৫০. ৱিপস্সনানিদ্দেসো

ৱিপস্সনাতি –

৪৭১. নামৰূপং পৰিগ্গয্হ, ততো তস্স চ পচ্চযং;

হুত্ৱা অভাৱতোনিচ্চা, উদযব্বযপীড়না.

৪৭২. দুক্খা অৱসৱত্তিত্তা, অনত্তাতি তিলক্খণং;

আৰোপেত্ৱান সঙ্খাৰে, সম্মসন্তো পুনপ্পুনং;

পাপুণেয্যানুপুব্বেন, সব্বসংযোজনক্খযন্তি.

নিগমনকথা

৪৭৩. অধিসীলাধিচিত্তানং, অধিপঞ্ঞায সিক্খনা;

ভিক্খুকিচ্চমতো খুদ্দসিক্খাযং সমুদাহটা.

৪৭৪. মহতো কিত্তিসদ্দস্স, যস্স লোকৱিচাৰিনো;

পৰিস্সমো ন সম্ভোতি, মালুতস্সেৱ নিচ্চসো.

৪৭৫. তেন ধম্মসিৰীকেন, তম্বপণ্ণিযকেতুনা;

থেৰেন ৰচিতা ধম্মৱিনযঞ্ঞুপসংসিতা.

৪৭৬. এত্তাৱতাযং নিট্ঠানং, খুদ্দসিক্খা উপাগতা;

পঞ্চমত্তেহি গাথানং, সতেহি পৰিমাণতোতি.

খুদ্দসিক্খা নিট্ঠিতা.

নমো তস্স ভগৱতো অৰহতো সম্মাসম্বুদ্ধস্স