৬. জাগৰসুত্তৱণ্ণনা

৬. জাগৰতন্তি অনাদৰে সামিৱচনং. তেনাহ ‘‘ইন্দ্ৰিযেসু জাগৰন্তেসূ’’তি. ‘‘ৱিস্সজ্জনগাথাযং পনা’’তি ইমস্স পদস্স ‘‘অযমত্থো ৱেদিতব্বো’’তি ইমিনা সম্বন্ধো. পুচ্ছাগাথায পন অত্থো ইমিনাৱ নযেন ৱিঞ্ঞাযতীতি অধিপ্পাযো. পঞ্চ জাগৰতং সুত্তাতি এত্থ ‘‘সুত্তা’’তি পদং অপেক্খিত্ৱা পঞ্চাতি পচ্চত্তৱচনং ‘‘জাগৰত’’ন্তি পদং অপেক্খিত্ৱা সামিৱসেন পৰিণামেতব্বং ‘‘পঞ্চন্নং জাগৰত’’ন্তি. তেনাহ – ‘‘পঞ্চসু ইন্দ্ৰিযেসু জাগৰন্তেসূ’’তি, জাগৰন্তেসু বদ্ধাভাৱেন সকিচ্চপ্পসুততায সকিচ্চসমত্থতায চাতি অত্থো. সোত্তংৱ সুত্তা পমাদনিদ্দাভাৱতো. তমেৱ সুত্তভাৱং পুগ্গলাধিট্ঠানায কথায দস্সেতুং ‘‘কস্মা’’তিআদি ৱুত্তং. পমজ্জতি, পমাদো ৱা এতস্স অত্থীতি পমাদো, তস্স ভাৱো পমাদতা, তায, পমত্তভাৱেনাতি অত্থো.

এৱং গাথায পঠমস্স পাদস্স অত্থং ৱত্ৱা দুতিযস্স ৱত্তুং ‘‘এৱং সুত্তেসূ’’তিআদি ৱুত্তং. তস্সত্থো ৱুত্তনযেন ৱেদিতব্বো. যস্মা অপ্পহীনসুপনকিৰিযাৱসেন সনীৱৰণস্স পুগ্গলস্স অনুপ্পন্নৰাগৰজাদযো উপ্পজ্জন্তি, উপ্পন্না পৱড্ঢন্তি, তস্মা ৱুত্তং ‘‘নীৱৰণেহেৱ কিলেসৰজং আদিযতী’’তি. তেনেৱাহ ‘‘পুৰিমা’’তিআদি. পুৰিমানং পচ্ছিমানং অপৰাপৰুপ্পত্তিযা পচ্চযভাৱো হেত্থ আদিযনং. পঞ্চহি ইন্দ্ৰিযেহি পৰিসুজ্ঝতীতি মগ্গপৰিযাপন্নেহি সদ্ধাদীহি পঞ্চহি ইন্দ্ৰিযেহি সকলসংকিলেসতো ৱিসুজ্ঝতি. পঞ্ঞিন্দ্ৰিযমেৱ হি অনঞ্ঞাতঞ্ঞস্সামীতিন্দ্ৰিযাদীনি, ইতৰানি চ অন্ৱযানীতি.

জাগৰসুত্তৱণ্ণনা নিট্ঠিতা.