১৯. ন্হানকপ্পনিদ্দেসৱণ্ণনা

১৬৮. কপ্পনং কপ্পিযতা কপ্পো, ন্হানে কপ্পো ন্হানকপ্পো. নৱকো থেৰানং পুৰতো উপৰি ৱা ন চ ন্হাযেয্যাতি সম্বন্ধো. ন চাতি নযেৱ. পুৰতোতি অভিমুখে. উপৰীতি নদিযা উপৰি.

১৬৯-১৭১. কুট্টত্থম্ভতৰুট্টানে কাযং ন ঘংসযেতি সম্বন্ধো. তত্থ কুট্টং নাম ইট্ঠকদাৰুসিলাভিত্তি. থম্ভো নাম নহানতিত্থে নিখনিত্ৱা ঠপিতো. তৰূতি ৰুক্খো. অট্টানং নাম তচ্ছেত্ৱা অট্ঠপদাকাৰেন ৰাজিযো ছিন্দিত্ৱা নহানতিত্থে নিখাতফলকং. গন্ধব্বহত্থেন ৱা…পে… মল্লকেন ৱা কাযং সৰীৰেন ৱা অঞ্ঞমঞ্ঞং ন ঘংসযেতি সম্বন্ধো. গন্ধব্বহত্থেনাতি দাৰুমযহত্থেন. কুৰুৱিন্দকসুত্তিযাতি কুৰুৱিন্দকপাসাণচুণ্ণানি লাখায বন্ধিত্ৱা কতগুড়িকাৱলিযা সুত্তেন আৱুণিতসুত্তিযা. মল্লকেনাতি মকৰদন্তকে ছিন্দিত্ৱা পদুমকণ্ণিকসণ্ঠানেন কতমল্লকেন. সৰীৰেনাতি অত্তনো কাযেন. অঞ্ঞমঞ্ঞস্স অঞ্ঞমঞ্ঞং কিৰিযাকৰণসঙ্খাতে কিৰিযাব্যভিহাৰে দ্ৱিত্তং. কপাল…পে… পুথুপাণি চ সব্বেসং ৱট্টতীতি সম্বন্ধো. কপালঞ্চ ইট্ঠকা চ, তাসং খণ্ডানি. পুথুপাণীতি পুথু নানা পাণি পুথুপাণি, হত্থপৰিকম্মং ৰুড়্হীৱসেন. সব্বেসন্তি গিলানাগিলানানং. গিলানস্স অকতমল্লকং ৱট্টতীতি সম্বন্ধো. অকতমল্লকং নাম কতমল্লকৱিপৰীতং. ফেণং নাম সমুদ্দফেণন্তি.

ন্হানকপ্পনিদ্দেসৱণ্ণনা নিট্ঠিতা.