৬. ৱত্তাদিকণ্ডনিদ্দেসো

৯৬. উপজ্ঝাচৰিযৱত্তঞ্চ, গমিকাগন্তুকম্পি চ;

সেনাসনাদিৱত্তঞ্চ, কাতব্বং পিযসীলিনা.

৯৭. হত্থপাসে ঠিতো কিঞ্চি, গহিতব্বং দদে তিধা;

গহেতুকামো গণ্হেয্য, দ্ৱিধাযং সম্পটিগ্গহো.

৯৮. সঙ্ঘাটিমুত্তৰাসঙ্গং, তথা অন্তৰৱাসকং;

‘‘এতং ইমং অধিট্ঠামি’’, তথা ‘‘পচ্চুদ্ধৰামি’’তি.

৯৯. ‘‘ইমং ইমানি এতানি, এতম্পি চীৱৰ’’ন্তি ৱা;

‘‘পৰিক্খাৰচোড়ানী’’তি, তথা ‘‘পচ্চুদ্ধৰামি’’তি.

১০০. ‘‘এতং ইমং অধিট্ঠামি, পত্তং পচ্চুদ্ধৰামি’’তি;

এৱং পচ্চুদ্ধৰেধিট্ঠে, চীৱৰাদিং যথাৱিধি.

১০১. সঞ্চৰিত্তং ৱিনা সেসা, সচিত্তা গৰুকন্তিমা;

অচ্ছিন্নং পৰিণতং হিত্ৱা, নিস্সগ্গিযমচিত্তকং.

১০২. পদসোধম্মং দুৱে সেয্যা, ইত্থিযা ধম্মদেসনা;

দুৱে সেনাসনানীপি, সিব্বনং চীৱৰস্সপি.

১০৩. পৱাৰিতং সুৰাপানং, পঞ্চসন্নিধিআদিকং;

জোতিনুজ্জালনঞ্চেৱ, কপ্পবিন্দুমনাদিকং;

গামপ্পৱেসনন্তেতে, পাচিত্তীসু অচিত্তকা.

১০৪. পকিণ্ণকেসু উদ্দিস্স-কতং হিত্ৱাঞ্ঞমংসকং;

একত্থৰণপাৱুৰণং, একমঞ্চে তুৱট্টনং;

একতো ভুঞ্জনঞ্চাপি, নচ্চগীতাদিসত্তপি.

১০৫. অকাযবন্ধনঞ্চাপি, পত্তহত্থকৱাটকং;

অচিত্তকমিদং সব্বং, সেসমেত্থ সচিত্তকং.

১০৬. ৱীতিক্কমনচিত্তেন, সচিত্তকমচিত্তকং;

পঞ্ঞত্তিজাননেনাপি, ৱদন্তাচৰিযা তথা.

১০৭. পুব্বকৰণাদিকং কত্ৱা, উপোসথপ্পৱাৰণং;

নৱধা দীপিতং সব্বং, কাতব্বং পিযসীলিনা.

১০৮. সম্মজ্জনী পদীপো চ, উদকং আসনেন চ;

উপোসথস্স এতানি, পুব্বকৰণন্তি ৱুচ্চতি.

১০৯. ছন্দপাৰিসুদ্ধিউতুক্খানং, ভিক্খুগণনা চ ওৱাদো;

উপোসথস্স এতানি, পুব্বকিচ্চন্তি ৱুচ্চতি.

১১০. উপোসথো যাৱতিকা চ ভিক্খূ কম্মপ্পত্তা,

সভাগাপত্তিযো চ ন ৱিজ্জন্তি;

ৱজ্জনীযা চ পুগ্গলা তস্মিং ন হোন্তি,

পত্তকল্লন্তি ৱুচ্চতি.

১১১. পুব্বকৰণপুব্বকিচ্চানি সমাপেত্ৱা দেসিতাপত্তিকস্স সমগ্গস্স ভিক্খুসঙ্ঘস্স অনুমতিযা পাতিমোক্খং উদ্দিসিতুং আৰাধনং কৰোম.

১১২. পাৰিসুদ্ধিঅধিট্ঠান-সুত্তুদ্দেসৱসা তিধা;

গণপুগ্গলসঙ্ঘা চ, তং কৰেয্যুং যথাক্কমং.

১১৩. চাতুদ্দসো পন্নৰসো, সামগ্গী দিনতো তিধা;

দিনপুগ্গলকত্তব্বা-কাৰতো তে নৱেৰিতা.

১১৪. তযো তযোতি কত্ৱান, দিনপুগ্গলভেদতো;

তেৱাচীদ্ৱেকৱাচীতি, নৱ ৱুত্তা পৱাৰণা.

১১৫. কত্তিকন্তিমপক্খম্হা, হেমং ফগ্গুনপুণ্ণমা;

তস্স অন্তিমপক্খম্হা, গিম্হং আসাড়্হিপুণ্ণমা;

ৱস্সকালং ততো সেসং, চতুৱীসতুপোসথা.

১১৬. চাতুদ্দসা ছ এতেসু, পক্খা ততিযসত্তমা;

ঞেয্যা পন্নৰসা সেসা, অট্ঠাৰস উপোসথা.

১১৭. ‘‘ছন্দং দম্মি, ছন্দং মে হৰ, ছন্দং মে আৰোচেহী’’তি ছন্দং দাতব্বং.

১১৮. ‘‘পাৰিসুদ্ধিং দম্মি, পাৰিসুদ্ধিং মে হৰ, পাৰিসুদ্ধিং মে আৰোচেহী’’তি পাৰিসুদ্ধি দাতব্বা.

১১৯. ‘‘পৱাৰণং দম্মি, পৱাৰণং মে হৰ, পৱাৰণং মে আৰোচেহি, মমত্থায পৱাৰেহী’’তি পৱাৰণা দাতব্বা.

১২০. আপত্তিদেসকেন ‘‘অহং, ভন্তে, সম্বহুলা নানাৱত্থুকা আপত্তিযো আপজ্জিং, তা তুম্হমূলে পটিদেসেমী’’তি ৱত্ৱা পটিগ্গণ্হন্তেন ‘‘পস্সসি, আৱুসো, তা আপত্তিযো’’তি ৱুত্তে ‘‘আম, ভন্তে, পস্সামী’’তি ৱত্ৱা পুন পটিগ্গণ্হন্তেন ‘‘আযতিং, আৱুসো, সংৱৰেয্যাসী’’তি ৱুত্তে ‘‘সাধু, সুট্ঠু, ভন্তে সংৱৰিস্সামী’’তি তিক্খত্তুং ৱত্ৱা দেসেতব্বং.

১২১. ৱেমতিং আৰোচেন্তেন ‘‘অহং, ভন্তে, সম্বহুলাসু নানাৱত্থুকাসু আপত্তীসু ৱেমতিকো, যদা নিব্বেমতিকো ভৱিস্সামি, তদা তা আপত্তিযো পটিকৰিস্সামী’’তি তিক্খত্তুং ৱত্ৱা আৰোচেতব্বং.

১২২. ‘‘অজ্জ মে উপোসথো ‘পন্নৰসো, চাতুদ্দসো’তি ৱা অধিট্ঠামী’’তি তিক্খত্তুং ৱত্ৱা পুগ্গলেন অধিট্ঠানুপোসথো কাতব্বো.

১২৩. দ্ৱীসু পন থেৰেন ‘‘পৰিসুদ্ধো অহং আৱুসো, ‘পৰিসুদ্ধো’তি মং ধাৰেহী’’তি তিক্খত্তুং ৱত্তব্বং. নৱকেনপি তথেৱ ৱত্তব্বং. ‘‘ভন্তে, ধাৰেথা’’তি ৱচনং ৱিসেসো.

১২৪. তীসু পন ‘‘সুণন্তু মে আযস্মন্তা, অজ্জুপোসথো পন্নৰসো, যদাযস্মন্তানং পত্তকল্লং, মযং অঞ্ঞমঞ্ঞং পাৰিসুদ্ধিউপোসথং কৰেয্যামা’’তি ঞত্তিং ঠপেত্ৱা পটিপাটিযা ৱুত্তনযেন পাৰিসুদ্ধিউপোসথো কাতব্বো.

১২৫. ‘‘অজ্জ মে পৱাৰণা ‘চাতুদ্দসী, পন্নৰসী’তি ৱা অধিট্ঠামী’’তি তিক্খত্তুং ৱত্ৱা একেন পৱাৰেতব্বং.

১২৬. দ্ৱীসু পন থেৰেন ‘‘অহং, আৱুসো, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদতু মং আযস্মা অনুকম্পং উপাদায, পস্সন্তো পটিকৰিস্সামী’’তি তিক্খত্তুং ৱত্ৱা পৱাৰেতব্বং. নৱকেনাপি তথেৱ ৱত্তব্বং. ‘‘ভন্তে’’তি ৱচনং ৱিসেসো.

১২৭. তীসু ৱা চতূসু ৱা পন ‘‘সুণন্তু মে আযস্মন্তা, অজ্জ পৱাৰণা পন্নৰসী, যদাযস্মন্তানং পত্তকল্লং, মযং অঞ্ঞমঞ্ঞং পৱাৰেয্যামা’’তি ঞত্তিং ঠপেত্ৱা থেৰেন ‘‘অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তা অনুকম্পং উপাদায, পস্সন্তো পটিকৰিস্সামী’’তি তিক্খত্তুং ৱত্ৱা পৱাৰেতব্বং. নৱকেহিপি তথেৱ পটিপাটিযা পৱাৰেতব্বং. ‘‘ভন্তে’’তিৱচনং ৱিসেসো.

১২৮. চতূহি অধিকেসু পন ‘‘সুণাতু মে আৱুসো সঙ্ঘো, অজ্জ পৱাৰণা পন্নৰসী, যদি সঙ্ঘস্স পত্তকল্লং, সঙ্ঘো পৱাৰেয্যা’’তি ঞত্তিং ঠপেত্ৱা ৱুড্ঢতৰেন ‘‘সঙ্ঘং, আৱুসো, পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তো অনুকম্পং উপাদায, পস্সন্তো পটিকৰিস্সামী’’তি তিক্খত্তুং ৱত্ৱা পৱাৰেতব্বং. নৱকেহিপি তথেৱ পটিপাটিযা ‘‘সঙ্ঘং, ভন্তে, পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তো অনুকম্পং উপাদায, পস্সন্তো পটিকৰিস্সামী’’তি তিক্খত্তুং ৱত্ৱা পৱাৰেতব্বং.

মূলসিক্খা নিট্ঠিতা.

নমো তস্স ভগৱতো অৰহতো সম্মাসম্বুদ্ধস্স