৩. নিস্সগ্গিযনিদ্দেসো

১৭. ৱিকপ্পনমধিট্ঠান-মকত্ৱা কালচীৱৰং;

দসাহমতিমাপেতি, তস্স নিস্সগ্গিযং সিযা.

১৮. ভিক্খুসম্মুতিযাঞ্ঞত্ৰ, তিচীৱৰমধিট্ঠিতং;

একাহমতিমাপেতি, নিস্সগ্গি সমযং ৱিনা.

১৯. অঞ্ঞাতিকা ভিক্খুনিযা, পুৰাণচীৱৰং পন;

ধোৱাপেতি ৰজাপেতি, আকোটাপেতি তং সিযা.

২০. অঞ্ঞাতিকা ভিক্খুনিযা, হত্থতো কিঞ্চি মূলকং;

অদত্ৱা চীৱৰাদানে, নিস্সগ্গিযমুদীৰিতং.

২১. অপ্পৱাৰিতমঞ্ঞাতিং, ৱিঞ্ঞাপেন্তস্স চীৱৰং;

অঞ্ঞত্ৰ সমযা তস্স, নিস্সগ্গিযমুদীৰিতং.

২২. ৰজতং জাতৰূপং ৱা, মাসকং ৱা কহাপণং;

গণ্হেয্য ৱা গণ্হাপেয্য, নিস্সগ্গি সাদিযেয্য ৱা.

২৩. পৰিৱত্তেয্য নিস্সগ্গি, ৰজতাদি চতুব্বিধং;

কপ্পিযং কপ্পিযেনাপি, ঠপেত্ৱা সহধম্মিকে.

২৪. ৱিকপ্পনমধিট্ঠান-মকত্ৱান পমাণিকং;

দসাহমতিমাপেতি, পত্তং নিস্সগ্গিযং সিযা.

২৫. পঞ্চবন্ধনতো ঊন-পত্তে সতি পৰং পন;

ৱিঞ্ঞাপেতি নৱং পত্তং, তস্স নিস্সগ্গিযং সিযা.

২৬. পটিগ্গহেত্ৱা ভুঞ্জন্তো, সপ্পিতেলাদিকং পন;

সত্তাহমতিমাপেতি, তস্স নিস্সগ্গিযং সিযা.

২৭. ভিক্খুস্স চীৱৰং দত্ৱা, অচ্ছিন্দন্তস্স তং পুন;

সকসঞ্ঞায নিস্সগ্গি, অচ্ছিন্দাপযতোপি ৱা.

২৮. অপ্পৱাৰিতমঞ্ঞাতিং, সুত্তং যাচিয চীৱৰং;

ৱাযাপেন্তস্স নিস্সগ্গি, ৱিনা ঞাতিপ্পৱাৰিতে.

২৯. জানন্তো ভিক্খু সঙ্ঘস্স, লাভং পৰিণতং পন;

অত্তনো পৰিণামেতি, তস্স নিস্সগ্গিযং সিযাতি.