৪১. পকিণ্ণকনিদ্দেসো

পকিণ্ণকন্তি –

৩৩৫. সদ্ৱাৰবন্ধনে ঠানে, সোদুক্খলকপাসকে;

সযন্তেন দিৱা দ্ৱাৰং, বন্ধেয্য পৰিৱট্টকং.

৩৩৬. সন্তে ৱিঞ্ঞুম্হি পুৰিসে, আভোগো চাপি কপ্পতি;

সৱসে তং ৱিনাকাৰং, সযন্তো দুক্কটং ফুসে.

৩৩৭. ৰতনানিত্থিৰূপানি, ধঞ্ঞমিত্থিপসাধনং;

তূৰিযাৱুধভণ্ডানি, আমসন্তস্স দুক্কটং.

৩৩৮. সিত্থতেলোদতেলেহি, ফণহত্থফণেহি ৱা;

কোচ্ছেনৱাপি যো কেসে, ওসণ্ঠেয্যস্স দুক্কটং.

৩৩৯. নেকপাৱুৰণা একত্থৰণা ৱা তুৱট্টযুং;

তথেকমঞ্চে ভুঞ্জেয্যুং, একস্মিং ৱাপি ভাজনে.

৩৪০. চতুৰঙ্গুলতো ঊনমধিকট্ঠঙ্গুলং তথা;

দন্তকট্ঠং ন খাদেয্য, লসুণং ন অকল্লকো.

৩৪১. হীনুক্কট্ঠেহি উক্কট্ঠং, হীনং ৱা জাতিআদিহি;

উজুং ৱাঞ্ঞাপদেসেন, ৱদে দুব্ভাসিতং দৱা.

৩৪২. দীঘে নখে চ কেসে চ, নাসলোমে ন ধাৰযে;

ন লব্ভং ৱীসতিমট্ঠং, সম্বাধে লোমহাৰণং.

৩৪৩. যথাৱুড্ঢং ন বাধেয্য, সঙ্ঘুদ্দিট্ঠংৱ সঙ্ঘিকং;

অধোতঅল্লপাদেহি, নক্কমে সযনাসনং;

সুধোতপাদকং ৱাপি, তথেৱ সউপাহনো.

৩৪৪. সঙ্ঘাটিযা ন পল্লত্থে, ভিত্তাদিং ন অপস্সযে;

পৰিকম্মকতং সন্তে, উদকে নো ন আচমে.

৩৪৫. অকপ্পিযসমাদানে, দৱা সিলাপৱিজ্ঝনে;

দেসনায সভাগায, আৱিকম্মে চ দুক্কটং.

৩৪৬. পটিস্সৱৱিসংৱাদে, সুদ্ধচিত্তস্স দুক্কটং;

পটিস্সৱক্খণে এৱ, পাচিত্তি ইতৰস্স তু.

৩৪৭. ন ৰুক্খমভিৰূহেয্য, সতি কিচ্চেৱ পোৰিসং;

আপদাসু যথাকামং, কপ্পতী অভিৰূহিতুং.

৩৪৮. ৱিনাদ্ধানং ৱজন্তস্স, দুক্কটং পৰিসাৱনং;

যাচমানস্স অদ্ধানে, অদদন্তস্স দুক্কটং.

৩৪৯. থুল্লচ্চযং ফুসে অঙ্গজাতচ্ছেদেন দুক্কটং;

আবাধপ্পচ্চযাঞ্ঞত্ৰ, সেসঙ্গে অত্তঘাতনে.

৩৫০. চিত্তপোত্থকৰূপানি, ন কৰে ন চ কাৰযে;

ন ৱুট্ঠাপেয্য ভুঞ্জন্তং, আৰামাৰঞ্ঞগেহসু.

৩৫১. যানানি পুমযুত্তানি, সিৱিকং হত্থৱট্টকং;

পাটঙ্কিঞ্চ গিলানস্স, কপ্পতী অভিৰূহিতুং.

৩৫২. বুদ্ধং ধম্মঞ্চ সঙ্ঘঞ্চ, আৰব্ভ কৰণে দৱং;

দুক্কটং পৰিসং ৱাপি, অঞ্ঞস্স উপলাড়নে.

৩৫৩. কাযং ঊৰুং নিমিত্তং ৱা, ভিক্খুনীনং ন দস্সযে;

ৱিৱৰিত্ৱা ন সিঞ্চেয্য, তা কদ্দমুদকাদিনা.

৩৫৪. ন গণ্হতো চ ওৱাদং, ন পচ্চাহৰতোপি চ;

বালং গিলানং গমিযং, ৱজ্জযিত্ৱান দুক্কটং.

৩৫৫. লোকাযতং ন ৱাচেয্য, পলিতং ন চ গাহযে;

পেড়াযপি ন ভুঞ্জেয্য, ন কীড়ে কিঞ্চি কীড়িতং.

৩৫৬. পাৰুপে ন নিৱাসেয্য, গিহিপাৰুতনিৱাসনং;

সংৱেল্লিযং নিৱাসেয্য, দাযং নালিম্পযেয্য ৱা.

৩৫৭. ৱড্ঢিং পযোজযে যাচে, নোঞ্ঞাতকপ্পৱাৰিতে;

অত্তনো পৰিভোগত্থং, দিন্নমঞ্ঞস্স নো দদে;

অগ্গং গহেত্ৱা ভুত্ৱা ৱা, কতিপাহং পুনো দদে.

৩৫৮. উদ্দিস্স যাচনে ৰক্খং, ঞত্ৱাঞত্ৱা ৱ দণ্ডিনং;

গীৱাস্স দণ্ডিতে দণ্ডো, সযং দণ্ডাপনে পন;

দণ্ডস্স অগ্ঘভেদেন, ঞেয্যা পাৰাজিকাদিকা.

৩৫৯. হৰন্তেসু পৰিক্খাৰং, ‘‘চোৰো চোৰো’’তি ভাসিতে;

অনত্থাযেসং গণ্হন্তে, দণ্ডং গীৱাস্স তত্তকং.

৩৬০. ৱিঘাসুচ্চাৰসঙ্কাৰ-মুত্তং ছড্ডেয্য দুক্কটং;

বহি পাকাৰকুট্টানং, ৱড়ঞ্জে নাৱলোকিয;

হৰিতে ৱাপি ৱীহাদি-নাড়িকেৰাদিৰোপিমে.

৩৬১. যোজাপেতুং পযোজেতুং, পযুত্তানি চ পস্সিতুং;

ন লব্ভং ধম্মযুত্তম্পি, নচ্চং গীতঞ্চ ৱাদিতং;

‘‘উপহাৰং কৰোমা’’তি, ৱুত্তে ৱা সম্পটিচ্ছিতুং.

৩৬২. ৰাজাগাৰং পোক্খৰণিং, উয্যানং চিত্তগাৰকং;

কীড়ত্থং গচ্ছতো দট্ঠুং, আৰামং দুক্কটং কতং.

৩৬৩. নৱে ন পটিবাহেয্যা-সনেনুণ্হে ন চীৱৰং;

নিদহেয্য খমাপেয্য, গৰুনা চ পণামিতো.

৩৬৪. অক্কোসনে পৰম্মুখা, আপত্তীহি চ সত্তহি;

ভিক্খুং উপাসকং ৱাপি, অঞ্ঞেনেৱ চ দুক্কটং.

৩৬৫. ন লব্ভং ৱিনিপাতেতুং, সদ্ধাদেয্যঞ্চ চীৱৰং;

লব্ভং পিতূনং সেসানং, ঞাতীনম্পি ন লব্ভতি.

৩৬৬. ৱস্সংৱুত্থোঞ্ঞতোঞ্ঞত্ৰ, ভাগং গণ্হেয্য দুক্কটং;

পটিদেয্য নট্ঠে জিণ্ণে, গীৱা নো দেয্য চোদিতো;

ধুৰনিক্খেপতো তেসং, হোতি ভণ্ডগ্ঘকাৰিযো.

৩৬৭. ন সন্তৰুত্তৰো গামং, কল্লো ৱা সউপাহনো;

পৱিসেয্য ন ধাৰেয্য, চামৰীমকসবীজনিং.

৩৬৮. অগিলানো ন ছিন্দেয্য, কেসে কত্তৰিযা বহি;

আৰামতো ন ধাৰেয্য, ছত্তং লব্ভতি গুত্তিযা.

৩৬৯. গাহেয্য নুভতোকাজং, একন্তৰিককাজকং;

সীসক্খন্ধকটিভাৰা, হত্থোলম্বো চ লব্ভতি.

৩৭০. আপত্তিযা অনোকাস-কতং চোদেয্য দুক্কটং;

সুদ্ধস্স চ অৱত্থুস্মিং, তথা ওকাসকাৰণে.

৩৭১. অট্ঠঙ্গুলাধিকং মঞ্চপটিপাদং ন ধাৰযে;

পকতঙ্গুলেন সত্তানং, মঞ্চং ৱা উচ্চপাদকং.

৩৭২. মূগব্বতাদিং গণ্হেয্য, দুক্কটং তিত্থিযব্বতং;

খুৰভণ্ডং পৰিহৰে, তথা ন্হাপিতপুব্বকো.

৩৭৩. যং কিঞ্চি যাচিতুং হত্থকম্মং তদনুসাৰতো;

লদ্ধং গহেতুং নিক্কম্মমযাচিত্ৱাপি কপ্পতি;

কাৰেতুমাহৰাপেতুং, যং কিঞ্চিপৰসন্তকং.

৩৭৪. গিহীনং গোপকে দেন্তে, গহেতুং দেতি যত্তকং;

লব্ভং যথাপৰিচ্ছেদং, সঙ্ঘচেতিযসন্তকে.

৩৭৫. দ্ৱীহাপজ্জেয্য আপত্তিং, কাযৱাচাহি ৱা ছহি;

অলজ্জিঞ্ঞাণকুক্কুচ্চপকতত্তা সতিপ্লৱা;

অকপ্পিযে ৱা কপ্পিযে, কপ্পাকপ্পিযসঞ্ঞিতা.

৩৭৬. অলজ্জিঞ্ঞাণতাপত্তিং, কাযৱাচাহি ছাদযে;

লিঙ্গে সঙ্ঘে গণেকস্মিং, চতুধাপত্তিৱুট্ঠিতি.

৩৭৭. পৰিকথোভাসৱিঞ্ঞত্তি, ন লব্ভা পচ্চযদ্ৱযে;

ৱিঞ্ঞত্তিযেৱ ততিযে, সেসে সব্বম্পি লব্ভতি.

৩৭৮. ন ৰূহতচ্চযে দানং, পঞ্চন্নং সহধম্মিনং;

সঙ্ঘস্সেৱ চ তং হোতি, গিহীনং পন ৰূহতি.

৩৭৯. ভিক্খু ৱা সামণেৰো ৱা, কালং কযিৰাথূপস্সযে;

ভিক্খুসঙ্ঘোৱ দাযজ্জো, তত্থ সেসেপ্যযংনযো.

৩৮০. পুৰিমস্সেৱিমং দিন্নং, দেহি নেত্ৱাসুকস্সতি;

পচ্ছিমস্সেৱ দম্মীতি, দিন্নং ঞত্ৱা ইমং ৱিধিং;

গণ্হে ৱিস্সাসগাহং ৱাধিট্ঠে মতকচীৱৰং.

৩৮১. লোহভণ্ডে পহৰণিং, দাৰুভণ্ডে চ দাৰুজং;

পত্তং পাদুকপল্লঙ্কং, আসন্দিং মত্তিকামযে;

ঠপেত্ৱা কপ্পতি সব্বং, কতকং কুম্ভকাৰিকন্তি.