৩৫. পৰিক্খাৰনিদ্দেসো

পৰিক্খাৰোতি –

২৫৯. পঞ্চৱণ্ণেহি সুত্তেহি, অন্তো বহি চ সিব্বিতুং;

গিৰিকূটড্ঢচন্দাদিং, ছত্তে পণ্ণে চ ছিন্দিতুং.

২৬০. ঘটকং ৱাড়ৰূপং ৱা, দণ্ডে লেখা ন ৱট্টতি;

ৱট্টতী দণ্ডবুন্দম্হি, অহিচ্ছত্তকসাদিসং.

২৬১. সিব্বিতুং একৱণ্ণেন, পঞ্জৰং ৱা ৱিনন্ধিতুং;

থিৰত্থং ৱট্টতী ছত্তে, দণ্ডে লেখাৱ বন্ধিতুং.

২৬২. অন্তে পট্টমুখে ৱাপি, ৱেণি সঙ্খলিকাপি ৱা;

সূচিৱিকাৰমঞ্ঞং ৱা, চীৱৰে ন চ কপ্পতি;

কপ্পবিন্দুৱিকাৰম্পি, পাড়িকণ্ণিকআদিকং.

২৬৩. গণ্ঠিপাসকপট্টাপি, চতুক্কোণাৱ অগ্ঘিযং;

মুগ্গৰো কক্কটচ্ছাদি-ৱিকাৰং নেত্থ ৱট্টতি.

২৬৪. কোণসুত্তা চ পীড়কা, দুৱিঞ্ঞেয্যাৱ কপ্পৰে;

গন্ধং তেলং ৱ লাখং ৱা, ৰজনে ন চ পক্খিপে.

২৬৫. ৰত্তং সঙ্খেন মণিনা, ঘট্টেয্যঞ্ঞেন ৱা ন চ;

ঘংসেয্য দোণিযং কত্ৱা, পহাৰে ন চ মুট্ঠিনা.

২৬৬. কণ্ণকোণকসুত্তানি, ৰত্তে ছিন্দেয্য চীৱৰে;

লেখা ন ৱট্টতী ধম্ম-কৰণে ছত্তৱট্টিযং.

২৬৭. লেখং ঠপেত্ৱা মণিকা, পীড়কা কুঞ্চিকায চ;

পিপ্ফলে চ পৰিচ্ছেদ-লেখা দণ্ডম্হি ৱট্টতি.

২৬৮. মালাদ্যৰণিযং পত্ত-মণ্ডলে ভিত্তিকম্ম চ;

হেট্ঠা লেখাদ্ৱযং উদ্ধং, অহিচ্ছত্তকসাদিসং.

২৬৯. হিত্ৱা কত্তৰযট্ঠিম্হি, সূচিসণ্ডাসকেপি চ;

যং কিঞ্চি গিৰিকূটাদি-ৱণ্ণমট্ঠং ন ৱট্টতি.

২৭০. বিম্বোহনে ভিসিমঞ্চ-পীঠাদিসযনাসনে;

সম্মুঞ্জনিম্হি সঙ্কাৰ-ছড্ডনে ৰঙ্গভাজনে.

২৭১. পানীযভাজনে পাদ-পীঠে কথলিকায চ;

পত্তাধাৰপিধানেসু, তালৱণ্টে চ বীজনে;

যং কিঞ্চি মালাকম্মাদি-ৱণ্ণমট্ঠমৱাৰিতং.

২৭২. সেনাসনে পন দ্ৱাৰকৱাটাদিপ্পভেদনে;

সোৱণ্ণমযনুঞ্ঞাতং, ৱণ্ণমট্ঠম্হি কা কথা.

২৭৩. ৱিসাণনাড়িলাব্ৱাদিপ্পভেদে তেলভাজনে;

পুমিত্থিৰূপৰহিতং, ৱণ্ণমট্ঠমৱাৰিতন্তি.