং দুক্খক্খন্ধস্স অতীতভাৱং উপাদাযপি ৱত্তুং যুত্তং. পুৰেতৰংযেৱ পন ৱুত্তভাৱং উপাদায ৱুত্তন্তি দস্সেতুং ‘‘পুৰিমং দুক্খক্খন্ধ’’ন্তিআদি ৱুত্তং. পুৰিমং নাম পচ্ছিমং অপেক্খিত্ৱা. পুৰিমপচ্ছিমতা হি তং তং উপাদায ৱুচ্চতীতি ইধাধিপ্পেতং পুৰিমং নীহৰিত্ৱা দস্সেতুং ‘‘কতমং পনা’’তিআদি ৱুত্তং. ‘‘অতীতম্পি পৰিক্খীণ’’ন্তি ইধাধিপ্পেতং পৰিক্খীণমেৱ ৱিভাৱেতুং ‘‘কতমং পন পৰিক্খীণ’’ন্তিআদি ৱুত্তং. সোতাপন্নস্স দুক্খক্খযো ইধ চোদিতোতি তং দস্সেতুং ‘‘পঠমমগ্গস্স অভাৱিতত্তা উপ্পজ্জেয্যা’’তি ৱত্ৱা ইদানি তং সৰূপতো দস্সেতুং পুন ‘‘কতম’’ন্তিআদি ৱুত্তং. সত্তসু অত্তভাৱেসু যং অপাযে উপ্পজ্জেয্য অট্ঠমং পটিসন্ধিং আদিং কত্ৱা যত্থ কত্থচি অপাযেসু চাতি যং দুক্খং উপ্পজ্জেয্য, তং সব্বং পৰিক্খীণন্তি দট্ঠব্বং. অস্সাতি সোতাপন্নস্স, যং পৰিমাণং, ততো উদ্ধঞ্চ উপপাতং অত্থীতি অধিপ্পাযো. মহা অত্থো গুণো মহত্থো, সো এতস্স অত্থীতি মহত্থিযো ক-কাৰস্স য-কাৰং কত্ৱা. তেনাহ ‘‘মহতো অত্থস্স নিপ্ফাদকো’’তি.

নখসিখাসুত্তৱণ্ণনা নিট্ঠিতা.

২. পোক্খৰণীসুত্তৱণ্ণনা

৭৫. উব্বেধেনাতি অৱৱেধেন অধোদিসতায. তেনাহ ‘‘গম্ভীৰতাযা’’তি.

পোক্খৰণীসুত্তৱণ্ণনা নিট্ঠিতা.

৩. সংভেজ্জউদকসুত্তাদিৱণ্ণনা

৭৬-৭৭. সম্ভিজ্জট্ঠানেতি সম্ভিজ্জসমোধানগতট্ঠানে. সমেন্তি সমেতা হোন্তি. তেনাহ ‘‘সমাগচ্ছন্তী’’তি. পাড়িযং ৱিভত্তিলোপেন নিদ্দেসোতি তমত্থং দস্সেন্তো ‘‘তীণি ৱা’’তি আহ. সম্ভিজ্জতি মিস্সীভাৱং গচ্ছতি এত্থাতি সম্ভেজ্জং, মিস্সিতট্ঠানং. তত্থ উদকং সম্ভেজ্জউদকং. তেনাহ ‘‘সম্ভিন্নট্ঠানে উদক’’ন্তি.

সংভেজ্জউদকসুত্তাদিৱণ্ণনা নিট্ঠিতা.

৪. পথৱীসুত্তাদিৱণ্ণনা

৭৮-৮৪. চক্কৱাড়ব্ভন্তৰাযাতি চক্কৱাড়পব্বতস্স অন্তোগধায.

ছট্ঠাদীসু ৱুত্তনযেনেৱাতি ইধ ছট্ঠসুত্তাদীসু পঠমসুত্তাদীসু ৱুত্তনযেনেৱাতি অত্থো ৱেদিতব্বো ৱিসেসাভাৱতো.

পৰিযোসানেতি ইমস্স অভিসমযসংযুত্তস্স ওসানট্ঠানে. অঞ্ঞতিত্থিযসমণব্ৰাহ্মণপৰিব্বাজকানন্তি অঞ্ঞতিত্থিযানং. গুণাধিগমোতি ঝানাভিঞ্ঞাসহিতো গুণাধিগমো. সতভাগম্পি…পে… ন উপগচ্ছতি সচ্চপটিৱেধস্স মহানুভাৱত্তা. তেনাহ ভগৱা পচ্চক্খসব্বধম্মো ‘‘এৱং মহাধিগমো, ভিক্খৱে, দিট্ঠিসম্পন্নো পুগ্গলো এৱং মহাভিঞ্ঞো’’তি.

পথৱীসুত্তাদিৱণ্ণনা নিট্ঠিতা.

সাৰত্থপ্পকাসিনিযা সংযুত্তনিকায-অট্ঠকথায

অভিসমযসংযুত্তৱণ্ণনায লীনত্থপ্পকাসনা সমত্তা.