৪৯. চতুৰাৰক্খনিদ্দেসো

চতুৰক্খাতি –

৪৬১. বুদ্ধানুস্সতি মেত্তা চ, অসুভং মৰণস্সতি;

আৰকত্তাদিনাৰহং, সম্মা সামঞ্চ বুদ্ধতো.

৪৬২. সম্মাসম্বুদ্ধইতি ৱানুস্সতি যা পুনপ্পুনং;

নৱভেদে ভগৱতো, বুদ্ধানুস্সতি সা গুণে.

৪৬৩. সীমট্ঠসঙ্ঘে সীমট্ঠদেৱতাসু চ ইস্সৰে;

জনে গোচৰগামম্হি, তত্থুপাদায মানুসে.

৪৬৪. সব্বসত্তেসু সুখিতা, হোন্তাৱেৰাতিআদিনা;

পৰিচ্ছিজ্জ পৰিচ্ছিজ্জ, ভাৱনা মেত্তভাৱনা.

৪৬৫. ৱণ্ণসণ্ঠানওকাস-দিসতো পৰিচ্ছেদতো;

ৱৱত্থপেত্ৱা কেসাদি-কোট্ঠাসে অনুপুব্বতো.

৪৬৬. নাতিসীঘঞ্চ সণিকং, ৱিক্খেপং পটিবাহযং;

পণ্ণত্তিং সমতিক্কম্ম, মুঞ্চন্তস্সানুপুব্বতো.

৪৬৭. ৱণ্ণআসযসণ্ঠান-গন্ধোকাসেহি ভাৱনা;

পটিক্কূলাতি কোট্ঠাসে, উদ্ধুমাতাদিৱত্থুসু;

গহেত্ৱা অসুভাকাৰং, পৱত্তা ভাৱনাসুভং.

৪৬৮. ‘‘মৰণং মে ভৱিস্সতি, জীৱিতং উচ্ছিজ্জিস্সতি;

মৰণং মৰণং ৱা’’তি, ভাৱযিত্ৱান যোনিসো.

৪৬৯. ৱধকস্সেৱুপট্ঠানা, সম্পত্তীনং ৱিপত্তিতো;

উপসংহৰতো কাযবহুসাধাৰণা তথা.

৪৭০. আযুদুব্বলতো কালৱৱত্থানস্সভাৱতো;

অদ্ধানস্স পৰিচ্ছেদা, ভাৱনা মৰণস্সতীতি.