১৯. ন্হানকপ্পনিদ্দেসৱণ্ণনা

১৬৮. পুৰতোতি (চূড়ৱ. ৩৭২) থেৰানং পুৰতো উপৰি ৱা ন চ ন্হাযেয্যাতি অত্থো.

১৬৯-১৭১. কুট্টত্থম্ভতৰুট্টানেতি এত্থ (চূড়ৱ. ২৪৩; চূড়ৱ. অট্ঠ. ২৪৩) কুট্টে ৱা থম্ভে ৱা তৰুম্হি ৱা অট্টানফলকে ৱা কাযং ন ঘংসযেতি অত্থো. গন্ধব্বহত্থো নাম মক্কটহত্থসদিসো দাৰুআদিমযো. কুৰুৱিন্দকসুত্তিযাতি কুৰুৱিন্দসুত্তিযা. মল্লকেন ৱা অঞ্ঞমঞ্ঞং ৱা. ‘‘ন ভিক্খৱে ৱিগ্গয্হ পৰিকম্মং কাৰাপেতব্বং. যো কাৰাপেয্য, আপত্তি দুক্কটস্সা’’তি (চূড়ৱ. ২৪৩) এৱং ৱুত্তং ৱিগ্গহপৰিকম্মং সন্ধায ‘‘অঞ্ঞমঞ্ঞং ৱা’’তি ৱুত্তং.

ইদানি কপ্পিযানি দস্সেতুং ‘‘কপালিট্ঠকখণ্ডানী’’তিআদিমাহ. সব্বেসং ৱট্টতীতি সম্বন্ধো. গিলানস্সপি (চূড়ৱ. অট্ঠ. ২৪৩) অগিলানস্সপি ইমানি কপালিট্ঠকখণ্ডাদীনি কাযঘংসনে ৱট্টন্তি. পুথুপাণীতি (চূড়ৱ. ২৪৪) হত্থপৰিকম্মং ৱুচ্চতি. তস্মা সব্বেসং হত্থেন পিট্ঠিপৰিকম্মং কাতুং ৱট্টতি. অকতমল্লকং নাম একদাঠিমং পৰিচ্ছিন্দিত্ৱা কতং. পাসাণাদযো পাদঘংসনে এৱ কপ্পিযা. ন্হানকপ্পৱিনিচ্ছযো.

ন্হানকপ্পনিদ্দেসৱণ্ণনা নিট্ঠিতা.