৭. অপ্পটিৱিদিতসুত্তৱণ্ণনা

৭. পৱত্তিনিৱত্তিতদুভযহেতুৱিভাগস্স ধম্মস্সপি চতুসচ্চন্তোগধত্তা আহ ‘‘ধম্মাতি চতুসচ্চধম্মা’’তি. চত্তাৰিপি হি অৰিযসচ্চানি চতুসচ্চন্তোগধানি. অপ্পটিৱিদ্ধাতি পৰিঞ্ঞাভিসমযাদিৱসেন অনভিসমিতা. দিট্ঠিগতৱাদেসূতি দিট্ঠিগতসঞ্ঞিতেসু ৱাদেসু. দিট্ঠিগতেহি তে পৱত্তিতা. ইতো পৰেসন্তি ইতো সাসনিকেহি পৰেসং অঞ্ঞেসং. ধম্মতাযাতি সভাৱেন, সযমেৱাতি অত্থো. গচ্ছন্তীতি পৱত্তন্তি দিট্ঠিৱাদং পগ্গয্হ তিট্ঠন্তি. পৰেনাতি দিট্ঠিগতিকেন. নীযন্তীতি দিট্ঠিৱাদসঙ্গণ্হনে উয্যোজীযন্তি. তেনাহ ‘‘তত্থা’’তিআদি. পবুজ্ঝিতুন্তি পমাদনিদ্দায পটিবুজ্ঝিতুং. পটিপদা যথাদেসিতস্স ধম্মস্স কথিততায, পটিবুজ্ঝিতুং যোনিসো পৱত্তিযমানত্তা ভদ্দিকা.

হেতুনাতি ঞাযেন. কাৰণেনাতি চতুসচ্চানং সম্বোধযুত্তিযা. হত্থতলে আমলকং ৱিয সব্বং ঞেয্যং জানাতীতি সব্বঞ্ঞূ, তেনেৱ সব্বঞ্ঞুতাভিসম্বোধেন বুদ্ধোতি সব্বঞ্ঞুবুদ্ধো. পচ্চেকং পৰেহি অসাধাৰণতায ৱিসুং সযম্ভুঞাণেন সচ্চানি বুদ্ধৱাতি পচ্চেকবুদ্ধো. পৰোপদেসেন চতুসচ্চং বুজ্ঝতীতি চতুসচ্চবুদ্ধো. তথা হি সো সযম্ভুতায অভাৱতো কেৱলং চতুসচ্চবুদ্ধোতি ৱুচ্চতি. সুতেন সুতমযঞাণেন খন্ধাদিভেদং ঞেয্যং বুদ্ধৱাতি সুতবুদ্ধো. সব্বঞ্ঞুবুদ্ধপচ্চেকবুদ্ধে ঠপেত্ৱা অৱসেসা অগ্গসাৱকমহাসাৱকাপি পকতিসাৱকাপি ৱীতৰাগা অৱসেসা খীণাসৱা. তযোপি পুৰিমা ৱট্টন্তি সম্বুদ্ধাতিআদিৱচনতো. সন্নিৱসতি এতেনাতি সন্নিৱাসো, চৰিতং. লোকস্স সন্নিৱাসো লোকসন্নিৱাসো, তস্মিং. কাযদুচ্চৰিতাদিভেদে ৱিসমে. সতিসম্মোসেন ৱিসমে ৱা সত্তনিকাযে. সো হি ৱিসমযোগতো ৱিসমো. ৰাগৱিসমাদিকে ৱিসমে ৱা কিলেসজাতে. তং ৱিসমং পহায তং ৱিসমং অজ্ঝুপেক্খিত্ৱা সমং সদিসং যুত্তৰূপং, পুৰিমকেহি ৱা সম্বুদ্ধেহি সমং সদিসং চৰন্তি ৱত্তন্তি.

অপ্পটিৱিদিতসুত্তৱণ্ণনা নিট্ঠিতা.