৩. মিত্তসুত্তৱণ্ণনা

৫৩. সহ অত্থেন ৱত্ততীতি সত্থো, ভণ্ডমূলং গহেত্ৱা ৱাণিজ্জৱসেন দেসন্তৰাদীসু ৱিচৰণকজনসমূহো. তেনাহ ‘‘সদ্ধিংচৰো’’তি, সহচৰণকোতি অত্থো. মিত্তন্তি সিনেহযোগেন মিত্তকিচ্চযুত্তং. ইধাধিপ্পেতপ্পকাৰং দস্সেতুং ‘‘ৰোগে উপ্পন্নে’’তিআদি ৱুত্তং. তথাৰূপেতি জিগুচ্ছনীযে, দুত্তিকিচ্ছে ৱা. যথা অসণ্ঠিতানং সণ্ঠাপনৱসেন পৱসতো পুৰিসস্স ভোগব্যসনে নাথতা, এৱং পুত্তসিনেহৱসেন পুত্তস্স মাতুযা অন্তোগেহে নাথতাতি ৱুত্তং ‘‘মাতা মিত্তং সকে ঘৰে’’তি. অত্থজাতস্সাতি উপট্ঠিতপযোজনস্সাতি অত্থোতি আহ ‘‘উপ্পন্নকিচ্চস্সা’’তি. সম্পৰাযহিতন্তি সম্পৰাযে হিতাৱহং.

মিত্তসুত্তৱণ্ণনা নিট্ঠিতা.