১০. অৰঞ্ঞসুত্তৱণ্ণনা

১০. সন্তকিলেসানন্তি ৱূপসন্তকিলেসপৰিড়াহানং. যস্মা সীলাদিগুণসম্ভৱং ততো এৱ ভযসন্তঞ্চ উপাদায পণ্ডিতা ‘‘সন্তো’’তি ৱুচ্চন্তি, তস্মা ৱুত্তং ‘‘পণ্ডিতানং ৱা’’তি. তেনাহ ‘‘সন্তো হৱে’’তিআদি. সেট্ঠচাৰীনন্তি সেট্ঠচৰিযং চৰন্তানং. যস্মা পুথুজ্জনকল্যাণতো পট্ঠায ভিক্খু মগ্গব্ৰহ্মচৰিযৱাসং ৱসতি নাম, তস্মা আহ ‘‘মগ্গব্ৰহ্মচৰিযৱাসং ৱসন্তান’’ন্তি. অৰিযানং পন মুখৱণ্ণস্স পসীদনে ৱত্তব্বমেৱ নত্থি. মূলকম্মট্ঠানন্তি পাৰিহাৰিযকম্মট্ঠানং. ৱিসভাগসন্ততীতি নানাৰম্মণেসু পৱত্তচিত্তসন্ততি. সা হি ৱিক্খেপব্যাকুলতায অপ্পসন্না সমাহিতচিত্তসন্ততিযা ৱিসভাগসন্ততি. ওক্কমতীতি সমাধিসভাগা চিত্তসন্ততি সমথৱীথিং অনুপৱিসতি. চিত্তং পসীদতীতি কম্মট্ঠাননিৰতং ভাৱনাচিত্তং সন্ধাযাহ, তং পসন্নং হুত্ৱা পৱত্ততি. লোহিতং পসীদতীতি চিত্তকালুস্সিযস্সাভাৱতো লোহিতং অনাৱিলং হোতি. পৰিসুদ্ধানি হোন্তি কাৰণস্স পৰিসুদ্ধভাৱতো. তালফলমুখস্স ৱিয মুখস্স ৱণ্ণো হোতীতি মুখ-সদ্দস্স আদিম্হি পমুত্তপদেন যোজেতব্বো. এৱঞ্হি চস্স পমুত্তগ্গহণং সমত্থিতং হোতি তালফলমুখস্স ৱণ্ণসম্পদাসদিসত্তা. তিভূমকো এৱ তেভূমকো.

অতীতং নানুসোচন্তি অতীতং পচ্চযলাভং লক্খণং কত্ৱা ন সোচন্তি ন অনুত্থুনন্তি. জপ্পনতণ্হায ৱসেন ন পৰিকপ্পন্তীতি আহ ‘‘ন পত্থেন্তী’’তি. যেন কেনচীতি ইতৰীতৰেন. তঙ্খণে লদ্ধেনাতি সন্নিধিকাৰপৰিভোগাভাৱমাহ. তিৱিধেনপি কাৰণেনাতি তিপ্পকাৰেন হেতুনা, তিলক্খণসন্তোসনিমিত্তন্তি অত্থো.

ৱিনাসন্তি ৱিনাসনহেতুং. ৱিনস্সন্তি এতেহীতি ৱিনাসো, লোভদোসা তদেকট্ঠা চ পাপধম্মা. অৰূপকাযস্স ৱিয ৰূপকাযস্সপি ৱিসেসতো সুক্খভাৱকাৰণন্তি আহ ‘‘এতেন কাৰণদ্ৱযেনা’’তি. লুতোতি লূনো.

অৰঞ্ঞসুত্তৱণ্ণনা নিট্ঠিতা.

নড়ৱগ্গৱণ্ণনা নিট্ঠিতা.