৮. কালিকনিদ্দেসো

কালিকা চাতি –

৮৪. পটিগ্গহিতা চত্তাৰো, কালিকা যাৱকালিকং;

যামকালিকং সত্তাহ-কালিকং যাৱজীৱিকং.

৮৫. পিট্ঠং মূলং ফলং খজ্জং, গোৰসো ধঞ্ঞভোজনং;

যাগুসূপপ্পভুতযো, হোন্তেতে যাৱকালিকা.

৮৬. মধুমুদ্দিকসালূক-চোচমোচম্বজম্বুজং;

ফাৰুসং নগ্গিসন্তত্তং, পানকং যামকালিকং.

৮৭. সানুলোমানি ধঞ্ঞানি, ঠপেত্ৱা ফলজো ৰসো;

মধূকপুপ্ফমঞ্ঞত্ৰ, সব্বো পুপ্ফৰসোপি চ.

৮৮. সব্বপত্তৰসো চেৱ, ঠপেত্ৱা পক্কডাকজং;

সীতোদমদ্দিতোদিচ্চ-পাকো ৱা যামকালিকো.

৮৯. সপ্পিনোনীততেলানি, মধুফাণিতমেৱ চ;

সত্তাহকালিকা সপ্পি, যেসং মংসমৱাৰিতং.

৯০. তেলং তিলৱসেৰণ্ড-মধুসাসপসম্ভৱং;

খুদ্দাভমৰমধুকৰি-মক্খিকাহি কতং মধু;

ৰসাদিউচ্ছুৱিকতি, পক্কাপক্কা চ ফাণিতং.

৯১. সৱত্থুপক্কা সামং ৱা, ৱসা কালে অমানুসা;

অঞ্ঞেসং ন পচে ৱত্থুং, যাৱকালিকৱত্থুনং.

৯২. হলিদ্দিং সিঙ্গিৱেৰঞ্চ, ৱচত্তং লসুণং ৱচা;

উসীৰং ভদ্দমুত্তঞ্চাতিৱিসা কটুৰোহিণী;

পঞ্চমূলাদিকঞ্চাপি, মূলং তং যাৱজীৱিকং.

৯৩. বিড়ঙ্গং মৰিচং গোট্ঠ-ফলং পিপ্ফলি ৰাজিকা;

তিফলেৰণ্ডকাদীনং, ফলং তং যাৱজীৱিকং.

৯৪. কপ্পাসনিম্বকুটজপটোলসুলসাদিনং;

সূপেয্যপণ্ণং ৱজ্জেত্ৱা, পণ্ণং তং যাৱজীৱিকং.

৯৫. ঠপেত্ৱা উচ্ছুনিয্যাসং,

সৰসং উচ্ছুজং তচং;

নিয্যাসো চ তচো সব্বো,

লোণং লোহং সিলা তথা.

৯৬. সুদ্ধসিত্থঞ্চ সেৱালো, যঞ্চ কিঞ্চি সুঝাপিতং;

ৱিকটাদিপ্পভেদঞ্চ, ঞাতব্বং যাৱজীৱিকং.

৯৭. মূলং সাৰং তচো ফেগ্গু, পণ্ণং পুপ্ফং ফলং লতা;

আহাৰত্থ মসাধেন্তং, সব্বং তং যাৱজীৱিকং.

৯৮. সব্বকালিকসম্ভোগো, কালে সব্বস্স কপ্পতি;

সতি পচ্চযে ৱিকালে, কপ্পতে কালিকত্তযং.

৯৯. কালযামমতিক্কন্তা, পাচিত্তিং জনযন্তুভো;

জনযন্তি উভোপেতে, অন্তোৱুত্থঞ্চ সন্নিধিং.

১০০. সত্তাহকালিকে সত্ত, অহানি অতিনামিতে;

পাচিত্তি পাড়িনাৰুড়্হে, সপ্পিআদিম্হি দুক্কটং.

১০১. নিস্সট্ঠলদ্ধং মক্খেয্য, নঙ্গং নজ্ঝোহৰেয্য চ;

ৱিকপ্পেন্তস্স সত্তাহে, সামণেৰস্সধিট্ঠতো;

মক্খনাদিঞ্চ নাপত্তি, অঞ্ঞস্স দদতোপি চ.

১০২. যাৱকালিকআদীনি, সংসট্ঠানি সহত্তনা;

গাহাপযন্তি সব্ভাৱং, তস্মা এৱমুদীৰিতং.

১০৩. পুৰে পটিগ্গহিতঞ্চ, সত্তাহং যাৱজীৱিকং;

সেসকালিকসম্মিস্সং, পাচিত্তি পৰিভুঞ্জতো.

১০৪. যাৱকালিকসম্মিস্সং, ইতৰং কালিকত্তযং;

পটিগ্গহিতং তদহু, তদহেৱ চ ভুঞ্জযে.

১০৫. যামকালিকসম্মিস্সং, সেসমেৱং ৱিজানিযং;

সত্তাহকালিকমিস্সঞ্চ, সত্তাহং কপ্পতেতৰন্তি.