৪৪. উপোসথনিদ্দেসো

উপোসথোতি –

৪১০. দুৱে উপোসথা চাতু-দ্দসো পন্নৰসো ইতি;

সুত্তুদ্দেসমধিট্ঠান-পাৰিসুদ্ধিৱসা তযো.

৪১১. সুত্তুদ্দেসোৱ সঙ্ঘস্স, অধিট্ঠানউপোসথো;

পুগ্গলস্সেৱ সেসানং, পাৰিসুদ্ধিউপোসথো.

৪১২. পুব্বকিচ্চে চ কৰণে, পত্তকল্লে সমানিতে;

সুত্তং উদ্দিসতি সঙ্ঘো, পঞ্চধা সো ৱিভাৱিতো.

৪১৩. ৱিনান্তৰাযং সঙ্খেপে-নুদ্দেসো ৱিনিৱাৰিতো;

‘‘থেৰোৱ ইস্সৰো দ্ৱীসু, উদ্দেসেস্ৱেত্থ তীসু ৱা;

ৱিসদেসূ’’তি ৱুত্তত্তা, অৱত্তন্তেপি ৱট্টতি.

৪১৪. আগচ্ছেয্যুং যদি সমা, উদ্দিসন্তে ৱ থোকিকা;

উদ্দিট্ঠং যং সুউদ্দিট্ঠং, সোতব্বমৱসেসকং.

৪১৫. উদ্দিট্ঠমত্তে সকলা-যেকচ্চাযুট্ঠিতায ৱা;

পাৰিসুদ্ধিং কৰেয্যেসং, সন্তিকে বহুকাথ চে;

কত্ৱা সব্বৱিকপ্পেসু, পুব্বকিচ্চং পুনুদ্দিসে.

৪১৬. পন্নৰসোৱাসিকানং, ইতৰানং সচেতৰো;

সমানেতৰেনুৱত্তন্তু, পুৰিমানং সচেধিকা;

পুৰিমা অনুৱত্তন্তু, তেসং সেসেপ্যযং নযো.

৪১৭. পাটিপদোৱাসিকানং, ইতৰানং উপোসথো;

সমথোকানং সামগ্গিং, মূলট্ঠা দেন্তু কামতো.

৪১৮. বহি গন্ত্ৱান কাতব্বো, নো চে দেন্তি উপোসথো;

দেয্যানিচ্ছায সামগ্গী, বহূসু বহি ৱা ৱজে.

৪১৯. পাটিপদেগন্তুকানং, এৱমেৱ অযং নযো;

সাৱেয্য সুত্তং সঞ্চিচ্চ, অস্সাৱেন্তস্স দুক্কটং.

৪২০. সম্মজ্জিতুং পদীপেতুং, পঞ্ঞাপেতুং দকাসনং;

ন কৰেয্য তথা কল্লো, মহাথেৰেন পেসিতো.

৪২১. সম্মজ্জিত্ৱা পদীপেত্ৱা, পট্ঠপেত্ৱা দকাসনং. গণঞত্তিং ঠপেত্ৱেৱং, কত্তব্বো তীহুপোসথো. ‘‘সুণন্তু মে আযস্মন্তা, অজ্জুপোসথো পন্নৰসো, যদাযস্মন্তানং পত্তকল্লং, মযং অঞ্ঞমঞ্ঞং পাৰিসুদ্ধিউপোসথং কৰেয্যামা’’তি.

৪২২. একংসং চীৱৰং কত্ৱা, নিসীদিত্ৱা উক্কুটিকং,. থেৰেন অঞ্জলিং তেৱং, পগ্গয্হ সমুদীৰিযা. ‘‘পৰিসুদ্ধো অহং আৱুসো, পৰিসুদ্ধোতি মং ধাৰেথা’’তি, ৱদে যাৱততীযকং.

৪২৩. সমত্তপুব্বাৰম্ভেন, তে নৱেনেৱমীৰিযা. ‘‘পৰিসুদ্ধো অহং ভন্তে, পৰিসুদ্ধোতি মং ধাৰেথা’’তি, ৱদে যাৱততীযকং.

৪২৪. দ্ৱীসু থেৰেন কত্তব্বং, কত্ৱেৱমীৰিযো নৱো. ‘‘পৰিসুদ্ধো অহং আৱুসো, পৰিসুদ্ধোতি মং ধাৰেহী’’তি তিক্খত্তুং ৱত্তব্বো.

৪২৫. নৱেন থেৰো তিক্খত্তুং, এৱমস্স উদীৰিযো;

‘‘পৰিসুদ্ধো অহং ভন্তে, পৰিসুদ্ধোতি মং ধাৰেথা’’তি.

৪২৬. পুব্বকিচ্চং সমাপেত্ৱা, অধিট্ঠেয্যেৱমেককো. ‘‘অজ্জ মে উপোসথো পন্নৰসোতি ৱা চাতুদ্দসোতি ৱা অধিট্ঠামী’’তি ৱত্তব্বং, নো চেধিট্ঠেয্য দুক্কটং.

৪২৭. যত্থ ৱসন্তি চত্তাৰো, তযো ৱা যদি ৱা দুৱে;

পাৰিসুদ্ধিং হৰিত্ৱান, একেকস্সিতৰীতৰে;

তং তং উপোসথং কযিৰুং, সিযা আপত্তি দুক্কটং.

৪২৮. ৱগ্গে সমগ্গে ৱগ্গোতি, সঞ্ঞিনো ৱিমতিস্স ৱা;

দুক্কটং কৰোতো ভেদা-ধিপ্পাযেন থুল্লচ্চযং;

ৱগ্গে সমগ্গেনাপত্তি, সমগ্গো ইতি সঞ্ঞিনো.

৪২৯. উক্খিত্তস্স গহট্ঠস্স, সেসানং সহধম্মিনং;

পাৰাজিকস্সাভব্বস্স, সিক্খানিক্খিত্তকস্স চ.

৪৩০. নিসিন্নপৰিসাযঞ্চ, সভাগাপত্তিকো তথা;

ছন্দেন পৰিৱুত্থেন, পাতিমোক্খং ন উদ্দিসে.

৪৩১. অদেসযিত্ৱানাপন্নং, নাৱিকত্ৱান ৱেমতিং;

নুপোসথেপি ৱা কাতুং, পোসথো ন চ কপ্পতি.

৪৩২. অট্ঠিতোপোসথাৱাসা, ন ৱজে তদহূ ৱিনা;

অন্তৰাযং ৱ সঙ্ঘং ৱা-ধিট্ঠাতুং সীমমেৱ ৱাতি.