৩৯. ৱস্সূপনাযিকনিদ্দেসো

ৱস্সূপনাযিকা চেৱাতি –

৩০৯. পুৰিমিকা পচ্ছিমিকা, দুৱে ৱস্সূপনাযিকা;

তত্থালযপৰিগ্গাহো, ৱচীভেদো চ এদিসো.

৩১০. ‘‘ইমস্মিং ৱিহাৰে ইমং, তেমাসং ৱস্সং উপেমি;

ইধ ৱস্সং উপেমী’’তি, চিত্তুপ্পাদেত্থ আলযো.

৩১১. নোপেতুকামো আৱাসং, তদহূতিক্কমেয্য ৱা;

ভৱেয্য দুক্কটাপত্তি, জানং ৱানুপগচ্ছতো.

৩১২. দুতিযং উপগচ্ছেয্য, ছিন্নৱস্সোনুপাগতো;

ন পক্কমেয্য তেমাসং, অৱসিত্ৱান চাৰিকং.

৩১৩. মাতাপিতূনমত্থায, পঞ্চন্নং সহধম্মিনং;

গিলানতদুপট্ঠাক-ভত্তমেসিস্সমোসধং.

৩১৪. পুচ্ছিস্সামি উপট্ঠিস্সং, গন্ত্ৱানভিৰতং অহং;

ৱূপকাসিস্সং কুক্কুচ্চং, দিট্ঠিং গৰুকমাদিকং.

৩১৫. কৰিস্সং ৱাপি কাৰেস্সং, ৱিনোদনং ৱিৱেচনং;

ৱুট্ঠানং ৱাপি উস্সুক্কং, গন্তুমিচ্চেৱমাদিনা;

লব্ভং সত্তাহকিচ্চেন, পহিতাপহিতেপি ৱা.

৩১৬. সঙ্ঘকম্মে ৱজে ধম্ম-স্সৱনত্থং নিমন্তিতো;

গৰূহি পহিতো ৱাপি, গৰূনং ৱাপি পস্সিতুং.

৩১৭. ন ভণ্ডধোৱনুদ্দেস-ঞাতুপট্ঠাকদস্সনে;

লব্ভং ন পাপুণেয্যজ্জে-ৱাগমিস্সন্তুদূৰগো.

৩১৮. সেসঞাতীহি পহিতে, ভিক্খুনিস্সিতকেন চ;

উপাসকোপাসিকাহি, নিদ্দিসিত্ৱাৱ পেসিতে.

৩১৯. ৱস্সচ্ছেদে অনাপত্তি, অন্তৰাযে সতত্তনো;

সঙ্ঘসামগ্গিযা ৱা নো, ছিন্নৱস্সো পৱাৰযে.

৩২০. অজ্ঝোকাসে চ ৰুক্খস্স, সুসিৰে ৱিটপেপি ৱা;

ছৱকুটিছত্তচাটী-সূপগন্তুং ন ৱট্টতি.

৩২১. অসেনাসনিকেনাপি, উপগন্তুং ন লব্ভতি;

পৱাৰেতুঞ্চ লব্ভতি, নাৱাসত্থৱজূপগোতি.