৫. কতিছিন্দসুত্তৱণ্ণনা

৫. ছিন্দন্তোতি সমুচ্ছিন্দন্তো. কতি ছিন্দেয্যাতি কিত্তকে পাপধম্মে সমুচ্ছিন্দেয্য, অনুপ্পত্তিধম্মতং পাপেয্য. সেসপদেসুপীতি সেসেসুপি দ্ৱীসু পদেসু. জহন্তো কতি জহেয্য, ভাৱেন্তো কতি উত্তৰি ভাৱেয্যাতি ইমমত্থং ‘‘এসেৱ নযো’’তি ইমিনা অতিদিসতি. চতুত্থপদস্স পন অত্থো সৰূপেনেৱ দস্সিতো. অত্থতো একন্তি ভাৱত্থতো একং. যদি এৱং কিমত্থং পৰিযাযন্তৰং গহিতন্তি আহ ‘‘গাথাবন্ধস্স পনা’’তিআদি. অত্থতো এত্থ পুনৰুত্তি অত্থেৱাতি আহ ‘‘সদ্দপুনৰুত্তিং ৱজ্জযন্তী’’তি. সঙ্গং অতিক্কমযতীতি সঙ্গাতিগোতি আহ ‘‘অযমেৱত্থো’’তি.

ওৰং ৱুচ্চতি কামধাতু, পটিসন্ধিযা পচ্চযভাৱেন তঞ্চ ভজন্তীতি ওৰম্ভাগিযানি. তত্থ চ কম্মং তব্বিপাকং সত্তে দুক্খং, কম্মুনা ৱিপাকং, সত্তেন দুক্খং সংযোজেন্তীতি সংযোজনানি, সক্কাযদিট্ঠি-ৱিচিকিচ্ছা-সীলব্বতপৰামাস-কামৰাগ-পটিঘা. উদ্ধং ৱুচ্চতি চতস্সো অৰূপধাতুযো, ৱুত্তনযেন তং ভজন্তীতি উদ্ধম্ভাগিযানি, সংযোজনানি ৰূপাৰূপৰাগমানুদ্ধচ্চাৱিজ্জা. আৰোপিতৱচনানুৰূপেনেৱ এৱমাহাতি ‘‘পঞ্চ ছিন্দে পঞ্চ জহে’’তি এৱং কথেসি তস্সা দেৱতায সুখগ্গহণত্থং. ন কেৱলং তায দেৱতায ৱুত্তৱচনানুৰূপতো এৱ, অথ খো তেসু সংযোজনেসু ৱত্তব্বাকাৰতোপীতি দস্সেতুং ‘‘অথ ৱা’’তিআদি ৱুত্তং. তেন ওৰম্ভাগিযসংযোজনানি নাম গৰূনি দুচ্ছেদানি গাড়্হবন্ধনভাৱতো, তস্মা তানি সন্ধায ‘‘পঞ্চ ছিন্দে’’তি ৱুত্তং.

উদ্ধম্ভাগিযসংযোজনানি পন লহূনি সুচ্ছেদানি হেট্ঠা পৱত্তিতানুক্কমেন ভাৱনানযেন পহাতব্বতো, তস্মা তানি সন্ধায ‘‘পঞ্চ জহে’’তি ৱুত্তং. তেনাহ ‘‘পাদেসু বদ্ধপাসসকুণো ৱিযা’’তিআদি. ৱিসেসন্তি ভাৱনানং ৱিসেসং ৱিপস্সনাভাৱনং ভাৱেন্তো উপ্পাদেন্তো ৱিপচ্চেন্তো ৱড্ঢেন্তো চ. সংসাৰপঙ্কে সঞ্জনট্ঠেন ৰাগো এৱ সঙ্গো ‘‘ৰাগসঙ্গো’’. এস নযো সেসেসুপি. যস্মা এত্থ ৰাগ-মোহ-দিট্ঠি-তব্ভাগিযসক্কাযদিট্ঠি-সীলব্বতপৰামাস-কামৰাগাৱিজ্জা অত্থতো ওঘা এৱ, ইতৰে তদেকট্ঠা, তস্মা ভগৱা সংযোজনপ্পহানসঙ্গাতিক্কমেহি ওঘতৰণং কথেসি. লোকিযলোকুত্তৰানি কথিতানি ‘‘ভাৱযে’’তি পুব্বভাগায মগ্গভাৱনায অধিপ্পেতত্তা.

কতিছিন্দসুত্তৱণ্ণনা নিট্ঠিতা.