৪৫. পৱাৰণানিদ্দেসো

পৱাৰণাতি –

৪৩৩. দ্ৱিন্নং তিণ্ণং চতুন্নঞ্চ, অঞ্ঞমঞ্ঞপ্পৱাৰণা;

একস্স চ অধিট্ঠানং, সেসা সঙ্ঘপ্পৱাৰণা.

৪৩৪. পুব্বকিচ্চে চ কৰণে, পত্তকল্লে সমানিতে;

ঠপেত্ৱা ঞত্তিং সঙ্ঘেন, কত্তব্বেৱং পৱাৰণা.

‘‘সুণাতু মে ভন্তে সঙ্ঘো, অজ্জ পৱাৰণা পন্নৰসী, যদি সঙ্ঘস্স পত্তকল্লং, সঙ্ঘো পৱাৰেয্যা’’তি.

৪৩৫. একংসং চীৱৰং কত্ৱা, নিসীদিত্ৱা উক্কুটিকং;

থেৰেন অঞ্জলিং সঙ্ঘো, পগ্গয্হ সমুদীৰিযো.

৪৩৬. ‘‘সঙ্ঘং, আৱুসো, পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তো অনুকম্পং উপাদায, পস্সন্তো পটিকৰিস্সামি. দুতিযম্পি…পে… ততিযম্পি, আৱুসো, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তো অনুকম্পং উপাদায, পস্সন্তো পটিকৰিস্সামী’’তি.

৪৩৭. পৱাৰেন্তেসু থেৰেসু, নিসজ্জুক্কুটিকং নৱো;

পৱাৰেতি সযং যাৱ, উক্কুটিকোৱ অচ্ছতু.

৪৩৮. পুব্বাৰম্ভং সমাপেত্ৱা, নৱো সঙ্ঘমুদীৰযে.

৪৩৯. ‘‘সঙ্ঘং, ভন্তে, পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তো অনুকম্পং উপাদায, পস্সন্তো পটিকৰিস্সামি. দুতিযম্পি…পে… ততিযম্পি, ভন্তে, সঙ্ঘং পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তো অনুকম্পং উপাদায, পস্সন্তো পটিকৰিস্সামী’’তি.

৪৪০. দানেন ধম্মসাকচ্ছা, কলহেহি চ ৰত্তিযা;

তেৱাচিকায ওকাসে-সতি খেপিতভাৱতো;

অন্তৰাযে দসৱিধে, ঞত্তিং ৱত্ৱানুৰূপতো.

৪৪১. ‘‘সুণাতু মে ভন্তে সঙ্ঘো, মনুস্সেহি দানং দেন্তেহি, দ্ৱীহি ভিক্খূহি ধম্মং সাকচ্ছন্তেহি, কলহং কৰোন্তেহি যেভুয্যেন ৰত্তি খেপিতা. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ৰত্তি ৱিভাযিস্সতি. অযং ৰাজন্তৰাযো, অযং চোৰন্তৰাযো, অযং অগ্যন্তৰাযো, অযং উদকন্তৰাযো, অযং মনুস্সন্তৰাযো, অযং অমনুস্সন্তৰাযো, অযং ৱাড়ন্তৰাযো, অযং সৰীসপন্তৰাযো, অযং জীৱিতন্তৰাযো, অযং ব্ৰহ্মচৰিযন্তৰাযো. সচে সঙ্ঘো তেৱাচিকং পৱাৰেস্সতি, অপ্পৱাৰিতোৱ সঙ্ঘো ভৱিস্সতি, অথাযং ব্ৰহ্মচৰিযন্তৰাযো ভৱিস্সতি. যদি সঙ্ঘস্স পত্তকল্লং, সঙ্ঘো দ্ৱেৱাচিকং, একৱাচিকং, সমানৱস্সিকং পৱাৰেয্যা’’তি.

৪৪২. পৱাৰেয্যানুৰূপেন, যথাঠপিতঞত্তিযা;

আগচ্ছেয্যুং যদি সমা, আদিকা চেত্থ আহৰে.

৪৪৩. এৱং তিচতুৱগ্গো চ, ঞত্তিং ৱত্ৱা পৱাৰযে. ‘‘সুণন্তু মে আযস্মন্তা, অজ্জ পৱাৰণা পন্নৰসী, যদাযস্মন্তানং পত্তকল্লং, মযং অঞ্ঞমঞ্ঞং পৱাৰেয্যামা’’তি.

৪৪৪. একংসং চীৱৰং কত্ৱা, নিসীদিত্ৱা উক্কুটিকং;

থেৰেন অঞ্জলিং তেৱং, পগ্গয্হ সমুদীৰিযা.

৪৪৫. ‘‘অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তা অনুকম্পং উপাদায, পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তা অনুকম্পং উপাদায, পস্সন্তো পটিকৰিস্সামী’’তি.

নৱেনাপি ‘‘অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তা অনুকম্পং উপাদায, পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তে পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদন্তু মং আযস্মন্তা অনুকম্পং উপাদায, পস্সন্তো পটিকৰিস্সামী’’তি.

৪৪৬. দ্ৱীসু থেৰেন কত্তব্বং, নৱো কত্ৱেৱমীৰিযো.

৪৪৭. ‘‘অহং, আৱুসো, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদতু মং আযস্মা অনুকম্পং উপাদায, পস্সন্তো পটিকৰিস্সামি. দুতিযম্পি…পে… ততিযম্পি অহং, আৱুসো, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদতু মং আযস্মা অনুকম্পং উপাদায, পস্সন্তো পটিকৰিস্সামী’’তি.

নৱেনাপি ‘‘অহং, ভন্তে, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদতু মং আযস্মা অনুকম্পং উপাদায, পস্সন্তো পটিকৰিস্সামি. দুতিযম্পি…পে… ততিযম্পি অহং, ভন্তে, আযস্মন্তং পৱাৰেমি দিট্ঠেন ৱা সুতেন ৱা পৰিসঙ্কায ৱা, ৱদতু মং আযস্মা অনুকম্পং উপাদায, পস্সন্তো পটিকৰিস্সামী’’তি.

৪৪৮. পুব্বকিচ্চং সমাপেত্ৱা, অধিট্ঠেয্যেৱমেককো. ‘‘অজ্জ মে পৱাৰণা চাতুদ্দসীতি ৱা পন্নৰসীতি ৱা অধিট্ঠামী’’তি ৱত্তব্বং.

৪৪৯. যস্মিং ৱসন্তি ৱা পঞ্চ, চত্তাৰো ৱা তযো দুৱে;

পৱাৰণং হৰিত্ৱান, একেকস্সিতৰীতৰে.

৪৫০. তং তং পৱাৰণং কযিৰুং,

সিযা আপত্তি দুক্কটং;

সেসা উপোসথে ৱুত্তা,

গাথাযো চেত্থ আহৰে.

৪৫১. পৱাৰিতেৱ সঙ্ঘম্হি, পাৰিসুদ্ধিউপোসথং;

কৰেয্য ছিন্নৱস্সো ৱা, অৱুত্থো ৱানুপগতো.

৪৫২. চাতুমাসিনিযা চাপি, কতে সঙ্ঘেনুপোসথে;

ৱুত্থৱস্সা পৱাৰেয্যুং, সচে অপ্পতৰা সিযুন্তি.