২২. উপাহননিদ্দেসৱণ্ণনা

১৭৫. গুণঙ্গুণূপাহনাতি (মহাৱ. অট্ঠ. ২৪৫) চতুপটলতো পট্ঠায ৱুচ্চতি, ন একদ্ৱিতিপটলতো পট্ঠায ‘‘অনুজানামি, ভিক্খৱে, একপলাসিকং উপাহনং, ন ভিক্খৱে দিগুণা উপাহনা ধাৰেতব্বা, ন তিগুণা উপাহনা ধাৰেতব্বা, ন গুণঙ্গুণূপাহনা ধাৰেতব্বা, যো ধাৰেয্য, আপত্তি দুক্কটস্সা’’তি (মহাৱ. ২৪৫) ৱুত্তত্তা. ‘‘অনুজানামি, ভিক্খৱে, ওমুক্কং গুণঙ্গুণূপাহনং, ন ভিক্খৱে নৱা গুণঙ্গুণূপাহনা ধাৰেতব্বা, যো ধাৰেয্য, আপত্তি দুক্কটস্সা’’তি (মহাৱ. ২৪৭) ৱুত্তত্তা ‘‘নৱা’’তি ৱুত্তং. সব্বত্থাপি মজ্ঝিমদেসে গিলানোপি নৱং গুণঙ্গুণূপাহনং ন লভতি, একৱাৰম্পি অঞ্ঞেহি পৰিভুত্তং ওমুক্কউপাহনসঙ্খাতং লভতি, পচ্চন্তিমেসু জনপদেসু গিলানো নৱম্পি লভতীতি ৱেদিতব্বং ‘‘অনুজানামি, ভিক্খৱে, সব্বপচ্চন্তিমেসু জনপদেসু গুণঙ্গুণূপাহন’’ন্তি (মহাৱ. ২৫৯) অৱিসেসেন ৱুত্তত্তা.

সব্বস্সাতি গিলানস্সাপি অগিলানস্সাপীতি অত্থো. মজ্ঝিমদেসেপি পচ্চন্তিমদেসেপি আৰামে আৰামূপচাৰে গিলানস্সাপি অগিলানস্সাপি ‘‘অনুজানামি, ভিক্খৱে, অজ্ঝাৰামে উপাহনং ধাৰেতু’’ন্তি (মহাৱ. ২৪৯) ৱুত্তত্তা কপ্পিযন্তি অত্থো. সব্বত্থাতি আৰামেপি গামেপি. অকল্লকস্সাতি গিলানস্স. এত্থ পন মজ্ঝিমদেসে গিলানস্স গুণঙ্গুণূপাহনা পৰিভুত্তাৱ আৰামেপি গামেপি ৱট্টতি, পচ্চন্তিমদেসে অপৰিভুত্তাপি. মজ্ঝিমদেসেপি পচ্চন্তিমদেসেপি ভগৱতা গিলানস্সেৱ উপাহনা অনুঞ্ঞাতা ‘‘অনুজানামি, ভিক্খৱে, যস্স পাদা ৱা দুক্খা, পাদা ৱা ফলিতা, পাদখিলো ৱা আবাধো, উপাহনং ধাৰেতু’’ন্তি (মহাৱ. ২৪৯) চ ‘‘অনুজানামি, ভিক্খৱে, গিলানেন ভিক্খুনা সউপাহনেন গামং পৱিসিতু’’ন্তি (মহাৱ. ২৫৬) ৱুত্তত্তা চ. মজ্ঝিমদেসে চ গিলানো নৱং গুণঙ্গুণূপাহনং ধাৰেতুং যদি লভতি, কথং পদেসপঞ্ঞত্তি হোতীতি? সব্বত্থ পন ভগৱতা গিলানস্সেৱ উপাহনা অনুঞ্ঞাতা, তস্মা মজ্ঝিমদেসে গিলানো নৱং গুণঙ্গুণূপাহনং লভতীতি গহেতব্বন্তি ৱদন্তি.

১৭৬-৯. সব্বাৱ নীলকা (মহাৱ. ২৪৬; মহাৱ. অট্ঠ. ২৪৬) সব্বনীলকা. এস নযো সব্বত্থ ওদাতকাদীসুপি. ওদাতং পন নেৱ পাড়িযং, ন অট্ঠকথাযং পটিক্খিত্তং, অনুলোমৱসেন পন ইধ পটিক্খিত্তন্তি ৱেদিতব্বং. মহাৰঙ্গৰত্তা সতপদিপিট্ঠিৱণ্ণা. মহানামৰঙ্গৰত্তা মন্দৰত্তা. মঞ্জেট্ঠিকা কণৱেৰপুপ্ফৱণ্ণা. পুপ্ফলতাদীহি ৱিচিত্তা চিত্ৰা. নীলপীতাদিৱদ্ধিকাতি এত্থ আদি-সদ্দেন ওদাতলোহিতমঞ্জেট্ঠিকমহাৰঙ্গমহানামৰঙ্গৰত্তাদিৱসেন ৱদ্ধিকা গহিতা. সীহব্যগ্ঘুদ্দাজিনদীপীনং চম্মেহি চাতি সম্বন্ধো. কোচীতি গিলানোপি অগিলানোপি.

১৮০. সকলং ৱা একদেসকং ৱা ৰজনং চোড়েন (মহাৱ. অট্ঠ. ২৪৬) পুঞ্ছিত্ৱা ৱড়ঞ্জেয্যাতি অত্থো. খল্লকাদিকং পন সব্বং হাৰিত্ৱা ৱড়ঞ্জেতব্বং. উপাহনৱিনিচ্ছযো.

উপাহননিদ্দেসৱণ্ণনা নিট্ঠিতা.