৪. মণিভদ্দসুত্তৱণ্ণনা

২৩৮. সুখং পটিলভতীতি দিট্ঠধম্মিকাদিভেদং সুখং অধিগচ্ছতি. নিচ্চমেৱ সেয্যো সতিমতো আযতিং হিতচৰণতো. মণিভদ্দো ‘‘সতিমাপুগ্গলো সতোকাৰী সম্পতি ৱেৰং নপ্পসৱতী’’তি অধিপ্পাযেন ‘‘ৱেৰা চ পৰিমুচ্চতী’’তি আহ. ভগৱা পন সতিমন্ততাসিদ্ধিযা ৱেৰপৰিমুচ্চনং ন অচ্চন্তিকং, নাপি একন্তিকং পটিপক্খেন পৰতো চ অপ্পহীনত্তাতি তং নিসেধেন্তো ‘‘ৱেৰা চ ন পৰিমুচ্চতী’’তি ৱত্ৱা, যং অচ্চন্তিকং একন্তিকঞ্চ পৰস্স ৱসেন ৱেৰপৰিমুচ্চনং, তং দস্সেন্তো ‘‘যস্সা’’তি গাথমাহ. কৰুণাযাতি অপ্পনাপ্পত্তায কৰুণায. কৰুণাপুব্বভাগেতি কৰুণাভাৱনায ৱসেন উপ্পাদিতপঠমজ্ঝানূপচাৰে. সোতি কৰুণাভাৱনং ভাৱেন্তো পুগ্গলো. মেত্তংসোতি মেত্তচিত্তং অংসো একো কুসলকোট্ঠাসো এতস্সাতি মেত্তংসো. তস্স কেনচীতি তস্স অৰহতো কৰুণায মেত্তাভাৱনায চ সাতিসযত্তা তদভাৱেন কেনচি পুগ্গলেন সদ্ধিং ৱেৰপ্পসঙ্গো নাম নত্থি. ইমিনা খীণাসৱেপি মেত্তাকৰুণাভাৱনাৰহিতে কোচি অত্তনো চিত্তদোসেন ৱেৰং কৰেয্য, ন পন তস্মিং মেত্তাকৰুণাচেতোৱিমুত্তিসমন্নাগতে কোচি ৱেৰং কৰেয্য. এৱং মহিদ্ধিকা ব্ৰহ্মৱিহাৰভাৱনাতি দস্সেতি.

মণিভদ্দসুত্তৱণ্ণনা নিট্ঠিতা.