৩১. ৱিকপ্পনানিদ্দেসো

ৱিকপ্পনা চেৱাতি –

২২১. সম্মুখা পৰম্মুখাতি, দুৱে ৱুত্তা ৱিকপ্পনা;

সম্মুখায ৱিকপ্পেন্তো, ব্যত্তস্সেকস্স সন্তিকে;

‘‘ইমং চীৱৰং তুয্হং, ৱিকপ্পেমী’’তি ভাসযে.

২২২. এত্তাৱতা নিধেতুংৱ, কপ্পতী ন চ কপ্পতি;

পৰিভোগাদিকং তেন, অপ্পচ্চুদ্ধটভাৱতো.

২২৩. ‘‘ময্হং সন্তকং পৰিভুঞ্জ ৱা ৱিস্সজ্জেহি ৱা যথাপচ্চযং ৱা কৰোহী’’তি –

তেন পচ্চুদ্ধটেযেৱ, পৰিভোগাদি কপ্পতি.

২২৪. অপৰা সম্মুখাৱেকা, ভিক্খুস্সেকস্স সন্তিকে;

গহেত্ৱা নামমেকস্স, পঞ্চন্নং সহধম্মিনং.

২২৫. ‘‘ইমং চীৱৰং তিস্সস্স ভিক্খুনো, তিস্সায ভিক্খুনিযা, তিস্সস্স সামণেৰস্স, তিস্সায সামণেৰিযা, তিস্সায সিক্খমানায ৱিকপ্পেমী’’তি ৱত্তব্বং.

তেন ভিক্খুনা ‘‘তিস্সস্স ভিক্খুনো, তিস্সায ভিক্খুনিযা, তিস্সস্স সামণেৰস্স, তিস্সায সামণেৰিযা, তিস্সায সিক্খমানায সন্তকং পৰিভুঞ্জ ৱা ৱিস্সজ্জেহি ৱা যথাপচ্চযং ৱা কৰোহী’’তি ৱত্তব্বং.

২২৬. পৰম্মুখাৱিকপ্পনে-কস্সন্তিকেৱমীৰযে;

‘‘ইমং চীৱৰং তুয্হং ৱিকপ্পনত্থায দম্মী’’তি.

২২৭. তেন ৱত্তব্বো ‘‘কো তে মিত্তো ৱা সন্দিট্ঠো ৱা’’তি. ইতৰেন চেৱং ৱত্তব্বং ‘‘তিস্সো ভিক্খূ’’তি ৱা ‘‘তিস্সা ভিক্খুনী’’তি ৱা ‘‘তিস্সো সামণেৰো’’তি ৱা ‘‘তিস্সা সামণেৰী’’তি ৱা ‘‘তিস্সা সিক্খমানা’’তি ৱা.

পুন তেন ‘‘অহং তিস্সস্স তিস্সায ৱা দম্মী’’তি ৱিকপ্পেত্ৱা তেনেৱ ‘‘তিস্সস্স ভিক্খুনো, তিস্সায ভিক্খুনিযা, তিস্সস্স সামণেৰস্স, তিস্সায সামণেৰিযা, তিস্সায সিক্খমানায সন্তকং পৰিভুঞ্জ ৱা ৱিস্সজ্জেহি ৱা যথাপচ্চযং ৱা কৰোহী’’তি পচ্চুদ্ধৰিতব্বং.

২২৮. দূৰসন্তিকত্তেকত্তবহুভাৱং ৱিজানিয;

‘‘এতং ইম’’ন্তি ‘‘এতানি, ইমানী’’তেত্থ যোজযে.

২২৯. দসাহং মাসমেকং ৱা, পঞ্চ ৱা কথিনত্থতে;

পাৰিপূৰত্থমূনস্স, পচ্চাসা সতি মাসকং;

নুপ্পাদযতি নিস্সগ্গিং, নাধিট্ঠিতৱিকপ্পিতন্তি.