৪০. অৱেভঙ্গিযনিদ্দেসো

অৱেভঙ্গিযন্তি –

৩২২. আৰামাৰামৱত্থূনি, ৱিহাৰো তস্স ৱত্থু চ;

মঞ্চো পীঠং ভিসি বিব্বো-হনাদিসযনাসনং.

৩২৩. লোহকুম্ভী কটাহো চ,

লোহভাণকৱাৰকো;

কুঠাৰী ৱাসি ফৰসু,

কুদ্দালো চ নিখাদনং.

৩২৪. ৱল্লি ৱেড়ু তিণং পণ্ণং, মুঞ্জপব্বজমত্তিকা;

দাৰুমত্তিকভণ্ডানি, পঞ্চেতে অৱিভাজিযা.

৩২৫. থুল্লচ্চযং ভাজযতো, ভাজিতাপি অভাজিতা;

গৰুভণ্ডানি ৱুচ্চন্তি, এতেৱিস্সজ্জিযানি চ.

৩২৬. ৱল্লিড্ঢবাহুমত্তাপি, ৱেড়ু অট্ঠঙ্গুলাযতো;

তিণাদি মুট্ঠিমত্তম্পি, পণ্ণং একম্পি মত্তিকা.

৩২৭. পাকতা পঞ্চৱণ্ণা ৱা, সুধাকঙ্গুট্ঠ আদিকা;

তালপক্কপ্পমাণাপি, দিন্না ৱা তত্থজাতকা.

৩২৮. ৰক্খিতা সঙ্ঘিকা ৰজ্জু-যোত্তাদীপি অভাজিযা;

নিট্ঠিতে ভাজিযা কম্মে, সঙ্ঘিকে চেতিযস্স ৱা.

৩২৯. পত্তাদি ভিক্খুসাৰুপ্পং, তথা ৱিপ্পকতাকতং;

ভাজিযং লোহভণ্ডেসু, ৱাৰকং পাদগণ্হকং.

৩৩০. ৱেড়ুম্হি ভাজিযা তেল-নাড়ি কত্তৰদণ্ডকো;

ছত্তদণ্ডসলাকাযো, তথোপাহনদণ্ডকো.

৩৩১. অনুঞ্ঞাতৱাসিদণ্ডো, কৰণ্ডো পাদগণ্হকো;

অৰণঞ্জনিসিঙ্গাদি, ভিক্খূপকৰণং তথা.

৩৩২. তচ্ছিতানিট্ঠিতং দাৰুভণ্ডং দন্তঞ্চ ভাজিযং;

ভিক্খূপকৰণে পাদঘটকো মত্তিকামযো.

৩৩৩. ভাজিযং কপ্পিযং চম্মং, এড়চম্মমভাজিযং;

গৰুনা গৰুভণ্ডঞ্চ, থাৱৰং থাৱৰেন চ.

৩৩৪. থাৱৰং পৰিৱত্তেয্য, তথা কত্ৱা চ ভুঞ্জতু;

ৱল্লাদিং ফাতিকম্মেন, গণ্হে সেসমভাজিযন্তি.