৩. ঘটসুত্তৱণ্ণনা

২৩৭. পৰিৱেণগ্গেনাতি পৰিৱেণভাগেন. কেচি ‘‘একৱিহাৰেতি একচ্ছন্নে একস্মিং আৱাসে’’তি ৱদন্তি. তেতি তে দ্ৱেপি থেৰা. পাটিযেক্কেসু ঠানেসূতি ৱিসুং ৱিসুং ঠানেসু. নিসীদন্তীতি দিৱাৱিহাৰং নিসীদন্তি. ওড়াৰিকো নাম জাতো পৰিত্তধম্মাৰম্মণত্তা তস্স. তেতি থেৰো ভগৱা চ.

পৰিপুণ্ণৱীৰিযোতি চতুকিচ্চসাধনৱসেন সম্পুণ্ণৱীৰিযো. পগ্গহিতৱীৰিযোতি ঈসকম্পি সঙ্কোচং অনাপজ্জিত্ৱা পৱত্তিতৱীৰিযো. উপনিক্খেপনমত্তস্সেৱাতি সমীপে ঠপনমত্তস্সেৱ.

চতুভূমকধম্মেসু লব্ভমানত্তা পঞ্ঞায ‘‘চতুভূমকধম্মে অনুপৱিসিত্ৱা ঠিতট্ঠেনা’’তি ৱুত্তং. লক্খিতব্বট্ঠেন সমাধি এৱ সমাধিলক্খণং. এৱং ৱিপস্সনালক্খণং ৱেদিতব্বং. অঞ্ঞমঞ্ঞস্সাতি অঞ্ঞস্স অঞ্ঞস্স নানালক্খণাতি ৱেদিতব্বং. অঞ্ঞস্সাতি ইতৰস্স. ধুৰন্তি ৱহিতব্বভাৰং. দ্ৱীসুপি এতেসূতি সমাধিলক্খণৱিপস্সনালক্খণেসু সম্মাসম্বুদ্ধো নিপ্ফত্তিং গতো.

ঘটসুত্তৱণ্ণনা নিট্ঠিতা.