১. নিক্খন্তসুত্তৱণ্ণনা

২০৯. আড়ৱিযন্তি আড়ৱিনগৰসমীপে. অগ্গচেতিযেতি গোতমকচেতিযাদীহি উত্তমচেতিযে. তং কিৰ ভূমিৰামণেয্যকভাৱেন মনুঞ্ঞতায পধানযুত্ততাদিসম্পত্তিযা চ ইতৰচেতিযেহি সেট্ঠসম্মতং. কপ্পত্থেৰেনাতি ‘‘কপ্পো’’তি গোত্ততো আগতনামো থেৰো, সহস্সপুৰাণজটিলানং অব্ভন্তৰে অযং মহাথেৰো. ওহীনকোতি থেৰেসু গামং পিণ্ডায পৱিট্ঠেসু ৱিহাৰে এৱ অৱহীনকো ঠিতো. তত্থ কাৰণমাহ ‘‘ৱিহাৰপালো’’তিআদি. সমলঙ্কৰিত্ৱাতি সমং অলঙ্কাৰেন অলঙ্কৰিত্ৱা. কুসলচিত্তং ৱিদ্ধংসেতি পৱত্তিতুং অপ্পদানৱসেন. এতস্মিন্তি এতস্মিং ৰাগে উপ্পন্নে. ‘‘একস্মি’’ন্তি ৱা পাঠো, একস্মিং ৱিসভাগৱত্থুকে ৰাগে উপ্পন্নে. ধম্মো ৱাতি মম চিত্তে উপ্পজ্জনকতো অঞ্ঞো ধম্মো ৱা. যেন কাৰণেন পৰো অনভিৰতিং ৱিনোদেত্ৱা ইদানেৱ অভিৰতিং উপ্পাদেয্য, তং কাৰণং কুতো লব্ভাতি যোজনা, তং কাৰণং নত্থীতি অত্থো, তস্স অভাৱকাৰণৱচনং.

অনগাৰিযন্তি অগাৰৱিৰহতো অনগাৰং পব্বজ্জা. তত্থ নিযুত্তত্তা অনগাৰিযং ক-কাৰস্স য-কাৰং কত্ৱা, পব্বজিতন্তি অত্থো. আধাৱন্তীতি হদযং অভিভৱিত্ৱা ধাৱন্তি. উগ্গতানন্তি উড়াৰানং পুত্তা. তেনাহ ‘‘মহেসক্খা ৰাজঞ্ঞভূতা’’তি. উত্তমপ্পমাণন্তি সহস্সপলং সমন্তাতি সমন্ততো. পৰিকিৰেয্যুন্তি ৱিজ্ঝেয্যুং. এতস্মা সহস্সাতি যথাৱুত্তা ধনুগ্গহসহস্সতো. অতিৰেকতৰা অনেকসহস্সা. ইত্থিযো ওলোকনসিতলপিতৰোদিতসৰে খিপন্তিযো. নেৱ মং ব্যাধযিস্সন্তি নেৱ মং নিজ্ঝাযিস্সন্তি. ‘‘ব্যাধযিস্সতী’’তি পাঠোতি ৱুত্তং ‘‘চালেতুং ন সক্খিস্সতীতি অত্থো’’তি. ধম্মে সম্হীতি সকে সন্তিকে পতিট্ঠিতে সাসনধম্মে. তেনাহ ‘‘অনভিৰতিংৱিনোদেত্ৱা’’তিআদি.

মগ্গন্তি ‘‘মগ্গো’’তি ৱত্তব্বে লিঙ্গৱিপল্লাসেন ৱুত্তং. তেনাহ ‘‘সো হি নিব্বানস্স পুব্বভাগমগ্গ্গো’’তি.

নিক্খন্তসুত্তৱণ্ণনা নিট্ঠিতা.