৩৪. পথৱীনিদ্দেসো

পথৱী চাতি –

২৪২. জাতাজাতাতি দুৱিধা, সুদ্ধমত্তিকপংসুকা;

জাতাদড্ঢা চ পথৱী, বহুমত্তিকপংসুকা;

চাতুমাসাধিকোৱট্ঠপংসুমত্তিকৰাসি চ.

২৪৩. সুদ্ধসক্খৰপাসাণমৰুম্বকথলৱালুকা;

দড্ঢা চ ভূমি যেভুয্যসক্খৰাদিমহীপি চ;

দুতিযা ৱুত্তৰাসি চ, চাতুমাসোমৱট্ঠকো.

২৪৪. দ্ৱে ভাগা তীসু ভাগেসু, মত্তিকা যস্স ভূমিযা;

যেভুয্যমত্তিকা এসা, সেসেসুপি অযং নযো.

২৪৫. পাচিত্তি খণনে জাতে, জাতসঞ্ঞিস্স দুক্কটং;

দ্ৱেড়্হস্সাজাতসঞ্ঞিস্স, নাপত্তাণাপনে তথা.

২৪৬. পহাৰে পহাৰাপত্তি, খণমানস্স অত্তনা;

একাযাণত্তিযা একা, নানাণত্তীসু ৱাচসো.

২৪৭. ‘‘ইমং ঠানমিমং কন্দমিধ ৱাপিং খণেত্থ চ;

জালেহগ্গি’’ন্তি ৱা ৱত্তুং, নিযমেত্ৱা ন ৱট্টতি.

২৪৮. ‘‘থম্ভস্সিমস্সাৱাটং ৱা, মত্তিকং জান মাহৰ;

কৰোহি কপ্পিযঞ্চে’’তি, ৱচনং ৱট্টতেদিসং.

২৪৯. অসম্বদ্ধং পথৱিযা, সুক্খকদ্দমআদিকং;

কোপেতুং তনুকং লব্ভমুস্সিঞ্চনীযকদ্দমং.

২৫০. গণ্ডুপ্পাদং উপচিকামত্তিকং মূসিকুক্কিৰং;

চাতুমাসাধিকোৱট্ঠং, লেড্ডাদিঞ্চ ন কোপযে.

২৫১. পতিতে ৱাপিআদীনং, কূলে উদকসন্তিকে;

পাসাণে চ ৰজে লগ্গে, পতিতে নৱসোণ্ডিযা.

২৫২. ৱম্মিকে মত্তিকাকুট্টে, অব্ভোকাসুট্ঠিতে তথা;

যেভুয্যকথলট্ঠানে, তিট্ঠতিট্ঠককুট্টকো.

২৫৩. থম্ভাদিং গণ্হিতুং ভূমিং, সঞ্চালেত্ৱা ৱিকোপযং;

ধাৰায ভিন্দিতুং ভূমিং, কাতুং ৱা ৱিসমং সমং.

২৫৪. সম্মুঞ্জনীহি ঘংসিতুং, কণ্টকাদিং পৱেসিতুং;

দস্সেস্সামীতি ভিন্দন্তো, ভূমিং চঙ্কমিতুং পদং.

২৫৫. ঘংসিতুং অঙ্গপচ্চঙ্গং, কণ্ডুৰোগী তটাদিসু;

হত্থং ৱা ধোৱিতুং ভূমিং, ঘংসিতুং ন চ কপ্পতি.

২৫৬. থম্ভাদিউজুকুদ্ধাৰো, পাসাণাদিপৱট্টনং;

সাখাদিকড্ঢনং ৰুক্খলতাচ্ছেদনফালনং.

২৫৭. সেকো পস্সাৱআদীনং, সুদ্ধচিত্তস্স ৱট্টতি;

অল্লহত্থং ঠপেত্ৱান, ৰজগ্গাহো চ ভূমিযা.

২৫৮. অগ্গিস্স অনুপাদানে, কপালে ইট্ঠকায ৱা;

পাতেতুং লব্ভতে অগ্গিং, ভূমিযং ৱাৱসে সতীতি.