৪. পাচিত্তিযনিদ্দেসো

৩০. সম্পজানমুসাৱাদে, পাচিত্তিযমুদীৰিতং;

ভিক্খুঞ্চ ওমসন্তস্স, পেসুঞ্ঞহৰণেপি চ.

৩১. ঠপেত্ৱা ভিক্খুনিং ভিক্খুং, অঞ্ঞেন পিটকত্তযং;

পদসোধম্মং ভণন্তস্স, পাচিত্তিযমুদীৰিতং.

৩২. অনুপসম্পন্নেনেৱ, সযিত্ৱান তিৰত্তিযং;

পাচিত্তি সহসেয্যায, চতুত্থত্থঙ্গতে পুন.

৩৩. ইত্থিযা একৰত্তম্পি, সেয্যং কপ্পযতোপি ৱা;

দেসেন্তস্স ৱিনা ৱিঞ্ঞুং, ধম্মঞ্চ ছপ্পদুত্তৰিং.

৩৪. দুট্ঠুল্লং ভিক্খুনো ৱজ্জং, ভিক্খুসম্মুতিযা ৱিনা;

অভিক্খুনো ৱদন্তস্স, পাচিত্তিযমুদীৰিতং.

৩৫. খণেয্য ৱা খণাপেয্য, পথৱিঞ্চ অকপ্পিযং;

ভূতগামং ৱিকোপেয্য, তস্স পাচিত্তিযং সিযা.

৩৬. অজ্ঝোকাসে তু মঞ্চাদিং, কত্ৱা সন্থৰণাদিকং;

সঙ্ঘিকং যাতি পাচিত্তি, অকত্ৱাপুচ্ছনাদিকং.

৩৭. সঙ্ঘিকাৱসথে সেয্যং, কত্ৱা সন্থৰণাদিকং;

অকত্ৱাপুচ্ছনাদিং যো, যাতি পাচিত্তি তস্সপি.

৩৮. জানং সপ্পাণকং তোযং, পাচিত্তি পৰিভুঞ্জতো;

অঞ্ঞাতিকা ভিক্খুনিযা, ঠপেত্ৱা পাৰিৱত্তকং.

৩৯. চীৱৰং দেতি পাচিত্তি, চীৱৰং সিব্বতোপি চ;

অতিৰিত্তং অকাৰেত্ৱা, পৱাৰেত্ৱান ভুঞ্জতো.

৪০. ভিক্খুং আসাদনাপেক্খো, পৱাৰেতি পৱাৰিতং;

অনতিৰিত্তেন ভুত্তে তু, পাচিত্তিযমুদীৰিতং.

৪১. সন্নিধিভোজনং ভুঞ্জে, ৱিকালে যাৱকালিকং;

ভুঞ্জতো ৱাপি পাচিত্তি, অগিলানো পণীতকং.

৪২. ৱিঞ্ঞাপেত্ৱান ভুঞ্জেয্য, সপ্পিভত্তাদিকম্পি চ;

অপ্পটিগ্গহিতং ভুঞ্জে, দন্তকট্ঠোদকং ৱিনা.

৪৩. তিত্থিযস্স দদে কিঞ্চি, ভুঞ্জিতব্বং সহত্থতো;

নিসজ্জং ৱাৰহো কপ্পে, মাতুগামেন চেকতো.

৪৪. সুৰামেৰযপানেপি, পাচিত্তিযমুদীৰিতং;

অঙ্গুলিপতোদকে চাপি, হসধম্মেপি চোদকে.

৪৫. অনাদৰেপি পাচিত্তি, ভিক্খুং ভীসযতোপি ৱা;

ভযানকং কথং কত্ৱা, দস্সেত্ৱা ৱা ভযানকং.

৪৬. ঠপেত্ৱা পচ্চযং কিঞ্চি, অগিলানো জলেয্য ৱা;

জোতিং জলাপযেয্যাপি, তস্স পাচিত্তিযং সিযা.

৪৭. কপ্পবিন্দুমনাদায, নৱচীৱৰভোগিনো;

হসাপেক্খস্স পাচিত্তি, ভিক্খুনো চীৱৰাদিকং.

৪৮. অপনেত্ৱা নিধেন্তস্স, নিধাপেন্তস্স ৱা পন;

জানং পাণং মাৰেন্তস্স, তিৰচ্ছানগতম্পি চ.

৪৯. ছাদেতুকামো ছাদেতি, দুট্ঠুল্লং ভিক্খুনোপি চ;

গামন্তৰগতস্সাপি, সংৱিধাযিত্থিযা সহ.

৫০. ভিক্খুং পহৰতো ৱাপি, তলসত্তিকমুগ্গিৰে;

চোদেতি ৱা চোদাপেতি, গৰুকামূলকেনপি.

৫১. কুক্কুচ্চুপ্পাদনে চাপি, ভণ্ডনত্থাযুপস্সুতিং;

সোতুং ভণ্ডনজাতানং, যাতি পাচিত্তিযং সিযা.

৫২. সঙ্ঘস্স লাভং পৰিণামিতং তু,

নামেতি যো তং পৰপুগ্গলস্স;

পুচ্ছং অকত্ৱাপি চ সন্তভিক্খুং,

পাচিত্তি গামস্স গতে ৱিকালেতি.