৯. পাথেয্যসুত্তৱণ্ণনা

৭৯. সদ্ধা বন্ধতি পাথেয্যন্তি সদ্ধা নাম সত্তস্স মৰণৱসেন মহাপথং সংৱজতো মহাকন্তাৰং পটিপজ্জতো মহাৱিদুগ্গং পক্খন্দতো পাথেয্যপুটং বন্ধতি সম্বলং সজ্জেতি. কথন্তি আহ ‘‘সদ্ধং উপ্পাদেত্ৱা’’তিআদি. এতং ৱুত্তন্তি ‘‘সদ্ধা বন্ধতি পাথেয্য’’ন্তি এতং গাথাপদং ৱুত্তং ভগৱতা. সিৰীতি কতপুঞ্ঞেহি সেৱীযতি তেহি পটিলভীযতীতি সিৰী. ইস্সৰিযং ৱিভৱো. আসযিতব্বতো আসযো, ৱসনট্ঠানং নিকেতন্তি অত্থো. পৰিকড্ঢতীতি ইচ্ছাৱসিকং পুগ্গলং তত্থ তত্থ উপকড্ঢতি.

পাথেয্যসুত্তৱণ্ণনা নিট্ঠিতা.