৩৮. কুলদূসননিদ্দেসো

দূসনন্তি –

২৯৭. পুপ্ফং ৱেড়ুং ফলং চুণ্ণং, দন্তকট্ঠঞ্চ মত্তিকং;

সঙ্গহণত্থং দদতো, কুলদূসনদুক্কটং.

২৯৮. থুল্লচ্চযং গৰুভণ্ডং, ইস্সৰেনেত্থ সঙ্ঘিকং;

দেন্তস্স দুক্কটাদীনি, থেয্যা সঙ্ঘঞ্ঞ সন্তকং.

২৯৯. কুলসঙ্গহা ৰোপেতুং, ৰোপাপেতুঞ্চ সব্বথা;

ফলপুপ্ফূপগং ৰুক্খং, জগ্গিতুঞ্চ ন ৱট্টতি.

৩০০. নিমিত্তোভাসতো কপ্পৱোহাৰপৰিযাযতো;

অত্তনো পৰিভোগত্থং, ৰোপনাদীনি লব্ভৰে.

৩০১. ৱুত্তাৱ ৱেজ্জিকা জঙ্ঘপেসনে গিহিকম্মসু;

ঠপেত্ৱা পিতৰো ভণ্ডুং, ৱেয্যাৱচ্চকৰং সকং.

৩০২. দুক্কটং পদৱাৰেন, হৰণে দূতসাসনং;

সাসনং অগ্গহেত্ৱাপি, পঠমং ৱদতো পুন.

৩০৩. উপ্পন্নপচ্চযা এৱং, পঞ্চন্নম্পি অকপ্পিযা;

অভূতাৰোচনাৰূপ-সংৱোহাৰুগ্গহাদিসা.

৩০৪. হৰাপেত্ৱা হৰিত্ৱাপি, পিতূনং সেসঞাতিনং;

পত্তানং ৱত্থুপূজত্থং, দাতুং পুপ্ফানি লব্ভতি;

মণ্ডনত্থঞ্চ লিঙ্গাদি-পূজত্থঞ্চ ন লব্ভতি.

৩০৫. তথা ফলং গিলানানং, সম্পত্তিস্সৰিযস্স চ;

পৰিব্বযৱিহীনানং, দাতুং সপৰসন্তকং.

৩০৬. ভাজেন্তে ফলপুপ্ফম্হি, দেয্যং পত্তস্স কস্সচি;

সম্মতেনাপলোকেত্ৱা, দাতব্বমিতৰেন তু.

৩০৭. ৱিহাৰে ৱা পৰিচ্ছিজ্জ, কত্ৱান কতিকং ততো;

দেয্যং যথাপৰিচ্ছেদং, গিলানস্সেতৰস্স ৱা;

যাচমানস্স কতিকং, ৱত্ৱা ৰুক্খাৱ দস্সিযা.

৩০৮. সিৰীসকসৱাদীনং, চুণ্ণে সেসে চ নিচ্ছযো;

যথাৱুত্তনযো এৱ, পণ্ণম্পেত্থ পৱেসযেতি.